សាលាដំបូងរាជធានីភ្នំពេញ ច្រានចោលលើសំណើសុំនៅក្រៅឃុំបណ្តោះអាសន្នរបស់លោកគឹម សុខ
កាលពីព្រឹកថ្ងៃអង្គារ៍ទី១៨កក្កដានេះ តុលាការបានបដិសេធមិនឲ្យលោក គឹម សុខ ចេញក្រៅឃុំមុនថ្ងៃបើកសវនាការកាត់ក្តីលើពាក្យបណ្តឹងដែលប្តឹងដោយលោកនាយករដ្ឋមន្ត្រី ហ៊ុន សែន។ ការបដិសេធនេះគឺដោយសារតុលាការខ្លាចលោកគឹមសុខ គេចខ្លួនមិនព្រមចូលក្នុងសវនាការជំនុំជំរះក្តី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
អត្ថបទដោយ៖ ហេង ពុធីរៈ និង ប៊ុន សៅសុភនាថ
មេធាវីការពារក្តីឲ្យលោកគឹម សុខបានឲ្យដឹងថា បើតាមលក្ខណៈសម្បត្តិរបស់លោកគឹមសុខ គួរតែដោះលែងឲ្យនៅក្រៅឃុំមុនអង្គសេចក្តី ប៉ុន្តែតុលាការសំអាងថាបើសិនជាដោះលែងលោកគឹមសុខ នោះគាត់នឹងមិនចូលខ្លួនទេ។ លោកក៏បានបន្ថែមថាកូនក្តីរបស់លោកនឹងមិនរត់គេចទេ គាត់នឹងតវ៉ាក្តីរកយុត្តិធម៌ឲ្យខ្លួនគាត់។
លោកមេធាវី ជូង ជូងីបានថ្លែងក្រោយពីពាក្យសុំដោះលែងត្រូវបានតុលាការច្រានចោល កាលពីព្រឹកថ្ងៃអង្គារ៍ ទី១៨នេះ។ ហើយនេះគឺជាលើកទី២ ដែលមានការស្នើសុំឲ្យតុលាការដោះលែងលោកគឹម សុខឲ្យនៅក្រៅឃុំជាបណ្តោះអាសន្ន ចំណែកឯការស្នើសុំលើកទី១វិញ ត្រូវបានធ្វើឡើងនៅថ្ងៃទី២៤កុម្ភៈ ឆ្នាំ២០១៧ កន្លងទៅ។
តាមមេធាវីដដែលនេះ ការតតាំងក្តីចំពោះលោកគឹម សុខ គឺមិនយុត្តិធម៌ទេ ខណៈដើមបណ្តឹងជានាយករដ្ឋមន្ត្រី ឯចុងចោទជាប្រជាពលរដ្ឋសាមញ្ញ។ ម៉្យាងវិញទៀត ដែលលោកគឹម សុខចង់រក្សាសិទ្ធិនៅក្រៅឃុំ គឺ លោកចង់មានពេលវេលាគ្រប់គ្រាន់ធ្វើការជាមួយមេធាវី ដើម្បីតតាំងរឿងក្តីដែលនឹងធ្វើនៅថ្ងៃទី ២៦ ខែកក្កដា ឆ្នាំ២០១៧ ខាងមុខនេះ។
ទោះបីជាតុលាការមិនព្រមអនុញ្ញាតការស្នើសុំនេះក៏ដោយ ក៏លោកជូង ជូងី នឹងប្រើសិទ្ធិប្តឹងឧទ្ធរទាមទារឲ្យមានការដោះលែងបន្តទៀត នៅពេលឆាប់ៗនេះ។
សូមរំលឹកថា លោក គឹម សុខត្រូវបានបញ្ជូនទៅឃុំខ្លួនក្នុងពន្ធនាគារព្រៃស តាំងពីថ្ងៃទី១៧កុម្ភៈ ឆ្នាំ២០១៧ ដោយចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ និង បទបរិហារកេរ្តិ៍ជាសាធារណៈ ដែលប្តឹងដោយលោកនាយករដ្ឋមន្ត្រី ហ៊ុនសែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ