សមាគមធាងត្នោត៖ រយៈពេលបួនឆ្នាំចុងក្រោយ កម្មករស៊ីនទ្រីចំនួន ១៤នាក់ស្លាប់
ក្នុងរយៈពេល៤ឆ្នាំចុងក្រោយនេះ កម្មករស៊ីនទ្រីចំនួន១៤នាក់បានស្លាប់ ដោយសារតែគ្រោះថ្នាក់ចរាចរណ៍នៅអំឡុងពេលបំពេញការងារ។ នេះបើតាមរបាយការណ៍របស់អង្គការសមាគមធាងត្នោត ចេញផ្សាយកាលពីចុងខែមករា កន្លងទៅ។ ចំណែកក្រុមហ៊ុនស៊ីនទ្រីអះអាងថាខ្លួនគោរពត្រឹមត្រូវទៅតាមលក្ខខណ្ឌការងារ ដើម្បីសុវត្ថិភាពកម្មករ។
ចុះផ្សាយនៅថ្ងៃ៖
ស្តាប់ - ០២:២៩
ក្នុងរយៈពេល៤ឆ្នាំចុងក្រោយនេះ កម្មករក្រុមហ៊ុនស៊ីនទ្រីចំនួន១៤នាក់បានជួបគ្រោះថ្នាក់ចរាចរណ៍ដោយត្រូវយានយន្តបុកស្លាប់នៅពេលបំពេញការងារ។ ករណីស្លាប់នេះមានចំនួនរហូតដល់ទៅពាក់កណ្តាលបានកើតឡើងនៅពេលយប់។ ក្រុមហ៊ុនស៊ីនទ្រីមិនមានទិន្នន័យបញ្ជាក់ថា តើអ្នកបើកបរ ដែលបានបង្កហេតុគ្រោះថ្នាក់នោះស្ថិតនៅក្នុងស្ថានភាពស្រវឹង ឬស្ថានភាពធម្មតានោះទេ។ នេះបើតាមរបាយការណ៍ស្តីពីអភិបាលកិច្ចទីក្រុង ការគ្រប់គ្រងកាកសំណល់នៅភ្នំពេញ ចេញផ្សាយដោយអង្គការសមាគមធាងត្នោត។
របាយការណ៍កម្រាស់៤៣ទំព័រនេះបានឲ្យដឹងទៀតថា ក្នុងរយៈពេល៣ឆ្នាំចុងក្រោយនេះ មានគ្រោះថ្នាក់ដែលបង្កឲ្យមានរបួសរហូតដល់ទៅចំនួន៣៨០ករណី ក្នុងនោះរួមមាន គ្រោះថ្នាក់ដោយសារតែរថយន្តមានចំនួន២៨៥ និងការរងរបួសចំនួន៩០ករណីដោយសារតែការមុត ការរលាក និងការធ្លាក់។
អង្គការសមាគមធាងត្នោតបានបញ្ជាក់ថា តាមច្បាប់ការងារមាត្រា២២៩ និង២៣០ កន្លែងធ្វើការទាំងអស់ត្រូវធានាលក្ខខណ្ឌការងារសម្រាប់សុខភាពកម្មរ និងត្រូវតែបង្កើតការធានាសុវត្ថិភាពដល់កម្មករ។ ការស្លាប់មនុស្ស១៤នាក់ និងមនុស្សចំនួន៣៨០នាក់រងរបួសក្នុងរយៈពេល៤ឆ្នាំចុងក្រោយនេះ បង្ហាញថាក្រុមហ៊ុនស៊ីនទ្រីមិនបានរក្សានូវលក្ខខណ្ឌការងារសម្រាប់សុខភាព និងសុវត្ថិភាពនៃកម្មកររបស់ខ្លួន។ នេះបើតាមអង្គការសមាគមធាងត្នោត។
អង្គការសមាគមធាងត្នោតតាមរយៈរបាយការណ៍របស់ខ្លួនបានទាមទារឲ្យមានការស៊ើបអង្កេតជាផ្លូវការពីក្រុមអធិការកិច្ចការងារ អ្នកត្រួតពិនិត្យការងារ និងនាយកដ្ឋានអធិការកិច្ចការងារ ដើម្បីកំណត់ពីការបំពេញកាតព្វកិច្ចខាងផ្លូវច្បាប់ទៅកម្មកររបស់ក្រុមហ៊ុនស៊ីនទ្រី និងការផ្តល់ការពារសុវត្ថិភាពខ្ពស់ដល់កម្មករ។
លោក ទួន ស៊ីផេង ប្រធានក្រុមហ៊ុនស៊ីនទ្រីបានបញ្ជាក់ប្រាប់វិទ្យុបារាំងអន្តរជាតិថា លោកមិនទាន់បានឃើញរបាយការណ៍របស់អង្គការសមាគមធាងត្នោតនៅឡើយទេ។ ប៉ុន្តែលោកអះអាងថាក្រុមហ៊ុនរបស់លោកបានគោរពត្រឹមត្រូវទៅតាមច្បាប់ស្តីពីការងារ។ លោកបន្តថា ក្រុមហ៊ុនតែងតែចែកសម្ភារៈប្រើប្រាស់ ដូចជា អាវចំណាំងផ្លាត, ស្រោមដៃ, ម៉ាស, និងស្បែកជើងជាដើម ប៉ុន្តែកម្មករអះអាងថាពិបាកប្រើប្រាស់សម្ភារៈទាំងនោះ។
ប្រធានក្រុមហ៊ុនស៊ីនទ្រី រូបនេះ បញ្ជាក់ទៀតថាក៏មានករណីគ្រោះថ្នាក់កើតឡើងចំពោះកម្មករដែរ ជាពិសេសពេលយប់ ពោលគឺជាករណីគ្រោះថ្នាក់ចរាចណ៍ ដែលបង្កឡើងដោយយានយន្តផ្សេងទៀតបើកលឿន និងក្នុងស្ថានភាពស្រវឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ