លោក ឈុំ សុជាតិ៖ ការធ្វើសមយុទ្ធកម្ពុជា-ចិន មិនមែនដើម្បីឆ្លើយតបនឹងប្រទេសជិតខាងទេ
លំហាត់សមយុទ្ធរវាងកងទ័ពកម្ពុជា និងកងទ័ពរំដោះប្រជាជនចិន ដែលធ្វើរួមគ្នារយៈពេលជិតកន្លះខែ ត្រូវបានបិទបញ្ចប់នៅថ្ងៃទី២៩ខែមីនានេះ ដោយបង្ហាញសាច់ដុំខ្លាំងក្លាក្នុងលំហាត់សមយុទ្ធរវាងកងទ័ពនៃប្រទេសទាំងពីរ។ លំហាត់សមយុទ្ធបាញ់គ្រាប់ពិតដែលត្រូវបិទបញ្ចប់នៅថ្ងៃនេះ គឺជាប្រតិបត្តិការកម្ទេចជំរុំរបស់ពួកភេរវករ ដោយប្រើប្រាស់យន្តហោះចម្បាំង និងរថពាសដែក។ ក្រសួងការពារជាតិកម្ពុជាអះអាងថា ការធ្វើសមយុទ្ធនេះ មិនមែនជាការឆ្លើយតបទៅនឹងប្រទេសជិតខាងទេ។
ចុះផ្សាយនៅថ្ងៃ៖
សកម្មភាពសមយុទ្ធនាគមាសនៅតំបន់ភ្នំធំម្រះព្រៅក្នុងខេត្តកំពង់ស្ពឺនាថ្ងៃបញ្ចប់នេះ រួមមានការប្រយុទ្ធប្រើកម្លាំងសាច់ដុំយ៉ាងខ្លាំងក្លា ជាមួយនឹងឧបករណ៍ធ្វើសង្រ្គាមជាច្រើនប្រភេទទៀត។ ក្នុងនោះក៏មានផងដែរ ការប្រើយន្តហោះគ្មានមនុស្សបើក ឬហៅថា Drone ដើម្បីចូលស៊ើបការណ៍ ការប្រើឧទ្ធម្ភាគចក្រ កាំភ្លើងធំ រថពាសដែកចល័ត វាយកម្ទេចជំរុំភេរវករ និងការរំដោះចំណាប់ខ្មាំងដោយប្រើប្រាស់ទ័ពពិសេសចុះពីឧទ្ធម្ភាគចក្រ។ លើសពីនេះទៀត កងទ័ពកម្ពុជា និងចិនក៏បានបង្ហាញពីជំនាញរៀងៗខ្លួន ក្នុងការលោតឆ័ត្រយោង និងការប្រើឧទ្ធម្ភាគចក្រដង្ហែទង់នៃប្រទេសទាំងពីរ។
លំហាត់សមយុទ្ធរវាងកងទ័ពកម្ពុជា-ចិន ដែលត្រូវបានគេដាក់ឈ្មោះថា «សមយុទ្ធនាគមាសឆ្នាំ២០១៨» បានបើកជាផ្លូវការកាលពីថ្ងៃទី១៧ខែមីនា នៅតំបន់ភ្នំធំម្រះព្រៅ ស្រុកសំរោងទង ខេត្តកំពង់ស្ពឺ ដោយមានការចូលរួមពីកងទ័ពកម្ពុជា និងកងទ័ពចិនសរុបជិត៥០០នាក់។ សមយុទ្ធនេះ ប្រើប្រាស់កាំភ្លើង១៩៣ដើម រាប់ទាំងកាំភ្លើងធំ រថយន្ត និងរថពាសដែក៩គ្រឿង។ នេះបើតាម អ្នកនាំពាក្យក្រសួងការពារជាតិកម្ពុជា លោក ឈុំ សុជាតិ។
តំណាងកងទ័ពប្រជាជនចិន លោកឧត្តមសេនីយ៍ កែវ ជុងហឺ បានថ្លែងថា លំហាត់សមយុទ្ធនេះ ក៏ធ្វើឡើងដើម្បីអបអរសាទរខួប៦០ឆ្នាំនៃទំនាក់ទំនងកម្ពុជា-ចិន ដែលបានបង្កើតឡើងនៅក្នុងឆ្នាំ១៩៥៨។ គឺជាសមយុទ្ធ ក្រោមប្រធានបទ «រួមគ្នាប្រឆាំងភេរវកម្ម និងការងារមនុស្សធម៌» ដោយផ្តោតលើការដោះមីននិងការជួយសង្គ្រោះប្រជាពលរដ្ឋពីគ្រោះមហន្តរាយ។
លោក ឈុំ សុជាតិ អ្នកនាំពាក្យក្រសួងការពារជាតិ បានប្រាប់វិទ្យុបារាំងបន្ថែមថា លំហាត់សមយុទ្ធ រវាងកងទ័ពកម្ពុជា-ចិន នាពេលនេះ មិនមែនជាការឆ្លើយតបនឹងការធ្វើសមយុទ្ធរវាងកងទ័ពអាមេរិក និងកងទ័ពវៀតណាមកន្លងមកនោះទេ។
បើតាមលោក ឥត សារ៉ាត់ អគ្គមេបញ្ជារងកងយុទ្ធពលខេមរភូមិន្ទ ដើម្បីរៀបចំលំហាត់សមយុទ្ធនាគមាសឆ្នាំ២០១៨នេះ គឺភាគីចិនបាននាំយកមកនូវឧទ្ធម្ភាគចក្រចំនួន៣គ្រឿង រថពាសដែក រួមនឹងយុទ្ធោបករណ៍មានកាំភ្លើង និងអាវុធជាច្រើនប្រភេទទៀត។ ជាសមយុទ្ធទ្រង់ទ្រាយធំលើកទី២រវាងកម្ពុជា-ចិន បន្ទាប់ពីសមយុទ្ធរួមគ្នាកាលពីឆ្នាំ២០១៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ