ដាក់ទោស ជួប សម្លាប់ ដាក់ពន្ធនាគារអស់មួយជីវិត ខណៈតុលាការបំបែកសំណុំរឿងស្វែងរកអ្នកពាក់ព័ន្ធ
សាលាដំបូងរាជធានីភ្នំពេញនៅព្រឹកថ្ងៃទី ២៣មីនានេះ បានប្រកាសសាលក្រមផ្ដន្ទាទោសទណ្ឌិតឈ្មោះអឿត អាង ឬ ជួប សម្លាប់ ដាក់ពន្ធនាគារអស់មួយជីវិត។ ក្នុងនោះជួប សម្លាប់ ត្រូវបានចោទប្រកាន់ពីរបទល្មើសរួមមានៈ កាន់កាប់អាវុធខុសច្បាប់ និងឃាតកម្មគិតទុកជាមុនក្នុងសំណុំរឿងបាញ់សម្លាប់ លោកបណ្ឌិតកែម ឡី អ្នកវិភាគសង្គម និងនយោបាយ កាលពីថ្ងៃទី ១០ កក្កដាឆ្នាំ ២០១៦ នៅស្តាម៉ាត់ ស្តុបបូកគោ។ មេធាវី ជួប សម្លាប់ បានអះអាងបន្ថែមថា តុលាការបានបំបែកសំណុំរឿង ដើម្បីស៊ើបអង្កេតមនុស្សពីរនាក់ផ្សេងទៀតដែលជាប់ពាក់ព័ន្ធក្នុងសំណុំរឿងឃាតកម្មនេះ។
ចុះផ្សាយនៅថ្ងៃ៖
ស្តាប់ - ០២:០៧
បន្ទាប់ពីត្រូវបានផ្ដន្ទាទោសដាក់ពន្ធនាគារអស់មួយជីវិត សាលាដំបូងរាជធានីបានបង្គាប់ឲ្យ អឿត អាង ឬ ជួប សម្លាប់ ប្ដឹងជំទាស់នឹងសេចក្ដីសម្រេចទៅកាន់តុលាការឧទ្ទរណ៍ក្នុងរយៈពេលមួយខែ គិតចាប់ពីថ្ងៃប្រកាសសាលក្រមនេះ។ មេធាវីជួប សម្លាប់ លោក យុង ផានិត ថ្លែងប្រាប់អ្នកកាសែតថា លោកនឹងពិភាក្សាជាមួយ ជួប សម្លាប់ ក្នុងការប្ដឹងជំទាស់ទៅឧទ្ទរណ៍។ លោកមេធាវីមិនបានឆ្លើយឲ្យចំសំណួរថា ទទួលយកបានឬមិនទទួលយកបាននោះទេ ចំពោះការប្រកាសសាលក្រមនេះ ប៉ុន្តែលោកអះអាងថា មានការសោកស្ដាយ ដែលតុលាការមិនព្រមបន្ថូរបន្ថយទោសដល់ជួប សម្លាប់។
បើតាមលោកមេធាវី យុង ផានិត នឹងស្នើឲ្យតុលាការបំបែកសំណុំស៊ើបអង្កេតទៅលើមនុស្សពីរនាក់ទៀត ដែលជាប់ពាក់ព័ន្ធឃាតកម្មសម្លាប់លោកបណ្ឌិត កែម ឡីនេះដែរ។ នោះគឺអ្នកផ្ដល់អាវុធ និងម្នាក់ទៀតនាំ ជួប សម្លាប់ឲ្យស្គាល់លោក កែម ឡី។
សូមបញ្ជាក់ថា ជួប សម្លាប់ ក៏បានបង្ហាញវត្តមាននៅក្នុងបន្ទប់សវនាការដើម្បីសាលក្រមដែលជាសេចក្ដីសម្រេចចុងក្រោយរបស់សាលាដំបូងរាជធានីភ្នំពេញនេះដែរ។
ការប្រកាសសាលក្រមនេះធ្វើឡើងបន្ទាប់ពីសាលាដំបូងរាជធានីភ្នំពេញបើកការជំនុំជម្រះសំណុំរឿងឃាតកម្មលើលោកបណ្ឌិត កែម ឡី កាលពីថ្ងៃទី ១មីនា។
កាលណោះ អឿត អាង អះអាងតាំងពីដើមដល់ចប់ថា លោកមានឈ្មោះ ជួប សម្លាប់ កើតនៅបន្ទាយមានជ័យ ជាកូនកំព្រា គ្មានប្រពន្ធកូន និងរក្សាចម្លើយសារភាពថា ពិតជាឃាតករ បានសម្លាប់លោកបណ្ឌិត កែម ឡី កាលពីថ្ងៃទី ១០ កក្កដា ឆ្នាំ ២០១៦ នៅហាងស្តារម៉ាត (Star Mart) ក្នុងស្ថានីយសាំងកាល់តិច)Caltex) ស្តុបបូកគោ រាជធានីភ្នំពេញ។ ជួប សម្លាប់ រៀបរាប់ថា ការសម្លាប់លោក កែម ឡី គឺដោយសារគំនុំខឹងលោក កែម ឡី បោកយកប្រាក់បីពាន់ដុល្លារ។ នៅថ្ងៃកើតហេតុ ជួប សម្លាប់ បានបាញ់ពីរគ្រាប់ សំដៅផ្តាច់ជីវិតលោក កែម ឡី ដោយមួយគ្រាប់ដំបូងសំដៅចំ ក្បាល និងមួយគ្រាប់ទៀតសំដៅ ក មុនពេលដើរចេញពីហាងស្តារម៉ាត។
សវនាការពេលនោះក៏បានបញ្ចប់ដោយ មិនអស់ចិត្ត សម្រាប់អ្នកចូលរួមតាមដានក្នុងបន្ទប់សវនាការ។ មិនអស់ចិត្ត ក៏ព្រោះតែ វិដេអូភស្តុតាង ក្នុងសវនាការ មិនបានបង្ហាញពីសកម្មភាពនៃការបាញ់សម្លាប់លោកបណ្ឌិត កែម ឡី ទេ គឺវិដេអូទាំង ៧ឈុត បង្ហាញត្រឹម សកម្មភាពបុរសម្នាក់ ដើរចេញចូលហាងស្តារម៉ាត ដកកាំភ្លើងផ្ទុះអាវុធ និងរត់គេចតាមផ្លូវប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ