កម្ពុជា-ចិន ផ្សព្វផ្សាយសក្តានុពលទេសចរណ៍កម្ពុជានៅទីក្រុងភ្នំពេញទៅកាន់អ្នកទេសចរចិននិងប្រទេសទី៣
គណៈប្រតិភូចិន រួមមានបេសកជនចំនួន២០០០នាក់ ដឹកនាំដោយអនុរដ្ឋមន្ត្រីក្រសួងវប្បធម៌និងទេសចរណ៍ បានមកដល់កម្ពុជាហើយ ដើម្បីចូលរួមក្នុងពិធីអបអរឆ្នាំវប្បធម៌ និងទេសចរណ៍កម្ពុជា-ចិន ២០១៩។ គឺជាការជួបជុំដ៏ធំលើវិស័យទេសចរណ៍ និងវប្បធម៌ រវាងប្រទេសទាំងពីរ បន្ទាប់ពីកម្ពុជាមើលឃើញថាទីផ្សារទេសចរណ៍ចិនធំ និងស្របតាមគោលដៅទាក់ទាញភ្ញៀវទេសចរណ៍បរទេសឲ្យបាន៧លាននាក់ នៅឆ្នាំ២០២០។
ចុះផ្សាយនៅថ្ងៃ៖
ស្តាប់ - ០២:២៦
ការមកដល់របស់បេសកជនទេសចរណ៍ចិនប្រមាណ២ពាន់នាក់ ដែលដឹកនាំដោយលោក ចាង ស៊ុ អនុរដ្ឋមន្ត្រីក្រសួងវប្បធម៌ និងទេសចរណ៍ចិន ចាប់តាំងពីថ្ងៃទី២ដល់ថ្ងៃទី៨ ខែមិថុនានេះ គឺជាការមកដល់នៃពពួកមនុស្សខ្លឹមៗ ដែលមានសក្តានុពលអាចជួយផ្សព្វផ្សាយពីទេសចរណ៍សម្រាប់ប្រទេសកម្ពុជា។
កម្មវិធីឆ្នាំវប្បធម៌ និងទេសចរណ៍កម្ពុជា-ចិន នៅពេលនេះ គឺផ្តើមចេញពីជំនួបមួយនៅប្រទេសចិនកាលពីខែមករាឆ្នាំ២០១៩ ដោយក្រសួងវប្បធម៌ និងទេសចរណ៍កម្ពុជា-ចិនកំណត់ ថាឆ្នាំ២០១៩នេះ គឺជាឆ្នាំវប្បធម៌ និងទេសចរណ៍រវាងប្រទេសទាំងពីរ។
លោក តុប សុភ័ក អ្នកនាំពាក្យក្រសួងទេសចរណ៍ បានថ្លែងប្រាប់វិទ្យុបារាំងថា ការមកដល់របស់បេសកជនចិន ដែលសុទ្ធសឹងជាអ្នកវិនិយោគខាងទេចរណ៍ និងជាប្រធានក្រុមហ៊ុនទេសចរណ៍ចិន គឺក្នុងគោលបំណងធ្វើការផ្លាស់ប្តូរវប្បធម៌គ្នា ជាពិសេសជួយផ្សព្វផ្សាយសក្តានុពលទេសចរណ៍របស់កម្ពុជាទៅកាន់ប្រទេសទី៣ ហើយក៏ដូចជាការទាក់ទាញទេសចរចិនមកកម្ពុជាឲ្យកាន់តែច្រើនថែមទៀត។ ការផ្លាស់ប្តូរទស្សនកិច្ចសិក្សា និងការបណ្តុះបណ្តាលធមធានមនុស្សនៅក្នុងវិស័យវប្បធម៌ និងទេសចរណ៍ ក៏ត្រូវបានរាប់បញ្ចូលផងដែរ។ នេះបើតាមលោក តុប សុភ័ក។
តាមកម្មវិធី ការអបអរឆ្នាំនៃវប្បធម៌ និងទេសចរណ៍កម្ពុជា-ចិន ២០១៩ នេះ ត្រូវបានធ្វើឡើងនៅកោះពេជ្រ ដោយមានវេទិកាផ្គូរផ្គងដៃគូធុរកិច្ចទេសចរណ៍រវាងក្រុមហ៊ុនការីទេសចរណ៍ចិនឬ(អ្នកទិញ) ចំនួន៥០ក្រុមហ៊ុន ជាមួយក្រុមហ៊ុនការីទេសចរណ៍កម្ពុជាឬ(អ្នកលក់) ចំនួន៥០ក្រុមហ៊ុនទៀត។ ក្រៅពីនេះ ក៏មានកម្មវិធីសម្តែងសិល្បៈរួមគ្នា ខ្មែរ-ចិន នៅរសៀលថ្ងៃទី៥មិថុនានេះផងដែរ។
សូមរំលឹកថាកាលពីឆ្នាំ២០១៨កន្លងទៅ ប្រទេសកម្ពុជាទទួលបានទេសចរបរទេសចំនួន៦,២លាននាក់ កើន១០,៧% ក្នុងនោះ ទេសចរចិនឈរលំដាប់លេខ១ គឺជាង២លាននាក់។ ក្រសួងទេសចរណ៍រំពឹងទុកថាឆ្នាំ២០១៩នេះ កម្ពុជានឹងទទួលបានទេសចរចិនចំនួន២,៥លាននាក់ ហើយនឹងអាចកើនដល់៣លាននាក់ នៅឆ្នាំ២០២០ ខណៈគោលដៅនេះ ត្រូវរំពឹងថាកម្ពុជានឹងទទួលបានទេសចរអន្តរជាតិសរុបចំនួន៧លាននាក់ ហើយនៅឆ្នាំ២០២៥ នឹងបានចំនួន១១លាននាក់ និង១៥លាននាក់រំពឹងថានឹងទទួលបាននៅឆ្នាំ២០៣០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ