ឯកអគ្គរដ្ឋទូតចិន រំលឹកពីទំនាក់ទំនង ចិន-កម្ពុជា មុនទស្សនកិច្ច លោក ហ៊ុន សែន នៅប្រទេសចិននាសប្តាហ៍ក្រោយ
ខណៈដែលលោកនាយករដ្ឋមន្ត្រី ហ៊ុន សែន នឹងធ្វើទស្សនកិច្ចនៅប្រទេសចិនរយៈពេល៤ថ្ងៃ នៅសប្តាហ៍ក្រោយ ដែលជាទស្សនកិច្ចលើកដំបូងនៃបន្ទាប់ពីកម្ពុជាមានរដ្ឋាភិបាលអាណត្តិទី៦ ឯកអគ្គរដ្ឋទូតចិនថ្មីប្រចាំកម្ពុជា បានរៀបចំសន្និសីទកាសែតមួយកាលពីថ្ងៃពុធ។ ជាជំនួបមួយ ដែលនិយាយពីការបង្កើនចំណងមិត្តភាពរវាងចិន និងកម្ពុជា បន្ថែមទៀត ខណៈប្រទេសទាំងពីរមានសហប្រតិបត្តិការជាយុទ្ធសាស្ត្រនឹងគ្នាគ្រប់ជ្រុងជ្រោយទៅហើយនោះ។
ចុះផ្សាយនៅថ្ងៃ៖
ស្តាប់ - ០២:២២
នៅចំពោះមុខអ្នកសារព័ត៌មានខ្មែរក្នុងស្រុកមួយចំនួន និងអ្នកកាសែតចិន លោក វ៉ាង វិនធាន (Wang Wentian) ឯកអគ្គរដ្ឋទូតចិនប្រចាំកម្ពុជា ថ្លែងថាដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន នៅប្រទេសចិន ចាប់ពីថ្ងៃទី២០ ដល់ថ្ងៃទី២៣ ខែមករា នេះ នឹងមានជំនួបជាមួយមេដឹកនាំចិនសំខាន់៤រូប គឺលោកប្រធានាធិបតី ស៊ី ជិនពីង លោកនាយករដ្ឋមន្ត្រី លី ឃឺឈាង ប្រធានរដ្ឋសភាប្រជាជនចិន លី ជាំងស៊ូ និងលោក វ៉ាង យ៉ាង ប្រធានសភាពិគ្រោះយោបល់ចិន។
តាមរយៈប្រព័ន្ធផ្សព្វផ្សាយក្នុងស្រុក ឯកអគ្គរដ្ឋទូតចិន លោក វ៉ាង វិនធាន បានចាត់ទុកដំណើរទស្សនកិច្ចរបស់លោក ហ៊ុន សែន លើកនេះទៅកាន់ប្រទេសចិន ថាជាការចាប់ផ្តើមមួយដ៏ល្អ សម្រាប់ឆ្នាំ២០១៩ ក្រោយការបង្កើតរដ្ឋាភិបាលអាណត្តិទី។ លោក វ៉ាង ក៏បានសង្ឃឹមដែរថា តាមរយៈដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសចិន នឹងធ្វើឲ្យកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងចិន-កម្ពុជា កាន់តែស៊ីជម្រៅ និងល្អប្រសើរថែមទៀត ខណៈដំណើរទស្សនកិច្ចនេះ នឹងមានឯកសារជាច្រើន ដែលប្រទេសទាំងពីរ ត្រូវចុះកិច្ចព្រមព្រៀងនឹងគ្នា។
ឯកអគ្គរដ្ឋទូតចិន ក៏បានលើកឡើងពីចំណងមិត្តភាពរឹងមាំ រវាងមេដឹកនាំប្រទេសទាំងពីរជំនាន់មុន រហូតមកដល់មេដឹកនាំបច្ចុប្បន្ន ប្រៀបបានទៅនឹងផ្កាដែលមិនចេះស្រពោន និងរីកក្រោមមេឃស្រឡះ។ ការគោរពគ្នាទៅវិញទៅមក និងការគាំទ្រគ្នាទៅវិញទៅមក រវាងកម្ពុជា-ចិន ត្រូវលោក វ៉ាង វិនធាន ប្រាប់កាសែតថា ជាទំនាក់ទំនងមានលក្ខណៈពិសេស ដែលជាគំរូរវាងប្រទេស និងប្រទេស។
ក្រៅពីនេះចិនបានក្លាយជាប្រភពទេសចរណ៍ ដ៏ធំជាងគេបង្អស់របស់កម្ពុជា ដែលមានអ្នកទេសចរ ១,៦លាននាក់ មកកម្ពុជា នៅឆ្នាំ២០១។ ប្រទេសចិន បានក្លាយទៅជាដៃគូពាណិជ្ជកម្មធំបំផុតរបស់កម្ពុជា នៅឆ្នាំ២០១៨ ក្រុមហ៊ុនចិនបានដាក់ទុនវិនិយោគនៅកម្ពុជាសរុបជាង ២០ពាន់លានដុល្លារ ហើយក្រុមហ៊ុនចិន ៧០ភាគរយ ជាក្រុមហ៊ុនផលិតសម្លៀកបំពាក់ និងស្បែកជើង។ ក្រុមហ៊ុនទាំងនេះបានផ្តល់ការងារដល់ប្រជាពលរដ្ឋកម្ពុជារាប់សែននាក់។ នេះបើតាមការលើកឡើងរបស់ឯកអគ្គរដ្ឋទូតចិន ប្រាប់កាសែត។ ជាងនេះទៅទៀត ជំនួយរបស់ចិន និងកំចីឥណទាន សម្រាប់ការកសាងហេដ្ឋារចនាសម្ព័ន្ធ និងអភិវឌ្ឍន៍ប្រទេសកម្ពុជា ក៏ត្រូវបានបញ្ជាក់ផងដែរដោយតំណាងរដ្ឋាភិបាលចិនប្រចាំកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ