អង្គការអន្តរជាតិចំនួន៦ ព្រមានពីឧបសគ្គចំនួន២ទាក់ទងនឹងសិទ្ធិកុមារនៅកម្ពុជា
អង្គការអន្តរជាតិចំនួន៦ ដែលធ្វើការងារលើកកម្ពស់សិទ្ធិកុមារ បានចេញរបាយការណ៍ស្រាវជ្រាវមួយកាលពីថ្ងៃទី១៩ខែវិច្ឆិកា ដោយលើឡើងថា ដើម្បីឲ្យប្រទេសកម្ពុជាសម្រេចនូវគោលដៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ ហើយក្លាយជាប្រទេសមានចំណូលខ្ពស់នៅឆ្នាំ២០៥០នោះ គឺ កម្ពុជា ត្រូវដោះស្រាយឧបសគ្គធំៗចំនួន២ ទាក់ទងនឹងសិទ្ធិកុមារ។
ចុះផ្សាយនៅថ្ងៃ៖
ស្តាប់ - ០២:៤៤
ឧបសគ្គធំៗចំនួនដែលជាការគំរាមកំហែងទៅដល់សិទ្ធិកុមារនោះគឺការចែករំលែកមិនស្មើភាពនូងអត្ថប្រយោជន៍ដែលបានមកពីវឌ្ឍនភាពដែលសម្រេចបានក្នុងរយៈពេល៣០ឆ្នាំកន្លងទៅ។ រីឯឧបសគ្គទីចំបងមួយទៀតនោះគឺការសម្របខ្លួនទៅតាមបញ្ហាប្រឈមថ្មី និងកំពុងលេចឡើងក្នុងប្រទេសកម្ពុជា។ នេះបើយោងតាមរបាយការណ៍សិក្សាស្រាវជ្រាវដែលមានឈ្មោះថា «កូនសោអនាគតកម្ពុជា» ដែលត្រូវបានចងក្រងឡើងដោយអង្គការអន្តរជាតិចំនួន៦ គឺ អង្គការទស្សនៈពិភពលោក អង្គការភ្លែនអន្តរជាតិ អង្គការសម្ព័ន្ធមូលនិធិកុមារ អង្គការជួយសង្គ្រោះកុមារ អង្គការភូមិកុមារអេសអូអេសកម្ពុជា និងអង្គការ Terre De Hommes Netherlands ។
របាយការណ៍នេះកត់សម្គាល់ថា ថ្វីត្បិតតែកំណើនសេដ្ឋកិច្ចកម្ពុជាកើនឡើងរហូតក្នុងរយៈពេល ៣០ឆ្នាំកន្លងមកនេះ បានធ្វើឱ្យកុមារមួយចំនួនរស់នៅក្នុងគ្រួសារធូរធារ មានភាពស្រណុកស្រួល ឆាប់ធំធាត់ និងទទួលបានការអប់រំស្ដង់ដារខ្ពស់ និងទទួលបានសេវាសុខភាពល្អក៏ដោយ ប៉ុន្តែ កុមារកើតក្នុងគ្រួសារក្រីក្រ និងនៅទីជនបទដាច់ស្រយាល កុមារជនជាតិដើមភាគតិច និងកុមារពិការ គឺពួកគេពិបាកក្នុងការទទួលបានសិទ្ធិជាមូលដ្ឋានរបស់ខ្លួន។
ភាពខុសគ្នារវាងកុមារនៅទីជនបទ និងកុមារនៅទីក្រុង ត្រូវបានបង្ហាញនៅក្នុងរបាយការណ៍នេះថា នៅជនបទ កុមារត្រឹម ១១ភាគរយប៉ុណ្ណោះដែលទទួលបានការសិក្សាក្នុងកម្មវិធីអប់រំកុមារតូច ខណៈនៅទីក្រុងភ្នំពេញ មានកុការរហូតដល់៣៦ភាគរយទទួលបានការសិក្សាក្នុងកម្មវិធីអប់រំកុមារតូច។ ចំណែកកុមារក្រិសក្រិននៅទីជនបទមានចំនួន ៣៤ភាគរយ ខណៈ២៤ភាគរយនៅភ្នំពេញ។ លើសពីនេះទៀតកុមារជិត៣០ភាគរយរស់នៅខ្វះអនាម័យ និងខ្វះទឹកស្អាតប្រើប្រាស់ ព្រមទាំងបន្ទោរបង់ពាសវាលពាសកាល។
ក្រៅពីបញ្ហាទាំងនេះ ក៏នៅមានបញ្ហាប្រឈមថ្មីៗដែលកំពុងកើតមានលើកុមារផងដែរ ដូចជា ការកេងប្រវ័ញ្ចនានាបណ្ដាលមកពីការរីកចម្រើននៃបច្ចេកវិទ្យា ការកេងប្រវ័ញ្ចផ្លូវភេទ ពិសេសក្នុងវិស័យទេសចរណ៍ ការរស់នៅខ្វះភាពកក់ក្ដៅបណ្ដាលមកពីការចំណាកស្រុករបស់ឪពុកម្ដាយ ឬគ្រួសារ និងបញ្ហាប្រែប្រួលអាកាសធាតុទឹក និងខ្វះអនាម័យជាដើម។
ដើម្បីដោះស្រាយបញ្ហាទាំងអស់នោះ អង្គការអន្តរជាតិចំនួន៦ លើកឡើងថា ការវិនិយោគលើសិទ្ធិកុមារគឺការចាំបាច់បំផុត រួមមាន ការកែលម្អសេវាអប់រំកុមារតូច ការប្រយុទ្ធប្រឆាំងនឹងកង្វះលទ្ធភាពទទួលបានការអប់រំប្រកបដោយគុណភាព កាត់បន្ថយឱ្យបានច្រើនបំផុតនូវអត្រាកុមារខ្វះអាហាររូបត្ថម្ភ ការកែលម្អលទ្ធភាពទទួលបានសេវាទឹកស្អាតមូលដ្ឋាន និងអនាម័យ ព្រមទាំងបង្កើនការចូលរួមសម្រេចចិត្តរបស់កុមារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ