លោក ជា ស៊ីម ទទួលមរណភាពក្នុងជន្មាយុ៨៣ឆ្នាំ
លោក ជា ស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានទទួលមរណភាពហើយ នៅវេលាម៉ោង៣នឹង៤៥នាទីរសៀលថ្ងៃចន្ទ ទី០៨ខែមិថុនានេះ ក្នុងជន្មាយុ៨៣ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
លោក ជា ស៊ីម កើតនៅថ្ងៃទី១៥ ខែវិច្ឆិកា ឆ្នាំ១៩៣២ នៅស្រុករមាសហែក ខេត្តស្វាយរៀង។ នៅក្នុងអំឡុងឆ្នាំ១៩៤៧ រហូតដល់ឆ្នាំ១៩៥៤ លោក ជា ស៊ីម បានចាប់ផ្ដើមជីវិតនយោបាយដោយចូលរួមក្នុងចលនាតស៊ូខ្មែរឥស្សរៈ ដើម្បីឯករាជ្យមាតុភូមិ។ លុះក្រោយមក ចាប់ពីឆ្នាំ១៩៧០ ដល់ឆ្នាំ១៩៧៥ លោកបានចូលរួមក្នុងចលនាតស៊ូស្នេហាជាតិ និងក្រោយមកបានក្លាយជាប្រធានឃុំ និងប្រធានស្រុកជាបន្តបន្ទាប់។
នៅក្នុងរបបកម្ពុជាប្រជាធិបតេយ្យ លោក ជា ស៊ីម រួមជាមួយសមមិត្តផ្សេងទៀត បានតស៊ូ ដោយសម្ងាត់និងដោយចំហ ប្រឆាំងនឹងរបបប៉ុលពត ដោយមានការជួយជ្រោមជ្រែងពីប្រទេសវៀតណាម។ ក្រុមអ្នកតស៊ូមួយក្រុមនេះ បានប្រមូលផ្ដុំបង្កើតបានជារណសិរ្សសាមគ្គីសង្គ្រោះជាតិកម្ពុជា នៅថ្ងៃទី០២ ខែធ្នូ ឆ្នាំ១៩៧៨ នៅក្នុងស្រុកស្នួល ខេត្តក្រចេះ។ លោក ជា ស៊ីម គឺជាអនុប្រធាន នៃរណសិរ្សសាមគ្គីសង្គ្រោះជាតិកម្ពុជា។
គឺរណសិរ្សសាមគ្គីសង្គ្រោះជាតិកម្ពុជានេះហើយ ដែលបានវាយរំលំរបបកម្ពុជាប្រជាធិបតេយ្យនៅថ្ងៃទី០៧ ខែមករា ឆ្នាំ១៩៧៩។ បន្ទាប់ពីនោះមក លោក ជា ស៊ីម ត្រូវបានតែងតាំងឲ្យធ្វើជាប្រធានសភាប្រជាជននៃរបបសាធារណរដ្ឋប្រជាមានិតកម្ពុជា ពីឆ្នាំ១៩៨១ រហូតមានកិច្ចព្រមព្រៀងសន្តិភាពទីក្រុងប៉ារីស នៅឆ្នាំ១៩៩១។
នៅឆ្នាំ១៩៩១ដដែលនោះ លោក ជា ស៊ីម បានក្លាយជាប្រធានគណបក្សប្រជាជនកម្ពុជា។ គណបក្សប្រជាជនកម្ពុជា ដែលជាគណបក្សកាន់អំណាចយូរបំផុតនៅក្នុងប្រទេសកម្ពុជានាពេលបច្ចុប្បន្ននេះ។
លោក ជា ស៊ីម បានក្លាយជាប្រធានរដ្ឋសភា ចាប់ពីខែតុលាឆ្នាំ១៩៩៣ បន្ទាប់ពីប្រទេសកម្ពុជាបានបោះឆ្នោតជាសកល។ លោកបានបន្តតំណែងនេះរហូតដល់ឆ្នាំ១៩៩៨ និងក្រោយមកជាប្រធានព្រឹទ្ធសភា ចាប់តាំងពីខែកក្កដា ឆ្នាំ១៩៩៨ រហូតមកទល់បច្ចុប្បន្ន។
លោក ជា ស៊ីម បានទទួលងារជា សម្ដេច ពីព្រះបាទនរោត្តមសីហនុ នៅឆ្នាំ១៩៩៣ និងបានទទួលងារជា សម្ដេចអគ្គមហាធម្មពោធិសាល ពីព្រះបាទនរោត្តមសីហមុនី នៅឆ្នាំ២០០៧។ ផ្សេងពីនោះ លោក ជា ស៊ីម ក៏បានទទួលគ្រឿងឥស្សរិយយសជាច្រើនទៀត ពីព្រះមហាក្សត្រកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ