យុទ្ធនាការរំដោះចិញ្ចើមផ្លូវនៅភ្នំពេញ ចេញដំណើរមុនគេនៅខណ្ឌច្បារអំពៅ
នៅថ្ងៃសៅរ៍ ទី២២កក្កដា នេះ រដ្ឋបាលខណ្ឌច្បារអំពៅ បានចាប់ផ្ដើមយុទ្ធនាការទ្រង់ទ្រាយធំ ដើម្បីរៀបចំសណ្ដាប់ធ្នាប់នៅតាមដងផ្លូវជាតិលេខ១ ចាប់ពីចំណុចគល់ស្ពានព្រះមុនីវង្ស ដល់ភូមិក្ដីតាកុយ សង្កាត់វាលស្បូវ មានចម្ងាយផ្លូវ៤គីឡូម៉ែត្រ។ នៅក្នុងយុទ្ធនាការនេះ អាជ្ញាធរខណ្ឌបានចុះណែនាំដល់ប្រជាពលរដ្ឋកុំឲ្យរំលោភយកចិញ្ចើមផ្លូវនិងចំណីផ្លូវ មកធ្វើអាជីវកម្មតទៅទៀត។
ចុះផ្សាយនៅថ្ងៃ៖
យុទ្ធនាការរៀបចំសណ្ដាប់ធ្នាប់សាធារណៈរបស់អាជ្ញាធរខណ្ឌច្បារអំពៅ ផ្ដោតលើក្រុមគោលដៅសំខាន់២៖ ទី១ គឺរថយន្តឈ្នួល ដែលចតចាប់ម៉ូយនៅត្រង់ចំណុចគល់ស្ពាន។ និងទី២ គឺប្រជាពលរដ្ឋដែលលក់ដូររំលោភលើចិញ្ចើមផ្លូវនិងចំណីផ្លូវសាធារណៈ។
សម្រាប់រថយន្តឈ្នួល អាជ្ញាធរលែងអនុញ្ញាតឲ្យចតចាប់ម៉ូយអាណាធិបតេយ្យពាសវាលពាសកាលពេញផ្លូវទៀតហើយ។ រថយន្តឈ្នួលត្រូវតម្រូវឲ្យចូលទៅចតនៅចំណតរថយន្ត ឬបើពុំដូច្នេះទេ ម្ចាស់រថយន្តនឹងប្រឈមនឹងវិធានការរដ្ឋបាលរបស់អាជ្ញាធរខណ្ឌច្បារអំពៅ ដែលមានដូចជាការចុះកិច្ចសន្យានិងការផាកពិន័យជាដើម។
ដោយឡែក សម្រាប់ប្រជាពលរដ្ឋជាអាជីវករលក់ដូរនៅតាមបណ្ដោយផ្លូវជាតិលេខ១វិញ នៅថ្ងៃសៅរ៍នេះ អាជ្ញាធរបានចុះអប់រំណែនាំពួកគាត់កុំឲ្យរំលោភយកចិញ្ចើមផ្លូវនិងចំណីផ្លូវមកធ្វើអាជីវកម្ម ឬចតម៉ូតូរថយន្ត តទៅទៀត។ ដូចគ្នាទៅនឹងម្ចាស់រថយន្តឈ្នួលដែរ ប្រសិនបើអាជីវករមិនសហការធ្វើតាមការណែនាំរបស់អាជ្ញាធរទេ នោះអាជ្ញាធរនឹងមានវិធានការរដ្ឋបាលចំពោះពួកគាត់។
ជាការកត់សម្គាល់ នៅក្នុងយុទ្ធនាការទ្រង់ទ្រាយធំនេះ ប្រជាពលរដ្ឋដែលជាអាជីវករនៅតាមបណ្ដោយផ្លូវជាតិលេខ១បានសម្ដែងការស្វាគមន៍ និងគាំទ្រ។ ប៉ុន្តែពួកគាត់សុំឲ្យអាជ្ញាធរចាត់វិធានការឲ្យស្មើភាពគ្នាទាំងអស់ និងគួរទុកចន្លោះពេលណាមួយដើម្បីឲ្យពលរដ្ឋបានប្រកបអាជីវកម្មផង។ ឆ្លើយតបនឹងសំណូមពរនេះ តំណាងអាជ្ញាធរខណ្ឌច្បារអំពៅបានអះអាងថា អាជ្ញាធរនឹងដាក់កម្លាំងតាមដាននិងរៀបចំសណ្ដាប់ធ្នាប់សាធារណៈនេះជារៀងរាល់ថ្ងៃ។ ចំពោះការប្រកបអាជីវកម្មរបស់ពលរដ្ឋវិញ អាជ្ញាធរនៅតែទទូចឲ្យពួកគាត់គោរពចិញ្ចើមផ្លូវនិងចំណីផ្លូវ ដោយទុកឲ្យមានផ្លូវថ្មើរជើងសម្រាប់អ្នកដំណើរផង និងដើម្បីកាត់បន្ថយការកកស្ទះចរាចរណ៍ផង។
ជាការកត់សម្គាល់ យុទ្ធនាការរៀបចំសណ្ដាប់ធ្នាប់សាធារណៈ ដើម្បីរំដោះចិញ្ចើមផ្លូវនេះ មិនមែនទើបតែធ្វើឡើងជាលើកដំបូងទេ។ កន្លងមក រដ្ឋបាលរាជធានីភ្នំពេញបានធ្វើការងារនេះជាបន្តបន្ទាប់ហើយ ប៉ុន្តែមិនទាន់អាចសម្រេចបាន។ ថ្មីៗនេះទៀតសោត សាលារាជធានីភ្នំពេញ បានកំណត់យកកំណាត់ផ្លូវធំៗចំនួន១១ជាអាទិភាព ដើម្បីរៀបចំសណ្ដាប់ធ្នាប់សាធារណៈផងដែរ។ អាជ្ញាធរក្រុងភ្នំពេញទទួលស្គាល់ថា ការរៀបចំសណ្ដាប់ធ្នាប់តាមផ្លូវនេះគឺជាការលំបាក ប៉ុន្តែអាជ្ញាធរប្ដេជ្ញាថា នឹងធ្វើការងារនេះឲ្យទាល់តែបានសម្រេច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ