CCHR៖ សិទ្ធិរបស់ជនជាប់ចោទ មិនត្រូវបានគោរពពេញលេញនៅក្នុងដំណាក់កាលជំនុំជម្រះ នៅសាលាឧទ្ធរណ៍
មជ្ឈមណ្ឌលសិទ្ធិមនុស្សកម្ពុជា (CCHR) កាលពីថ្ងៃទី ១៩ មិថុនា បានចេញផ្សាយរបាយការណ៍ប្រចាំឆ្នាំ បង្ហាញពី ការសង្កេតការណ៍សវនាការរបស់ខ្លួន នៅសាលាឧទ្ធរណ៍។ របាយការណ៍នេះ រកឃើញថា ការសន្មតទុកជាមុនថាគ្មានទោស សិទ្ធិទទួលបានសេចក្ដីសម្រេចមានសម្អាងហេតុ និងសិទ្ធិទទួលបានមេធាវីការពារជនជាប់ចោទ មិនត្រូវបានគោរពពេញលេញនោះទេ។ អ្នកនាំពាក្យសាលាឧទ្ធរណ៍ ស្វាគមន៍ការរិះគន់ដែលបានលើកឡើងនៅក្នុងរបាយការណ៍នេះ ក៏ប៉ុន្តែស្នើឱ្យCCHR សិក្សាពីលំហូរនៃនីតិវិធីជំនុំជម្រះនៅក្នុងសាលាឧទ្ធរណ៍ឱ្យបានច្បាស់លាស់ មុននឹងចេញផ្សាយរបាយការណ៍លើកក្រោយទៀត។
ចុះផ្សាយនៅថ្ងៃ៖
ស្តាប់ - ០២:១៧
នៅក្នុងរបាយការណ៍ប្រចាំឆ្នាំរបស់មជ្ឈមណ្ឌលសិទ្ធិមនុស្សកម្ពុជា (CCHR) ដែលចេញផ្សាយនៅដើមសប្តាហ៍នេះ បានបង្ហាញថា សិទ្ធិទទួលបានការជំនុំជម្រះសំខាន់ៗមួយចំនួន ត្រូវបានគោរពនៅដំណាក់កាល សាលាឧទ្ធរណ៍ ដូចជា ការការពារពីការវិនិច្ឆ័យទោសពីរដងចំពោះបទល្មើសដដែល មូលហេតុនៃការចោទប្រកាន់ សិទ្ធិមានពេលវេលា និងមធ្យោបាយគ្រប់គ្រាន់ ដើម្បីរៀបចំការពារក្តី ព្រមទាំងសិទ្ធិទទួលបានការប្រកាសសេចក្តីសម្រេចជាសាធារណៈជាដើម។
ផ្អែកតាមរបាយការណ៍ដដែល ខណៈដែលមានភាពប្រសើរឡើងមួយចំនួន ចំពោះការគោរពសិទ្ធិទទួលបានការជំនុំជម្រះដោយយុត្តិធម៌នៅសាលាឧទ្ធរណ៍ ក៏នៅមានសិទ្ធិមនុស្សជាមូលដ្ឋានមួយចំនួនផ្សេងទៀត មិនទាន់ត្រូវបានគោរពនៅឡើយ ពិសេស សិទ្ធិរបស់ជនជាប់ចោទជាអនីតិជន ដែលគួរត្រូវបានផ្តល់ការការពារជាពិសេសតាមច្បាប់ជាតិ និងសិទ្ធិមនុស្សអន្តរជាតិ។
ក្រៅតែពីការវាយតម្លៃទៅលើការលើកឡើងនៅក្នុងរបាយការណ៍នេះ CCHR បានជម្រុញដល់អាជ្ញាធរពាក់ព័ន្ធចាត់វិធានការជាបន្ទាន់ និងសមស្របដើម្បីធានាថា សិទ្ធិទទួលបានការជំនុំជម្រះដោយយុត្តិធម៌ និងជាពិសេសការសន្មតទុកជាមុនថាគ្មានទោស សិទ្ធិទទួលបានសេចក្តីសម្រេចមានសម្អាងហេតុ និងការការពារឯកជនភាពរបស់អនីតិជន ត្រូវបានការពារយ៉ាងដិតដល់។
លោក ទូច ថារិទ្ធ អ្នកនាំពាក្យសាលាឧទ្ធរណ៍ បានស្វាគមន៍ចំពោះការលើកឡើងក្នុងរបាយការណ៍នេះ ដើម្បីកែលម្អនីតិវិធីជំនុំជម្រះនៅក្នុងសាលាឧទ្ធរណ៍ឱ្យកាន់តែប្រសើរជាងមុន។ យ៉ាងណាក៏ដោយ អ្នកនាំពាក្យសាលាឧទ្ធរណ៍រូបនេះ ក៏ស្នើឱ្យក្រុមការងារដែលសង្កេតការណ៍លើបញ្ហានេះ សិក្សាឱ្យបានច្បាស់លាស់មុននឹងធ្វើការចេញផ្សាយរបាយការណ៍លើកក្រោយទៀត។ លោក ទូច ថារិទ្ធ លើកឡើងថា ក្រុមការងារមជ្ឈមណ្ឌលសិទ្ធិមនុស្សកម្ពុជា ដែលសង្កេតការណ៍សវនាការនៅសាលាឧទ្ធរណ៍នេះ មិនទាន់យល់ច្បាស់ពីនីតិវិធីជំនុំជម្រះនៃសាលាឧទ្ធរណ៍នៅឡើយទេ។
សូមជម្រាបជូនថា របាយការណ៍ប្រចាំឆ្នាំពីការសង្កេតការណ៍សវនាការនៅសាលាឧទ្ធរណ៍ របស់មជ្ឈមណ្ឌលសិទ្ធិមនុស្សកម្ពុជានេះ បានធ្វើឡើងចាប់ពីថ្ងៃទី០១ ខែវិច្ឆិកា ឆ្នាំ២០១៦ ដល់ថ្ងៃទី៣១ ខែតុលា ឆ្នាំ២០១៧ ដោយសង្កេតការណ៍សវនាការលើសំណុំរឿងព្រហ្មទណ្ឌចំនួន ៣៤០ករណី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ