គេហទំព័រ Cambodia Daily ត្រូវបានបិទ តែ Facebook/Twitter ដំណើរការធម្មតា
៥ខែមកហើយដែលការិយាល័យរបស់កាសែតជាភាសាអង់គ្លេស The Cambodia Daily ត្រូវបានបិទ ដោយសារតែមិនបានបំពេញកាតព្វកិច្ចបង់ពន្ធជូនរដ្ឋ តាមច្បាប់របស់ប្រទេសកម្ពុជា។ ក្រៅតែពីបានបិទការិយាល័យហើយ សារព័ត៌មានដែលបានដំណើរការ ២៥ឆ្នាំនៅកម្ពុជានេះ ក៏ត្រូវបានក្រសួងប្រៃសណីយ៍ និងទូរគមនាគមន៍ បិទគេហទំព័រ (website) មិនឲ្យមហាជនបើកឃើញផងដែរ។ យ៉ាងណាក៏ដោយទំព័រហ្វេសប៊ុក (Facebook) និងធ្វេតធ័រ (Twitter) នៅតែបង្ហាញខ្លួនលើបណ្តាញសង្គមដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ក្រសួងប្រៃសណីយ៍ និងទូរគមនាគមន៍ បានបញ្ជាក់ប្រាប់វិទ្យុបារាំងនៅថ្ងៃនេះថា គេហទំព័ររបស់កាសែត The Cambodia Daily ត្រូវបានបិទមិនឲ្យបើកដំណើរការតាំងពីខែកញ្ញា ឆ្នាំ ២០១៧ បន្ទាប់ពីការិយាល័យរបស់កាសែតនេះ ត្រូវបានប្រកាសបិទទ្វារ កាលពីថ្ងៃទី ៤ខែកញ្ញា ឆ្នាំ ២០១៧ បន្ទាប់ពីអ្នកគ្រប់គ្រងកាសែតនេះ បដិសេធមិនបង់ពន្ធ ដែលមានទឹកប្រាក់ជាង ៦លានដុល្លារ ។
តាមលិខិតរបស់ក្រសួងប្រៃសណីយ៍ និងទូរគមនាគមន៍ ដែលបានផ្ញើទៅប្រធានក្រុមហ៊ុនផ្តល់សេវាអ៊ីនធឺណេតទាំងអស់ ក្នុងប្រទេសកម្ពុជា ចុះថ្ងៃទី ២៨ខែកញ្ញា ឆ្នាំ ២០១៧ បានស្នើសុំកិច្ចសហប្រតិបត្តិការ ក្នុងការចាត់វិធានការបិទ IP Address របស់ក្រុមហ៊ុន Bernard Krisher Jimushi Co.,Ltd (កាសែត The Cambodia Daily) ដោយយោងតាមលិខិតរបស់អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ ចុះថ្ងៃទី ៥កញ្ញា ឆ្នាំ ២០១៧។
ក្នុងនោះ ក្រសួងប្រៃសណីយ៍ បានសម្រេចឲ្យក្រុមហ៊ុនផ្តល់សេវាអ៊ីនធឺណេត ត្រូវរាំងខ្ទប់ (Block) នូវគេហទំព័រ www.cambodiadaily.com និងស្នើឲ្យមានការប្រឹងប្រែងឲ្យអស់លទ្ធភាពបច្ចេកទេស ដើម្បីបញ្ឈប់ដំណើរការគណនី Facebook និង Twitter “Without Fear or Favor” របស់កាសែត Cambodia Daily។ យ៉ាងណាមិញ គិតមកដល់ថ្ងៃទី ៥កុម្ភៈនេះ ទំព័របណ្តាញសង្គមរបស់កាសែត the Cambodia Daily នៅតែដំណើរការនៅឡើយ ដោយមានការផ្សព្វផ្សាយពីព័ត៌មានសង្គម នយោបាយជាភាសាខ្មែរ ដោយភ្ជាប់ជាមួយវីដេអូ។
អ្នកនាំពាក្យក្រសួងប្រៃសណីយ៍ បានបញ្ជាក់យ៉ាងខ្លីថា គេនឹងពិនិត្យបន្តពីទំព័របណ្តាញសង្គមរបស់កាសែតនេះ ហើយនឹងចាត់វិធានការតាមក្រោយ។ ចំណែកអ្នកនាំពាក្យក្រសួងព័ត៌មានវិញ សុំមិនធ្វើអត្ថាធិប្បាយពីការបិទគេហទំព័រ ឬ បណ្តាញសង្គមរបស់កាសែត The Cambodia Daily នោះទេ ដោយលើកឡើងថា កាសែតនេះ លែងមានទំនាក់ទំនងក្រោមឆ័ត្ររបស់ក្រសួង ហើយក្រសួងព័ត៌មាន ក៏ពុំបានយកចិត្តទុកដាក់តាមដានពីចំណាត់ការណាមួយរបស់កាសែតនេះ តាំងពីបានបិទការិយាល័យមក។
សូមរម្លឹកជូនថា កាសែត The Cambodia Daily ដែលត្រូវបានគេស្គាល់ថា ជាកាសែតវិជ្ជាជីវៈមួយដែលមានការរិះគន់រដ្ឋាភិបាលឥតសំចៃ ត្រូវបង្ខំចិត្តបិទទ្វារ ដោយពុំព្រមបង់ប្រាក់ ៦លានដុល្លារបង់ពន្ធ ដល់ក្រសួងហិរញ្ញវត្ថុ ដែលបានបញ្ជាក់ថា កាសែតនេះ បានជំពាក់ ១០ឆ្នាំមកហើយ។ ចៅហ្វាយកាសែត The Cambodia Daily ធ្លាប់បានអះអាងថា ចំណាត់ការរបស់រដ្ឋាភិបាលនេះ ជាលេសនយោបាយ ដោយសារកាសែតរបស់ខ្លួន បានដើរតួនាទីត្រឹមត្រូវ មិនបានលំអៀងទៅរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ