កងទ័ពមួកខៀវកម្ពុជា ជិត២០០នាក់ត្រៀមចេញទៅលីបង់នៅចុងខែមករា
បើគ្មានអ្វីប្រែប្រួល កងទ័ពមួកខៀវកម្ពុជា១៨៤នាក់ នឹងទៅបំពេញបេសកម្មការងារនៅប្រទេសលីបង់នៅចុងខែមករានេះ។ នេះជាបេសកម្មការងារលើកទី៧នៅប្រទេសលីបង់ ដែលកម្លាំងមួកខៀវកម្ពុជាបំពេញការងារទាក់ទងការបោសសម្អាតមីន និងបោះបង្គោលព្រំដែនជាដើម។
ចុះផ្សាយនៅថ្ងៃ៖
ស្តាប់ - ០១:៥៨
អ្នកនាំពាក្យក្រសួងការពារជាតិអះអាងនៅថ្ងៃព្រហស្បតិ៍្តនេះថា កងទ័ពមួកខៀវកម្ពុជា១៨៤នាក់ដែលគ្រោងចេញទៅបំពេញបេសកកម្មនៅប្រទេសលីបង់នាចុងខែមករា ជាកម្លាំងប្ដូរវេនជាមួយកងកម្លាំងចាស់ដែលបញ្ជូនទៅលីបង់ កាលពីឆ្នាំទៅមិញ។ លីបង់ជាប្រទេសមួយដែល គ្មានសង្គ្រាមនិងក្រុមឧទ្ទាម ដែលផ្តល់ភាពងាយស្រួលក្នុងការបំពេញការងារ។ ហើយនេះក៏ជាលើកទី៧ ដែលកម្លាំងមួកខៀវកម្ពុជាឈរជើងនៅលីបង់ ដោយរាប់ចាប់តាំងពីឆ្នាំ២០១០។
សូមបញ្ជាក់ថា ការបញ្ជូនកម្លាំងមួកខៀវកម្ពុជាទៅប្រទេសលីបង់នេះ ជាផ្នែកមួយនៃបេសកកម្មថែរក្សាសន្តិភាពជាមួយអង្គការសហប្រជាជាតិ តាមរយៈការចុះកិច្ចព្រមព្រៀងរួមគ្នាតាំងតែពីឆ្នាំ២០០៦។ បេសកកម្មលើកនេះផ្ដោតទៅលើការបោសសម្អាតមីន បោះបង់បង្គោលព្រំដែន និងសាងសង់សំណង់ដេក សំណង់បញ្ឈរជាដើម។ សម្រាប់កងទ័ពមួកខៀវកម្ពុជា១៨៤នាក់ដែលត្រៀមឡើងយន្តហោះទៅប្រទេសលីបង់នេះ ពួកគេបានឆ្លង់កាត់ការបណ្ដុះបណ្ដាលទៅតាមក្របខណ្ឌដែលអង្គការសហប្រជាជាតិបានកំណត់។
បើទោះជាបេសកកម្មធ្វើឡើងក្នុងនាមមនុស្សធម៌ក៏ដោយ កម្លាំងមួកខៀវកម្ពុជាក៏ប្រឈមនឹងគ្រោះថ្នាក់ផ្សេងៗដែរ ខណៈកម្លាំងមួកខៀវជិត១០នាក់ត្រូវបានស្លាប់ក្រោមហេតុផលផ្សេងៗ។ នេះក៏ដោយសារតែប្រទេសដែលកម្លាំងមួកខៀវកម្ពុជាបានឈរជើងជាប្រទេសកំពុងមានទំនាស់ ឬសង្គ្រាមនឹងប្រឈមជាមួយក្រុមឧទ្ទាម ឬការវាយប្រហារដោយពួកឥស្លាមជ្រុលនិយមជាដើម។ ជាក់ស្ដែងប្រទេសអាហ្វ្រិកកណ្ដាលជាប្រទេសមួយដែលអ្នកនាំពាក្យក្រសួងការពារជាតិខ្មែរមើលឃើញថា កំពុងហែកហួរដោយសង្គ្រាម។
គួររំឭកថា ចាប់តាំងពីឆ្នាំ២០០៦ កម្ពុជាបានបញ្ជូនកម្លាំងមួកខៀវរបស់ខ្លួន ទៅចូលរួមបេសសកកម្មរបស់អង្គការសហប្រជាជាតិសរុប ៥ ៧៨៣នាក់ ដោយក្នុងនោះ មានស្ត្រី២៧៧នាក់ ខណៈបច្ចុប្បន្នកម្លាំងប្រមាណ១០០០នាក់កំពុងបំពេញបេសសកម្មនៅប្រទេសស៊ូដង់ ស៊ូដងខាងត្បូង អាហ្វ្រិកកណ្ដាល លីបង់ និងម៉ាលី។ រដ្ឋាភិបាលកម្ពុជាចាត់ទុកការបញ្ជួនកម្លាំងមួកខៀវទៅបំពេញបេសសកម្មការងារក្រោមកិច្ចសហការជាមួយអង្គការសហប្រជាជាតិ ជាមោទនភាពមួយរបស់កម្ពុជាលើឆាកអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ