រដ្ឋាភិបាល៖កម្ពុជាមិនពឹងតែលើការនាំចេញផលិតផលកាត់ដេរនិងកសិកម្មនោះទេ
ការនាំចេញផលិតផលកាត់ដេរសម្លៀកបំពាក់ និងស្បែកជើងរបស់កម្ពុជា បានធ្លាក់ចុះជាបន្តបន្ទាប់តាំងពីឆ្នាំ២០១៣ដល់ឆ្នាំ២០១៦ ប៉ុន្តែការនាំចេញទំនិញមិនមែនជាវាយនភណ្ឌបានកើនឡើងជាបន្តបន្ទាប់។នេះបើតាមរបាយការណ៍របស់ក្រសួងសេដ្ឋកិច្ចដែលលើកឡើងនៅក្នុងកិច្ចប្រជុំគណៈរដ្ឋមន្រ្តីនៅថ្ងៃសុក្រនេះ។ ប៉ុន្តែអ្នកសេដ្ឋកិច្ចនៅតែចាត់ទុកថា វិស័យកាត់ដេរនៅតែសំខាន់ខ្លាំងសម្រាប់ចំណូលរបស់រដ្ឋាភិបាលកម្ពុជា។
ចុះផ្សាយនៅថ្ងៃ៖
ស្តាប់ - ០២:១៤
យោងតាមរបាយការណ៍របស់ក្រសួងសេដ្ឋកិច្ចបានបង្ហាញថាការនាំចេញសម្លៀកបំពាក់និងស្បែកជើងធៀបនឹងការនាំចេញសរុបមានការធ្លាក់ចុះពី៧៧,១%នៅឆ្នាំ២០១៣ មកនៅត្រឹម៧៣,១%នៅឆ្នាំ២០១៦ ខណៈដែលការនាំចេញទំនិញកម្មន្តសាលមិនមែនវាយនភណ្ឌ មានការកើនឡើងពី១៦,៦%នៅឆ្នាំ២០១៣ដល់២២,៣%នៅឆ្នាំ២០១៦។ ជាមួយគ្នានោះ ការនាំចេញផលិតផលកែច្នៃ មានប្រមាណ៤,៦% នៃការនាំចេញសរុបនៅឆ្នាំ២០១៦។
កំណើននៃការនាំចេញទំនិញកម្មន្តសាលជំនួសឲ្យវិស័យកាត់ដេរនេះ ត្រូវបានរដ្ឋាភិបាលកម្ពុជា ចាត់ទុកថា កម្ពុជាមិនពឹងផ្អែកតែទៅលើការនាំចេញសម្លៀកបំពាក់ ស្បែកជើង និងផលិតផលកសិកម្មនោះទេ។
បន្ថែមពីលើនេះ អ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន សរសេរលើហ្វេសប៊ុករបស់លោកដោយគូសបញ្ជាក់ថា កម្ពុជាមាន “សមត្ថភាព ក្នុងកិច្ចការពារ ឯករាជ្យ និង អាធិបតេយ្យជាតិ តាមរយៈ ខ្លួនទីពឹងខ្លួន នៃចំណូល ឯករាជ្យ ពីផលិតផល កាត់ដេរ និងនាំចេញ”។
ការដែលរដ្ឋាភិបាលកម្ពុជាបង្ហាញពីកំណើននាំចេញទំនិញកម្មន្តសាលមិនមែនវាយនភណ្ឌ ជំនួសឲ្យការធ្លាក់ចុះនៃការនាំចេញសម្លៀកបំពាក់និងស្បែកជើងនេះគឺស្របពេលដែលសហភាពអឺរ៉ុបព្រមានព្យូរការអនុគ្រោះពន្ធនាំចេញសំលៀកបំពាក់ពីកម្ពុជាដោយសារតែការរំលាយគណបក្សប្រឆាំង។
សម្រាប់បណ្ឌិតសេដ្ឋកិច្ច លោក ចាន់ សុផល កម្ពុជានៅត្រូវការចាំបាច់ពឹងលើការនាំចេញផលិតផលសម្លៀកបំពាក់និងស្បែកជើង បើទោះបីជាវិស័យកម្មន្តសាលមានកំណើនក៏ដោយ។
លោក ចាន់ សុផល ពន្យល់ថាទំនិញកម្មន្តសាលនេះក៏រាប់ចូលក្នុងវិស័យរោងចក្រដែរប៉ុន្តែកម្មន្តសាលនេះមានដូចជារោងចក្រផលិតកង់ និងគ្រឿងបន្លាស់រថយន្ត។ ប៉ុន្តែលោកថាកម្ពុជាមានបញ្ហាថ្លៃអគ្គីសនីខ្ពស់ដែលមិនអាចឲ្យរោងចក្រកម្មន្តសាលដំណើរការបានស្រួល។
បើតាមបណ្ឌិតសេដ្ឋកិច្ចរូបនេះ វិស័យកាត់ដេរនៅតែជាប្រភពចំណូលដ៏សំខាន់របស់រដ្ឋាភិបាលកម្ពុជានិងបានស្រូបកម្លាំងពលកម្មច្រើនជាងគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ