ព្រំដែនកម្ពុជា-ឡាវ៖ភាគីទាំងពីរមិនទាន់ឯកភាពគ្នាខាងបច្ចេកទេសស្នើទៅបារាំង
ភាគីកម្ពុជាកំពុងតែធ្វើបែបបទបច្ចេកទេសដាក់ទៅជជែកគ្នាជាមួយភាគីឡាវសិន មុននឹងដាក់ទៅអ្នកជំនាញការផែនទីបារាំង ដើម្បីជួយបម្លែងផែនទីព្រំដែន ពីខ្នាត១លើ១រយពាន់ទៅជា១លើ៥០ពាន់វិញ។នេះជាការបញ្ជាក់របស់ប្រធានគណកម្មការព្រំដែនកម្ពុជានៅថ្ងៃចន្ទនេះ។ គួររំលឹកថា នាយករដ្ឋមន្ដ្រីកម្ពុជានិងឡាវ បានស្នើទៅរដ្ឋាភិបាលបារាំង ដើម្បីសុំផែនទីពីបារាំង យកមកដោះស្រាយបញ្ហាព្រំដែនកម្ពុជា-ឡាវ ដែលនៅសេសសល់។
ចុះផ្សាយនៅថ្ងៃ៖
ស្តាប់ - ០២:២៧
អត្ថបទដោយ៖ អ៊ឹង ប៊ុនថន
លោក វ៉ា គឹមហុង ប្រធានគណកម្មការកិច្ចការព្រំដែនកម្ពុជា បានឲ្យវិទ្យុបារាំងដឹងនៅថ្ងៃទី២៥ខែធ្នូនេះថា មុននឹងអ្នកជំនាញការផែនទីបារាំងមកជួយ គឺទាល់តែកម្ពុជា និងឡាវ ឯកភាពគ្នាសិនថា ឲ្យបារាំងមកជួយត្រង់ចំណុចណា ខណៈព្រំដែនប្រទេសទាំងពីរនេះបានបោះបង្គោលជាង៨០%ទៅហើយនោះ។ លោកថាបញ្ហាសេសសល់គឺទាល់តែភាគីទាំងពីរឯកភាពគ្នាសិន នោះទើបអ្នកជំនាញការផែនទីបារាំងអាចមកជួយទៅតាមសំណើរបស់កម្ពុជានិងឡាវ។ ជាសំណើសុំឲ្យអ្នកជំនាញផែនទីបារាំង ឲ្យជួយផ្ទេរផែនទី ពីខ្នាត១លើ១០០ពាន់ ទៅជាខ្នាត ១លើ៥០ពាន់វិញ ដើម្បីបញ្ចប់បញ្ហាព្រំដែន ដែលនៅសេសសល់។
ទាក់ទងបញ្ហានេះ ប្រមុខរដ្ឋាភិបាលកម្ពុជាធ្លាប់បានថ្លែងថ្ងៃទី២៧ ខែតុលាថាបារាំងបានយល់ព្រមថានឹងបញ្ជួនអ្នកជំនាញការផែនទីរបស់ខ្លួនមកកម្ពុជា។ ប៉ុន្តែបើតាម លោក វ៉ា គឹមហុង បញ្ហាដែលសែលសល់គឺកម្ពុជានិងឡាវមិនទាន់ឯកភាពគ្នានៅឡើយ ដែលបញ្ហានេះហើយទើបបារាំងមិនទាន់បញ្ជូនអ្នកជំនាញការផែនទីមកនោះ។
គួររំលឹកថា នាយករដ្ឋមន្ដ្រីកម្ពុជា លោក ហ៊ុន សែន និងនាយករដ្ឋមន្ដ្រីឡាវ លោក ថង លូនស៊ីស៊ូលីត បានជួបប្រជុំគ្នា រាជធានីភ្នំពេញ កាលពីដើមខែកញ្ញាគឺជាការពិភាក្សាលើកទី២ បន្ទាប់ពីមេដឹកនាំទាំងពីរ បានជួបគ្នានៅទីក្រុងវៀងច័ន្ទ កាលពីថ្ងៃទី១២សីហាឆ្នាំ២០១៧ ខណៈមានការប្រឈមមុខដាក់គ្នា រវាងកងកម្លាំងប្រដាប់អាវុធនៅតំបន់ជាប់ព្រំដែន។
ក្នុងជំនួបនោះ ប្រមុខរដ្ឋាភិបាលនៃប្រទេសទាំងពីរបានឯកភាពគ្នាស្នើសុំផែនទីព្រំដែនពីរដ្ឋាភិបាលបារាំងនិងសុំឲ្យអ្នកជំនាញការប្រទេសនៃអតីតអាណានិគមនៅតំបន់ឥណ្ឌូចិននេះជួយផ្ទេរផែនទី ពីខ្នាត១លើ១០០ពាន់ ទៅជាខ្នាត ១លើ៥០ពាន់វិញ ។
បើតាមមន្ដ្រីព្រំដែន គឺកម្ពុជា និងឡាវ មានព្រំដែនជាប់គ្នាប្រវែង ៥៤០គីឡូម៉ែត្រ ដោយត្រូវបោះបង្គោលព្រំដែនប្រមាណ ១៤៥បង្គោល។ ប៉ុន្តែមកទល់ពេលនេះ ភាគីទាំងពីរបានបោះរួចចំនួន១២១បង្គោល ស្មើនឹង ៨៣ភាគរយ នៅសល់ប្រមាណ ២៤បង្គោលទៀត ខណៈចំណុចនៅសេសសល់នោះ គឺស្ថិតនៅខេត្តព្រះវិហារ និងខេត្តស្ទឹងត្រែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ