កម្ពុជាជាប់ឆ្នោតជាសមាជិកក្រុមប្រឹក្សាសេដ្ឋកិច្ច និងសង្គមរបស់អង្គការសហប្រជាជាតិ
ប្រទេសកម្ពុជាត្រូវបានជាប់សមាជិកក្រុមប្រឹក្សាសេដ្ឋកិច្ច និងសង្គម របស់អង្គការសហប្រជាជាតិសម្រាប់អាណត្តិមួយឆ្នាំ២០១៩ខាងមុខ។ បើតាមក្រសួងការបរទេសកម្ពុជា ការជាប់ជាសមាជិកនេះមានសំឡេងគាំទ្រ ចំនួន១៨៣ លើ១៨៨ ក្នុងការបោះឆ្នោតនៅថ្ងៃទី១៣ ខែមិថុនា ឆ្នាំ២០១៨ នៅសាលមហាសន្និបាត នៃទីស្នាក់ការអង្គការសហប្រជាជាតិនាទីក្រុងញ៉ូយក។
ចុះផ្សាយនៅថ្ងៃ៖
ស្តាប់ - ០២:០៦
ក្រសួងការបរទេសកម្ពុជាបានចាត់ទុកថា នេះគឺជាជោគជ័យថ្មីមួយទៀតរបស់កម្ពុជា ក្នុងការលើកស្ទួយកិត្តិយស និងកិត្យានុភាពជាតិនៅលើឆាកអន្តរជាតិ។
ក្នុងឋានៈជាសមាជិកក្រុមប្រឹក្សាសេដ្ឋកិច្ចនិងសង្គមរបស់អង្គការសហប្រជាជាតិ រដ្ឋាភិបាលកម្ពុជាអះអាងថានឹងខិតខំជំរុញស្តង់ដាររស់នៅឲ្យបានខ្ពស់ ការបង្កើតការងារឲ្យបានពេញលេញ និងជំរុញលក្ខខណ្ឌនៃការរីកចំរើនសេដ្ឋកិច្ចសង្គម និងការអភិវឌ្ឍ។
លើសពីនេះក្នុងសេចក្តីប្រកាសព័ត៌មានថ្ងៃ១៣មិថុនា កម្ពុជាប្តេជ្ញាចូលរួមជំរុញកិច្ចសហប្រតិបត្តិការវប្បធម៌អន្តរជាតិ និងវិស័យអប់រំ ព្រមទាំងជំរុញដំណោះស្រាយបញ្ហាសេដ្ឋកិច្ចអន្តរជាតិ និងសុខាភិបាលសង្គម។ ព្រមជាមួយគ្នានេះ កម្ពុជា ដែលកំពុងត្រូវបានសហគមន៍អន្តរជាតិមួយចំនួន និងអតីតបក្សប្រឆាំងចាត់ទុកថា កំពុងដើរចាកពីគន្លងលទ្ធិប្រជាធិបតេយ្យនោះ ក៏អះអាងថាខ្លួនចូលរួមជំរុញការគោរពសិទ្ធិមនុស្សជាសកល និងសេរីភាពជាមូលដ្ឋានដែរ។
អ្នកនាំពាក្យក្រសួងការបរទេសកម្ពុជា លោក ជុំ សុន្ទរី បានបញ្ជាក់បន្ថែមថា កម្ពុជាបានប្រើពេល៣ឆ្នាំដើម្បីបញ្ចុះបញ្ចូលឲ្យប្រទេសនានាគាំទ្រកម្ពុជាឲ្យក្លាយជាសមាជិកក្រុមប្រឹក្សាសេដ្ឋកិច្ច និងសង្គមនេះ ដែលត្រូវការសំឡេង២ភាគ៣។
សូមរំលឹកថា ប្រទេសកម្ពុជាទើបត្រូវបានជ្រើសតាំងឲ្យធ្វើជាអនុប្រធាននៃសម័យប្រជុំលើទី៧៣ របស់មហាសន្និបាតអង្គការសហប្រជាជាតិ កាលពីថ្ងៃទី៥ ខែ មិថុនា ឆ្នាំ ២០១៨។ ជាការជ្រើសតាំងសម្រាប់អាណត្តិពីខែកញ្ញា ២០១៨ ដល់ខែកញ្ញា ២០១៩ រួមជាមួយប្រទេសចំនួន១៥ ផ្សេងទៀត និងប្រទេសសមាជិកអចិន្ត្រៃយ៍ទាំង៥ នៃក្រុមប្រឹក្សាសន្តិសុខអង្គការសហប្រជាជាតិ។
លោក អ៊ុច បូររិទ្ធ រដ្ឋលេខាធិការក្រសួងការបរទេសកម្ពុជា បានថ្លែងក្នុងសន្និសីទព័ត៌មានថ្ងៃទី៨មិថុនានេះថា ការផ្តល់ទំនុកចិត្តពីសមាជិកអង្គការសហប្រជាជាតិចំពោះតំណែងអនុប្រធានមហាសន្និបាត អាណត្តិថ្មីនេះ គឺជាការឆ្លើយតបយ៉ាងសមស្របចំពោះលោក សម រង្ស៊ី ដែលធ្លាប់បានអំពាវនាវឲ្យអន្តរជាតិព្យួរអាសនៈកម្ពុជានៅអង្គការពិភពលោកមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ