លោក ហ៊ុន សែន៖ កម្ពុជានៅតែចង់ធ្វើជាមិត្តល្អរបស់សហរដ្ឋអាមេរិក
លោកនាយករដ្ឋមន្ត្រី ហ៊ុន សែន កាលពីថ្ងៃពុធម្សិលមិញ បានស្នើដល់ប្រធានសមាគមកម្ពុជា-ជប៉ុន ពាំនាំទៅសហរដ្ឋអាមេរិកថា កម្ពុជានៅតែចង់ធ្វើជាមិត្តល្អរបស់សហរដ្ឋអាមេរិក។ ការថ្លែងរបស់លោក ហ៊ុន សែន ដូច្នេះ គឺធ្វើឡើងនៅពេលដែលលោកជួបជាមួយលោក តាកាហាស៊ី ហ្វីមីអាគី ប្រធានសមាគមកម្ពុជា-ជប៉ុន នៅក្នុងអំឡុងទស្សនកិច្ចនៅប្រទេសជប៉ុនរយៈពេល៤ថ្ងៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
បន្ថែមពីការពាំនាំពាក្យទៅសហរដ្ឋអាមេរិក តាមរយៈប្រធានសមាគម កម្ពុជា-ជប៉ុន ថាកម្ពុជានៅតែចង់ចងមិត្តល្អជាមួយសហរដ្ឋអាមេរិក លោកនាយករដ្ឋមន្ត្រី ហ៊ុន សែន តាមរយៈទំព័រហ្វេសប៊ុកផ្លូវការរបស់លោក បានបញ្ជាក់ថា ការវាយតម្លៃថា កម្ពុជាបោះបង់ចោលសហរដ្ឋអាមេរិកបែរជាងាកមកចាប់ចិននោះ គឺខុសទាំងស្រុង។
ជាការកត់សម្គាល់ ការលើកឡើងរបស់ប្រមុខរដ្ឋាភិបាលកម្ពុជាដូច្នេះ គឺក្នុងអំឡុងពេលដែលមានការសួរនាំចង់ដឹងជុំវិញទស្សនវិស័យរបស់លោកនាយករដ្ឋមន្ត្រី ពាក់ព័ន្ធទៅនឹងបញ្ហាអន្តរជាតិមួយចំនួនពីភាគីជប៉ុន ជាពិសេសពាក់ព័ន្ធទៅនឹងដំណើរទស្សនកិច្ចរបស់ប្រធានាធិបតីអាមេរិកកាលពីពេលថ្មីៗនេះ នៅប្រទេសជប៉ុន និងចង់ដឹងពីទំនាក់ទំនងរវាងកម្ពុជា អាមេរិក ខណៈជប៉ុននិងអាមេរិកជាសម្ព័ន្ធមិត្តជិតស្និទ្ធនឹងគ្នា។
ជុំវិញបញ្ហានេះ លោក ឯម សុវណ្ណារ៉ា សាស្ត្រាចារ្យវិទ្យាសាស្ត្រនយោបាយយល់ថា ការថ្លែងរបស់លោកនាយករដ្ឋមន្ត្រីគឺជាសុឆន្ទៈល្អមួយ ក៏ប៉ុន្តែភាគីកម្ពុជា និងអាមេរិកគួរតែមានការបកស្រាយភាពមិនយល់គ្នាកន្លងមកក៏ដូចជាបច្ចុប្បន្ន ឲ្យមានភាពច្បាស់លាស់ ជាពិសេសការលើកឡើងពីប្រជាធិបតេយ្យ និងសិទ្ធិមនុស្ស ដែលមានការខ្វែងយោបល់គ្នា។
ទោះយ៉ាងណា តាមរយៈហ្វេសប៊ុករបស់លោក លោក ហ៊ុន សែន បញ្ជាក់ដែរថាកម្ពុជាមិនចង់ធ្វើជាសត្រូវជាមួយប្រទេសណាមួយឡើយ តែងតែចង់ធ្វើមិត្តជាមួយបណ្តាប្រទេសទាំងអស់រួមទាំងអាមេរិកផងដែរ ប៉ុន្តែកម្ពុជាត្រូវតែរក្សានូវឯករាជ្យភាព អធិបតេយ្យភាពរបស់ខ្លួន។
សូមបញ្ជាក់ថា កម្ពុជានិងអាមេរិក មានទំនាក់ទំនងការទូតជាមួយគ្នាជាធម្មតា ក៏ប៉ុន្តែប្រទេសទាំងពីរនេះ ត្រូវគេមើលឃើញថាមានភាពតានតឹងខាងនយោបាយ បន្ទាប់ពីសហរដ្ឋអាមេរិក បានគាំទ្រគោលជំហរប្រជាធិបតេយ្យរបស់អតីតបក្សប្រឆាំង ហើយកម្ពុជាវិញ បានអនុវត្តនូវដំណើរការប្រជាធិបតេយ្យរបស់ខ្លួន និងម្យ៉ាងទៀត រដ្ឋនិងរដ្ឋ បានផ្សារភ្ជាប់ទៅនឹងទំនាក់ទំនងគ្រប់ជ្រុងជ្រោយជាមួយមហាអំណាចចិន លើគ្រប់ទិដ្ឋភាពទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ