ព្រះសង្ឃបានប្រកាសបិណ្ឌបាត្រឲ្យអ្នកជាប់ឃុំនៅពន្ធគារព្រៃស បញ្ឈប់កូដកម្ម បង្អត់អាហារ
ក្រុមព្រះសង្ឃប្រមាណជា២០អង្គ នៅថ្ងៃអាទិត្យនេះ បានប្រកាសបិណ្ឌបាត្រឲ្យអ្នកជាប់ឃុំទាំង១៩នាក់នៅពន្ធគារព្រៃសឲ្យបញ្ឈប់កូដកម្មបង្អត់អាហារដោយសារតែសុខភាពចុះខ្សោយ។ សូមបញ្ជាក់ថា នៅថ្ងៃអាទិត្យនេះ គឺថ្ងៃសប្តាហ៍ទី៦ហើយ ដែលក្រុមគ្រួសារអ្នកជាប់ឃុំ យុវជន និងព្រះសង្ឃ បានតវ៉ាទាមទារនៅមុខពន្ធគារព្រៃស ដើម្បីឲ្យមានការដោះលែងសកម្មជនបក្សប្រឆាំង ព្រះសង្ឃ និងស្ត្រីសកម្មជនបឹងកក់ ទាំង១៩នាក់នោះ។
ចុះផ្សាយនៅថ្ងៃ៖
ស្តាប់ - ០២:៤១
អ្នកឃ្លាំមើលសិទ្ធិមនុស្សប្រចាំនៅអង្គការលីកាដូ លោក អំ សំអាត បានថ្លែងប្រាប់វិទ្យុបារាំងអន្តរជាតិ RFI នៅថ្ងៃអាទិត្យនេះថា បន្ទាប់ពីបានធ្វើកូដកម្មបង្អត់អាហារតាំងពីថ្ងៃទី១០ធ្នូមក អ្នកជាប់ឃុំទាំង១៩នាក់ មានសុខភាពកាន់តែចុះខ្សោយទៅ ហើយអ្នកជាប់ឃុំម្នាក់ ក្នុងចំណោមអ្នកជាប់ឃុំទាំង១៩ គឺអ្នកស្រី ផាន់ ឈុនរ៉េត ដែលមានជំងឺខ្សោយបេះដូងស្រាប់នោះ មិនទាន់ទទួលបានការព្យាបាលដោយគ្រូពេទ្យជំនាញនោះទេ។ ក្រុមគ្រួសារ និងមេធាវី បានស្នើសុំអោយបញ្ជូនមកកាន់មន្ទីរពេទ្យបេះដូងនៅកាល់ម៉ែត្រ ប៉ុន្តែត្រូវបានច្រានចោល។ យ៉ាងណាក៏ដោយ នៅថ្ងៃចន្ទដើមសប្តាហ៍ក្រោយ មេធាវីការពារក្តីអោយអ្នកស្រី នឹងដាក់ពាក្យបណ្តឹងទៅកាន់តុលាការសាលាឧទ្ធរណ៍ ដើម្បីសុំនៅក្រៅឃុំ និងទទួលបានការព្យាបាលពីមន្ទីរពេទ្យជំនាញ។
ចំណែកឯលោក មាជ សុវណ្ណារ៉ា ប្រធាននាយកដ្ឋានព័ត៌មានរបស់បក្សសង្គ្រោះជាតិវិញ ក៏ត្រូវបានក្រុមគ្រូពេទ្យបញ្ជាក់ថា មានការចុះស្គមជាងមុនផងដែរ។ ប៉ុន្តែទោះបីជាមានការធ្វើកូដកម្មបង្អត់អាហារយ៉ាងនេះក្តី ក៏តុលាការនៅមិនទាន់ផ្តល់យុត្តិធម៌សំរាប់ពួកគាត់នៅឡើយ។ នេះបើតាមការបញ្ជាក់បន្ថែម ពីព្រះតេជគុណ ព្រឹម ហ៊ួន សកម្មជនព្រះសង្ឃដើម្បីការពារសិទ្ធិមនុស្ស។ ព្រះអង្គ ព្រឹម ហ៊ួន បានបញ្ជាក់ប្រាប់វិទ្យុបារាំងអន្តរជាតិបន្ថែមថា នៅព្រឹកមិញ ព្រះសង្ឃប្រមាណជា២០អង្គ បាននិមន្តបិណ្ឌបាត្រឲ្យអ្នកជាប់ឃុំទាំង១៩នាក់នៅពន្ធនាគារព្រៃស ឲ្យបញ្ឈប់ការធ្វើកូដកម្មបង្អត់អាហារភ្លាម ដោយសារតែពួកគេមានសុខភាពចុះខ្សោយខ្លាំង។ ក្រៅពីនេះ ព្រះសង្ឃក៏បាន និមន្តបិណ្ឌបាត្រសុំអោយតុលាការដោះលែងសកម្មជនបក្សប្រឆាំង ព្រះសង្ឃ និងសកម្មជនបឹងកក់ដូចសព្វមួយដង មុនពេលការជួបជុំតវ៉ាប្រចាំសប្តាហ៍ទី៦នេះ ត្រូវបានរំសាយនៅប្រមាណជាម៉ោង១១ព្រឹក។
គួររំលឹកជូនថា កាលពីថ្ងៃព្រហស្បត្តិ៍ទី២៥ធ្នូ តុលាការក្រុងភ្នំពេញ ទើបតែបានសម្រេចច្រានចោលបណ្តឹងសុំនៅក្រៅឃុំរបស់លោក មាជ សុវណ្ណារ៉ា និងសកម្មជនគណបក្សសង្គ្រោះជាតិ៤នាក់ផ្សេងទៀត នៅក្នុងសំណុំរឿងបាតុកម្មរំដោះទីលានប្រជាធិបតេយ្យ។ សំណុំរឿងបាតុកម្មរំដោះទីលានប្រជាធិបតេយ្យ ដែលមានសកម្មជនគណបក្សសង្គ្រោះជាតិ១១នាក់ នឹងត្រូវតុលាការបើកសវនាការលើអង្គសេចក្តីជាលើកទី២ នៅថ្ងៃទី៨ខែមករាខាងមុខ។ ចំណែកឯករណីអ្នកភូមិបឹងកក់១០នាក់និងព្រះសង្ឃមួយអង្គ ដែលរងការចោទប្រកាន់ថា បានធ្វើអោយរាំងស្ទះចរាចរណ៍ និងរារាំងមន្ត្រីសាធារណៈ ហើយត្រូវបានតុលាការក្រុងភ្នំពេញកាត់ទោសជាប់ពន្ធនាគាររយៈពេល១ឆ្នាំនោះ នឹងត្រូវតុលាការសាលាឧទ្ធរណ៍បើកសវនាការ នៅថ្ងៃទី២២មករាខាងមុខ។ ចំណែកឯករណីព្រះសង្ឃពីរអង្គ ព្រះនាម ឃីន វណ្ណៈ និងព្រះនាម សាង កុសល ដែលរងការចោទប្រកាន់ពីបទចូលរួមបាតុកម្មនៅមុខស្ថានទូតវៀតណាមនោះ នឹងត្រូវតុលាការសាលាឧទ្ធរណ៍ បើកសវនការលើបណ្តឹងសុំនៅក្រៅឃុំនៅថ្ងៃទី៣០ធ្នូនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ