ក្រោយការតវ៉ា៖ ក្រសួងអប់រំ ថានឹងបើកសន្លឹកកិច្ចការបេក្ខជនមួយចំនួនឡើងវិញ
ក្រសួងអប់រំ យុវជន និងកីឡា គ្រោងនឹងបើកសន្លឹកកិច្ចការមុខវិជ្ជារបស់បេក្ខជនមួយចំនួន ដែលប្តឹងតវ៉ាមិនសុខចិត្តចំពោះលទ្ធផល ដែលប្រកាសដោយក្រសួងអប់រំ កាលពីពេលថ្មីៗនេះ។ ការប្រកាសថានឹងមានការបើកសន្លឹកកិច្ចការយកមកពិនិត្យឡើងវិញនេះ ធ្វើឡើងបន្ទាប់ពីមានសិស្សមួយចំនួន បានលើកគ្នាមកតវ៉ានៅមុខក្រសួងអប់រំ នៅថ្ងៃម្សិលមិញនេះ ស្នើសុំឱ្យមានការត្រួតពិនិត្យលើសន្លឹកកិច្ចការឡើងវិញ ជាពិសេសគឺមុខវិជ្ជាគណិតវិទ្យា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បញ្ជាក់ថា ក្រសួងនឹងបើកសន្លឹកកិច្ចការមុខវិជ្ជាគណិតវិទ្យា របស់បេក្ខជនមួយចំនួន ដែលប្តឹងតវ៉ាមិនសុខចិត្តចំពោះពិន្ទុនៃមុខវិជ្ជាខ្លះ ប្រកាសដោយក្រសួង។
ការលើកឡើងរបស់លោករដ្ឋមន្ត្រី ក្រសួងអប់រំនេះ ធ្វើឡើងបន្ទាប់មានបេក្ខជនមួយចំនួន នៅតាមបណ្តាខេត្ត និងនៅរាជធានីភ្នំពេញ បានស្នើសុំឱ្យមានដំណោះស្រាយពីខាងក្រសួងអប់រំ តាមរយៈការស្នើពិនិត្យសន្លឹកកិច្ចរបស់ពួកគេឡើងវិញ ជាពិសេសគឺមុខវិជ្ជាគណិតវិទ្យា។
ក្រសួងអប់រំ យុវជន និងកីឡា បញ្ជាក់ថា សម្រាប់សិស្ស ដែលប្រឡងសញ្ញាបត្រមធ្យមសិក្សា ទុតិយភូមិ ឬបាក់ឌុប សម័យប្រឡងថ្ងៃទី ២០ ខែសីហា ដែលមិនពេញចិត្តចំពោះលទ្ធផល អាចមកដាក់ពាក្យតវ៉ាឲ្យលឿនតាមដែលអាចធ្វើបាន។ ការតវ៉ាអំពីលទ្ធផលប្រឡងបាក់ឌុប ត្រូវភ្ជាប់មកជាមួយនូវ ពាក្យស្នើសុំ (ឈ្មោះ លេខតុ លេខបន្ទប់ មណ្ឌល) ពិន្ទុប្រចាំឆ្នាំនៅវិទ្យាល័យ លទ្ធផលប្រឡងបាក់ឌុបដែលក្រសួងទើបបានប្រកាសកាលពីពេលថ្មីៗនេះ និងលេខទូរស័ព្ទទំនាក់ទំនង ។
លទ្ធផលនៃការប្រឡងបាក់ឌុបសម្រាប់ឆ្នាំ២០១៨នេះ មានបេក្ខជនសរុបជាង៧ម៉ឺននាក់ ស្មើនឹង ៦៦.២១% បានប្រឡងជាប់ ក្នុងចំណោមបេក្ខជនសរុបជាង១១ម៉ឺននាក់។ ក្រសួងអប់រំយុវជន និងកីឡា បានវាយតម្លៃជាទូទៅថា ដំណើរការនៃការប្រឡងសញ្ញាបត្របាក់ឌុបឆ្នាំនេះ បានប្រព្រឹត្តទៅដោយជោគជ័យ និងពុំមានឧបសគ្គអ្វីគួរឲ្យកត់សំគាល់នោះឡើយ រាប់ទាំងដំណើរការនៃការប្រឡង ដំណើរការនៃសំណេរ កំណែ និងការស្រង់បូកពិន្ទុតាមរយៈប្រព័ន្ធកុំព្យូទ័រជាដើម។
យ៉ាងណាក៏ដោយ ក្រោយការប្រកាសលទ្ធផលផ្លូវការនៃការប្រឡងបាក់ឌុបឆ្នាំ២០១៨ សិស្សមួយក្រុមនៅក្នុងខេត្តកំពត បានលើកគ្នាទៅតវ៉ានៅមុខមន្ទីរអប់រំ យុវជន និងកីឡា ខេត្តកំពត និងសិស្សមួយក្រុមផ្សេងទៀត នៅរាជធានីភ្នំពេញ កាលពីថ្ងៃទី ១០ខែកញ្ញា បានមកជួបជុំគ្នានៅមុខក្រសួងអប់រំដើម្បីស្នើសុំសើរើលទ្ធផលនៃការប្រឡងមុខវិជ្ជាគណិតវិទ្យា។ ពួកគេ អះអាងថា ធ្វើបានល្អនៅពេលប្រឡង ប៉ុន្តែលទ្ធផលបែរជាធ្លាក់ទៅវិញ។ លទ្ធផលធ្លាក់មុខវិជ្ជាគណិតវិទ្យាយ៉ាងដូច្នេះ ធ្វើអោយពួកគេជួបបញ្ហា នៅពេលដាក់ពាក្យសុំអាហារូបករណ៍ នៅតាមបណ្តាសាកលវិទ្យាល័យនានា។ ចំណែកនៅលើបណ្តាញទំនាក់ទំនងសង្គមហ្វេសប៊ុកវិញ បេក្ខជន លោកគ្រូ អ្នកគ្រូ ដែលកើតទុក្ខមិនសុខចិត្តចំពោះលទ្ធផលប្រឡង ក៏បានសរសេរទៅកាន់ទំព័រហ្វេសប៊ុករបស់ក្រសួងអប់រំ យុវជន និងកីឡា ហើយអ្នកខ្លះទៀតសរសេរទៅកាន់ទំព័រហ្វេសប៊ុករបស់លោក រដ្ឋមន្ត្រី ហ៊ុន សែន ដើម្បីស្វែងរកកិច្ចអន្តរាគមន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ