សហជីពថា សំណុំរឿងពួកគេ អូសបន្លាយឆ្លងចូលឆ្នាំថ្មី ផ្ទុយពីនាយករដ្ឋមន្ត្រី ដែលជំរុញឲ្យបិទបញ្ចប់ត្រឹមចុងឆ្នាំ២០១៨
ប្រធានសហជីពមួយចំនួននៅថ្ងៃពុធនេះ បានជម្រុញឲ្យតុលាការពន្លឿន ការដោះស្រាយបណ្ដឹងរបស់ពួកគេឲ្យបានឆាប់ទៅតាមការជម្រុញរបស់ប្រមុខរដ្ឋាភិបាលកន្លងមក។ លោកនាយករដ្ឋមន្ត្រី ហ៊ុន សែន ធ្លាប់ជំរុញកាលពីមួយខែមុន ឲ្យអ្នកពាក់ព័ន្ធរូតរះបិទបញ្ចប់បណ្ដឹងពាក់ព័ន្ធសហជីពត្រឹមចុងឆ្នាំ២០១៨។ តែផ្ទុយទៅវិញសហជីពថា សំណុំរឿងរបស់ពួកគេអូសបន្លាយឆ្លងចូលដល់ដើមឆ្នាំ២០១៩។
ចុះផ្សាយនៅថ្ងៃ៖
ស្តាប់ - ០២:៣៨
ការជំរុញពីសហជីពមួយចំនួនឲ្យតុលាការពន្លឿនដោះស្រាយបណ្ដឹង ធ្វើឡើងបន្ទាប់ពីពួកគេបានដាក់ពាក្យបណ្ដឹងទៅកាន់សាលាឧទ្ធរណ៍តាំងតែពាក់កណ្ដាលខែធ្នូ ខណៈសហជីពខ្លះអះអាងថា ពួកគេនៅមិនទាន់ដាក់ពាក្យបណ្ដឹងទាស់នៅឡើយទេ។ បណ្ដឹងជំទាស់នេះធ្វើឡើងក្រោយពេលដែលតុលាការក្រុងភ្នំពេញ កាលថ្ងៃទី១១ខែធ្នូ ប្រកាសសាលក្រមឲ្យប្រធានសហជីពទាំង៦រូប ជាប់ពន្ធនាគារ២ឆ្នាំ៦ខែ តែត្រូវព្យួរទោស និងបង់ប្រាក់ជំងឺចិត្តរួមគ្នាទៅជនរងគ្រោះ២នាក់ ចំនួន៣៥លានរៀល។
ជាមួយគ្នានេះ មេដឹកនាំសហជីព លោក អាត់ ធន់ និងលោក ប៉ាវ ស៊ីណា បានលើកឡើងប្រហាក់ប្រហែលគ្នាថា ក្រោយការជំរុញរបស់ប្រមុខរដ្ឋាភិបាល ការវិវត្តន៍នៃសំណុំរឿងរបស់ពួកគេហាក់ដូចជាគ្មានអ្វីប្រែប្រួល។ មិនប្រែប្រួលព្រោះថា គ្មានសំណុំរឿងណាមួយត្រូវទម្លាក់ចោល ឬជម្រះឲ្យបានឆាប់នោះទេ។ តែផ្ទុយទៅវិញមានតែការជម្រះឲ្យសហជីពជាប់ទោស។ នេះបើតាមលោក ប៉ាវ ស៊ីណា ប្រធានសហភាពចលនាកម្មករកម្ពុជា។
ចំណែកលោក អាត់ ធន ប្រធានសហភាពការងារកម្ពុជាលើកឡើងថា សេរីភាពពេលបំពេញការងារក៏នៅមិនទាន់មានភាពល្អប្រសើរដែរ ខណៈសំណុំរឿងនៅមិនទាន់បានបិទបញ្ចប់
នោះ។ ជាថ្មីទៀតលោកស្នើឲ្យតុលាការទម្លាក់ចោលបទចោទទាំងប៉ុន្មានមកលើប្រធានសហជីពទាំង៦។ នេះក៏ដោយសារតែពួកគេមិនជាប់ទាក់ទងនឹងបទចោទក្នុងពេលកន្លងមកឡើយ។
ប៉ុន្តែយ៉ាងណាមិញមេធាវីរបស់ លោក អាត់ ធន់ និយាយថា សំណុំរឿងរបស់សហជីពស្មុគស្មាញបន្តិច ព្រោះប្រធានសហជីពខ្លះមិនទាន់ការដាក់ពាក្យបណ្ដឹងជំទាស់ ទៅកាន់តុលាការឧទ្ធរណ៍ ខណៈតុលាការទំនងជាចង់ជំនុំជម្រះជាកញ្ចប់តែម្ដង។
លោក រ៉ុង ឈុន ប្រធានសហភាពសហជីពកម្ពុជាបានគូសបញ្ជាក់ថា លោកនឹងដាក់ពាក្យបណ្ដឹងជំទាស់ទៅកាន់តុលាការឧទ្ធរណ៍មិនឲ្យផុតថ្ងៃទី១១ខែមករាឡើយ។
គួររំឭកថា នៅក្នុងចំណោមមេសហជីពទាំង៦ ដែលជាប់បណ្ដឹងនៅតុលាការនេះ គឺមេសហជីពបីនាក់ ត្រូវបានលោកនាយករដ្ឋមន្ត្រី ហ៊ុន សែន ចេញមុខធានាថាមានសាក្សីដែលបញ្ជាក់ថាពួកគេ មិនជាប់ទាក់ទងនឹងបាតុកម្មប្រឆាំងរដ្ឋាភិបាលនៅផ្លូវវេងស្រេង កាលពីចុងឆ្នាំ២០១៣ឡើយ។ មនុស្ស៣នាក់រួមមាន លោក អាត់ ធន់ លោក ប៉ាវ ស៊ីណា និងលោក ជា មុន្នី ។ ប៉ុន្តែយ៉ាងណាមិញ លោកនាយករដ្ឋមន្ត្រីមិនបានធានាចំពោះមេដឹកនាំសហជីព៣រូបផ្សេងទៀតឡើយ ក្នុងនោះមាន លោក រ៉ុង ឈុន អ្នកស្រី យ៉ាង សោភ័ណ្ឌ និង អ្នកស្រី ម៉ម ញឹម។
សម្រាប់ប្រមុខរដ្ឋាភិបាល ផ្លូវវេងស្រេងជាសំណុំរឿងមួយធ្ងន់ធ្ងរដែលអ្នកពាក់ព័ន្ធត្រូវមានទោ ស។ មានទោសព្រោះបាតុកម្មកាលណោះបណ្ដាលឲ្យស្លាប់មនុស្ស ខូចខាតទ្រព្យសម្បត្តិរដ្ឋ និងឯកជន។ ហើយនេះជារូបភាពមួយផ្ដួលរលំរដ្ឋាភិបាល។ ប៉ុន្តែយ៉ាងណាក៏ដោយ អង្គការជាតិ និងអន្តរជាតិចំនួន៩៥ស្ថាប័ន ធ្លាប់បានចេញសេចក្តីថ្លែងការណ៍រួមគ្នា ដោយទាមទារឲ្យទម្លាក់ការចោទប្រកាន់លើមេដឹកនាំសហជីពចំនួន៦នាក់នៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ