ជនជាតិចិនជាង១០០នាក់ទៀតហើយ ត្រូវសមត្ថកិច្ចឃាត់ខ្លួន ពាក់ព័ន្ធករណីល្បែងស៊ីសងតាមអ៊ីនធឺណិត
ជនជាតិចិនប្រុស ស្រីចំនួន១០៥នាក់ ត្រូវបាននគរបាលអន្តោប្រវេសន៍ឃាត់ខ្លួន ពាក់ព័ន្ធករណីប្រព្រឹត្តល្បែងស៊ីសងតាមប្រព័ន្ធអ៊ីនធឺណិត(VOIP) កាលពីរសៀលថ្ងៃទី០៩ ខែកញ្ញា ឆ្នាំ២០១៩។ ការឃាត់ខ្លួនជនជាតិចិននេះ ធ្វើឡើងនៅអគារពាណិជ្ជកម្ម SUNTOWN សង្កាត់អូរបែកក្អម ខណ្ឌសែនសុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ក្រោយពីឃាត់ខ្លួន ជនជាតិចិនទាំងប្រុស ស្រី ត្រូវបាន កម្លាំងនគរបាលអន្តោប្រវេសន៍បញ្ជូនទៅនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ដើម្បីអនុវត្តនីតិវិធីបន្តតាមច្បាប់។ នេះបើតាមការចុះផ្សាយរបស់គេហទំព័ររបស់អគ្គស្នងការដ្ឋាននគរបាលជាតិ កាលពីយប់ថ្ងៃទី០៩ ខែកញ្ញា។
លោកវរសេនីយ៍ទោ ជា ចិត្រា នាយិការិយាល័យស៊ើបអង្កេត និងអនុវត្តនីតិវិធី ផែនការងារអន្តោប្រវេសន៍បានបញ្ជាក់ថាក្នុងប្រតិបត្តិការខាងលើបានពិនិត្យរកឃើញជនជាតិចិនសរុបចំនួន១០៥នាក់ ក្នុងនោះមានស្រី១០នាក់ ហើយពួកគេត្រូវបានចោទប្រកាន់ពីបទស្នាក់នៅខុសច្បាប់ និងសង្ស័យប្រព្រឹត្តល្បែងតាមប្រព័ន្ធអ៊ីនធឺណិត (VOIP)។ នេះបើតាមការចុះផ្សាយរបស់គេហទំព័ររបស់អគ្គស្នងការដ្ឋាននគរបាលជាតិ។
លោកនាយករដ្ឋមន្ត្រី កាលពីថ្ងៃទី១៨ ខែសីហា កន្លងទៅ បានសម្រេចឈប់ផ្ដល់អាជ្ញាប័ណ្ណសម្រាប់អាជីវកម្មល្បែងភ្នាល់តាមម៉ាស៊ីនអេឡិចត្រូនិក និងតាមអ៊ីនធឺណិតទាំងក្នុង និងក្រៅប្រទេស។ សារាចរណែនាំដែលចុះហត្ថលេខាដោយប្រមុខរដ្ឋាភិបាល លោក ហ៊ុន សែន នោះ បានលើកឡើងថា ពួកឧក្រិដ្ឋជនបរទេសមួយចំនួន បានជ្រកក្រោមរូបភាពល្បែងភ្នាល់ប្រភេទនេះ ដើម្បីជំរិតទារប្រាក់ពីជនរងគ្រោះ ទាំងក្នុងនិងក្រៅប្រទេស ដែលធ្វើឲ្យប៉ះពាល់ដល់សន្តិសុខ សណ្ដាប់ធ្នាប់សាធារណៈ និងរបៀបរៀបរយសង្គម។
ការចេញចំណាត់ការរបស់រដ្ឋាភិបាលបានធ្វើឲ្យជនជាតិចិនខ្ទង់ពាន់នាក់ក្នុងមួយថ្ងៃ បានចាកចេញពីប្រទេសកម្ពុជា ចាប់តាំងពីថ្ងៃទី៣១ ខែសីហា។ នេះបើផ្អែកតាមរបាយការណ៍របស់អាជ្ញាធរកម្ពុជា។
សូមជម្រាបជូនថា ត្រឹមខែសីហា កន្លងទៅ មានជនជាតិប្រមាណជិត៣០០នាក់ត្រូវបានបណ្តេញចេញប្រទេសកម្ពុជា ពាក់ព័ន្ធករណីជំរិតទារប្រាក់តាមប្រព័ន្ធអ៊ីនធឺណិត (VOIP)។ ភាគច្រើននៃជនជាតិចិន ដែលរកឃើញថាបានប្រព្រឹត្តិបទល្មើសជំរិតទារប្រាក់ ត្រូវបានអាជ្ញាធរចិនមកទទួលយកពួកគេតាមជើងយន្តហោះទៅប្រទេសចិនវិញ។
ទិន្នន័យដែលវិទ្យុបារាំងអន្តរជាតិទទួលបានពីមន្ត្រីជាន់ខ្ពស់នៃអគ្គនាយកដ្ឋានអន្តោប្រវេសន៍ឲ្យដឹងថា ជនជាតិចិន ដែលត្រូវបានបណ្តេញចេញសរុបរហូតមកដល់ពេលនេះមាន ២ ៥៨៧នាក់ ហើយសម្រាប់រយៈពេល៨ខែដើមឆ្នាំ២០១៩នេះ មានជនជាតិចិន ដែលត្រូវបានបណ្តេញចេញចំនួន ៧១៦នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ