កងទ័ព គាំទ្ររដ្ឋាភិបាលដែលចាប់ខ្លួនលោក កឹម សុខា
ប្រតិកម្មចំពោះការចាប់ខ្លួនលោក កឹម សុខា នៅតែធ្លាក់មកជាបន្តបន្ទាប់។ ក្នុងនោះ ក្រៅពីការរិះគន់ពីសហគមន៍អន្ដរជាតិ ក៏មានផងដែរ ប្រតិកម្មគាំទ្រចំណាត់ការរបស់អាជ្ញាធរមានសមត្ថកិច្ច ដែលបានចាប់ខ្លួនលោក កឹម សុខា ពីបទក្បត់ជាតិ។ កងទ័ពត្រូវបានគេមើលឃើញថា ផុសផុលជាងគេ នៅក្នុងការថ្លែងសារគាំទ្រនេះ។
ចុះផ្សាយនៅថ្ងៃ៖
ស្តាប់ - ០២:០៣
ក្រសួងការពារជាតិ គឺជាស្ថាប័នដំបូងៗគេ ដែលបានចេញមុខគាំទ្រការចាប់ខ្លួន លោក កឹម សុខា ប្រធានគណបក្សសង្គ្រោះជាតិ។ បើតាមក្រសួងការពារជាតិ ការនិយាយផ្ទាល់មាត់ និងសកម្មភាពរបស់លោក កឹម សុខា គឺជាអំពើខុសច្បាប់ និងមានលក្ខណៈជាបទឧក្រិដ្ឋជាក់ស្ដែង ក្បត់ជាតិ ប៉ះពាល់ដល់សន្តិសុខជាតិ និងមានបំណងផ្ដួលរំលំរដ្ឋាភិបាល។ នៅក្នុងសេចក្ដីថ្លែងការណ៍គ្មានចុះថ្ងៃខែដែលចេញផ្សាយនៅថ្ងៃអាទិត្យនេះ ក្រសួងការពារជាតិ បានប្រកាសគាំទ្ររដ្ឋាភិបាលស្របច្បាប់របស់លោក ហ៊ុន សែន ក៏ដូចជារារាំងមិនឲ្យមានអំពើបដិវត្តន៍ពណ៌ និងការឃុបឃិតជាមួយបរទេសផ្ដួលរំលំរដ្ឋាភិបាលកើតចេញពីការបោះឆ្នោតជាដាច់ខាត។ ក្រសួងការពារជាតិ បានស្នើឲ្យតុលាការផ្ដន្ទាទោសលោក កឹម សុខា និងបក្សពួកយ៉ាងធ្ងន់ធ្ងរជាទីបំផុត។
ក្រៅពីក្រសួងការពារជាតិ ក៏មានផងដែរ ការគាំទ្រពីសំណាក់កម្លាំងនគរបាល មេបញ្ជាការកងរាជអាវុធហត្ថលើផ្ទៃប្រទេស ពិសេសមេបញ្ជាការកងទ័ពគ្រប់ភូមិភាគ ទាំងជើងគោកនិងជើងទឹក។ តាមរយៈគេហទំព័រព័ត៌មាន Fresh News មេបញ្ជាការកងទ័ពទាំងអស់ សុទ្ធតែបានហៅលោក កឹម សុខា យ៉ាងកប់ៗមាត់ថាជាជនក្បត់ជាតិ។ និងថា លោក កឹម សុខា ត្រូវតែទទួលខុសត្រូវនៅចំពោះមុខច្បាប់ជាធរមាន ចំពោះទង្វើរបស់ខ្លួន។
កូនប្រុសលោកនាយករដ្ឋមន្ដ្រី ហ៊ុន សែន គឺលោក ហ៊ុន ម៉ានិត ដែលជាអគ្គនាយកនៃអគ្គនាយកដ្ឋានស្រាវជ្រាវចារកិច្ចនៅក្រសួងការពារជាតិ ក៏ចេញមុខមកប្រតិកម្មក្នុងរឿងនេះដែរ។ នៅលើទំព័រហ្វេសប៊ុក លោក ហ៊ុន ម៉ានិត បានសរសេរសារដែលមានខ្លឹមសារថា កឹម សុខា ក្បត់កម្ពុជាហើយ។ កូនប្រុសលោក ហ៊ុន សែន សរសេរបន្តថា លោក កឹម សុខា មានផែនការជាមួយអាមេរិកតាំងពីឆ្នាំ១៩៩៣។ ចុងក្រោយនៃសំណេរ លោក ហ៊ុន ម៉ានិត បានអរគុណលោក កឹម សុខា ដែលបានធ្វើឲ្យដឹងថា អ្នកណាជាជនទី ៣។
គួរកត់សម្គាល់ថា ការថ្លែងសារគាំទ្ររដ្ឋាភិបាលដែលបានចាប់ខ្លួនលោក កឹម សុខា នៅតែធ្លាក់មកជាបន្តបន្ទាប់ ភាគច្រើនលើសលប់ពីសំណាក់ក្រសួងស្ថាប័នក្រោមបង្គាប់រដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ