លោក មាស វីរិទ្ធ៖ យុទ្ធនាការពេញមួយឆ្នាំ២០១៧ ធ្វើឲ្យបទល្មើសគ្រឿងញៀនថយចុះ
យុទ្ធនាការប្រយុទ្ធប្រឆាំងគ្រឿងញៀនខុសច្បាប់ ជំហានទី២ ឆ្នាំ២០១៧ ត្រូវបិទបញ្ចប់នៅថ្ងៃទី៣១ខែធ្នូនេះហើយ។ ពេញមួយឆ្នាំកន្លងមកនេះ លោក មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន កត់សម្គាល់ឃើញថា យុទ្ធនាការដែលស្ថាប័នពាក់ព័ន្ធបានចាប់ដៃគ្នាធ្វើការយ៉ាងសស្រាក់សស្រាំដើម្បីប្រឆាំងគ្រឿងញៀននេះ បានធ្វើឲ្យបទល្មើសគ្រឿងញៀនថយចុះមួយកម្រិត ទាំងការប្រើប្រាស់និងលក់ដូរ។
ចុះផ្សាយនៅថ្ងៃ៖
ស្តាប់ - ០២:១៤
ចាប់តាំងពីមានយុទ្ធនាការប្រយុទ្ធប្រឆាំងគ្រឿងញៀនខុសច្បាប់ នៅខែមករា ដើមឆ្នាំ២០១៧នេះមក ចំនួនបទល្មើសឬការប្រព្រឹត្តបទល្មើសពាក់ព័ន្ធ នឹងគ្រឿងញៀន បានថយចុះប្រមាណ២០ភាគរយ។ នេះបើតាមការឲ្យដឹងពីលោក មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន នៅថ្ងៃទី៣១ខែធ្នូនេះ។
បើតាមលោក មាស វីរិទ្ធ គិតត្រឹមថ្ងៃទី២៧ខែធ្នូចុងឆ្នាំ២០១៧ សមត្ថកិច្ចបង្ក្រាបបានបទល្មើសគ្រឿងញៀនសរុបចំនួន៨០៩៤ករណី និងឃាត់ខ្លួនមនុស្សពាក់ព័ន្ធបានចំនួន១ ៧៧៤៧នាក់ ក្នុងនោះស្រីមានចំនួន១៥៦៨នាក់។ ចំនួននេះកើនឡើងជិតពីរដង បើធៀបនឹងឆ្នាំ២០១៦កន្លងទៅ។ ឆ្នាំ២០១៦ ដែលអាជ្ញាធរបង្ក្រាបបទល្មើសគ្រឿងញៀនបានចំនួនជាង៤០០០ករណី និងឃាត់ខ្លួនមនុស្សបានប្រមាណ៩៨០០នាក់។
បើទោះបីជាសមត្ថកិច្ចបង្ក្រាបបានបទល្មើសគ្រឿងញៀនច្រើនជាងមុនក៏ដោយ ប៉ុន្តែសម្រាប់អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោកនៅមិនទាន់ចាត់ទុកថាវាជាជោគជ័យនៅឡើយទេ។ ជោគជ័យចំពោះលោក គឺធ្វើយ៉ាងណាឲ្យកម្ពុជាក្លាយជាប្រទេសមួយដែលប្រាសចាកគ្រឿងញៀន។
គួររំឭកជូនថា យុទ្ធនាការប្រយុទ្ធប្រឆាំងគ្រឿងញៀនខុសច្បាប់ថ្នាក់ជាតិ ត្រូវបានដាក់ចេញឲ្យអនុវត្តចាប់ពីដើមឆ្នាំ២០១៧ ដោយបែងចែកជាពីរដំណាក់កាល ក្នុងមួយដំណាក់កាលមានរយៈពេល៦ខែ។ នៅឆ្នាំ២០១៨ខាងមុខ លោក មាស វីរិទ្ធ នៅមិនទាន់ច្បាស់ថា នឹងត្រូវបន្តយុទ្ធនាការនេះតទៅទៀតឬយ៉ាងណានៅឡើយ។ លោកបញ្ជាក់ថា អាជ្ញាធរជាតិប្រយុទ្ធប្រឆាំងគ្រឿងញៀនកំពុងតែបូកសរុបលទ្ធផលការងារ មុននឹងសុំគោលការណ៍ពីថ្នាក់ដឹកនាំ។
យុទ្ធនាការប្រយុទ្ធប្រឆាំងគ្រឿងញៀនខុសច្បាប់ បានទទួលការស្វាគមន៍និងគាំទ្រពីសំណាក់មតិទូទៅគួរឲ្យកត់សម្គាល់នាពេលដំបូង ប៉ុន្តែទន្ទឹមគ្នានេះ ក៏មានការរិះគន់ផងដែរថា អាជ្ញាធរចាប់បានតែត្រីតូច មិនឃើញចាប់បានត្រីធំ។ ក្នុងបញ្ហានេះ លោក មាស វីរិទ្ធ ពន្យល់ថា ត្រីធំ ឬត្រីតូច មិនមែនជាកត្តាសម្រាប់វាយតម្លៃប្រសិទ្ធភាពនៃការងាររបស់អាជ្ញាធរឡើយ។ មែនទែនទៅ សម្រាប់លោក មាស វីរិទ្ធ ដើម្បីកាត់បន្ថយ និងឈានទៅលុបបាត់បទល្មើសគ្រឿងញៀន គេត្រូវតែបោសសម្អាតពីត្រីតូចទៅ។ ព្រោះបើកាលណាត្រីតូច ពោលគឺអ្នកប្រើប្រាស់ថយចុះ នោះត្រីធំឬអ្នកជួញដូរ ក៏ថយចុះទៅតាមនោះដែរ។ នេះបើតាមលោក មាស វីរិទ្ធិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ