សមត្ថកិច្ចកំពុងស្រាវជ្រាវករណីវាយប្រហារលើចៅសង្កាត់អតីតគណបក្សសង្គ្រោះជាតិ
អតីតចៅសង្កាត់នៃអតីតគណបក្សសង្គ្រោះជាតិ លោក ស៊ិន បូណា ត្រូវជនមិនស្គាល់មុខលួចវាយប្រហារពីក្រោយ បណ្ដាឲ្យបាក់ឆ្អឹងដៃឆ្វេងបីកំណាត់ នៅថ្ងៃទី២៥កញ្ញាម្សិលមិញ។ ជនរងគ្រោះបានអះអាងថា ករណីវាយប្រហារនេះជាការរៀបចំទុកមុនរបស់ជនល្មើស។ តែពីខាងសមត្ថកិច្ចបានគូសបញ្ជាក់ថា កំពុងស្រាវជ្រាវ។
ចុះផ្សាយនៅថ្ងៃ៖
ស្តាប់ - ០២:០១
ថ្លែងប្រាប់វិទ្យុបារាំងអន្តរជាតិនៅថ្ងៃទី២៦ខែកញ្ញានេះ លោក ស៊ិន បូណា អតីតចៅសង្កាត់នៃអតីតគណបក្សសង្គ្រោះជាតិបានរៀបរាប់ថា លោកបានបាក់ឆ្អឹងដៃខាងឆ្វេងបីកំណាត់ បន្ទាប់ពីជនល្មើស២នាក់ធាក់លោកពីក្រោយពេលកំពុងជិះម៉ូតូនៅលើបណ្ដោយផ្លូវជាតិ៦A។ បន្ទាប់ពីដួលជនល្មើសបានប្រើដំបងដែកវាយលើលោកបន្ថែម។ លោក ស៊ិន បូណា បានអះអាងថា លោកមិនធ្លាប់មានគំនុំជាមួយនរណាពីមុនឡើយ ដូច្នេះហើយលោកស្នើឲ្យសមត្ថកិច្ចស្វែងរកចាប់ខ្លួនជនបង្កមកផ្ដន្ទាទោសឲ្យបានឆាប់។
លោក មុត ចន្ថា មន្ត្រីបក្សប្រឆាំងស្និទ្ធិនឹងលោក កឹម សុខា បានបង្ហោះសារលើបណ្ដាញសង្គមថា សកម្មភាពដេញវាយប្រហារពីសំណាក់ជនល្មើស គឺមានចេតនានិងប៉ុនប៉ងប្រើហិង្សា ព្រោះតាមការវិភាគលើសកម្មភាពរបស់ជនល្មើស ហាក់ត្រៀមលក្ខណៈយ៉ាងហ្មត់ចត់ តាមរយៈសម្ភារៈមួយ ពាក់មួកសុវត្ថិភាព មុខរុំក្រមា មានដែកបំពង់ទីព និងអាវុធខ្លី ហើយនិងសកម្មភាពដេញតាមវាយប្រហារដោយស្វាហាប់ ហាក់គ្មានខ្លាចញញើតអ្វីឡើយ។ នេះបើតាមលោក មុត ចន្ថា។
យ៉ាងណាក៏ដោយ លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានគូសបញ្ជាក់ថា អាជ្ញាធរកំពុងធ្វើការស្រាវជ្រាវ ខណៈប៉ូលីសក្នុងខណ្ឌជ្រោយចង្វារបានចុះទៅធ្វើរបាយការណ៍ដល់ផ្ទះជនរងគ្រោះរួចហើយ។ អ្នកនាំពាក្យដដែល ស្នើឲ្យជនរងគ្រោះ ឬមជ្ឈដ្ឋានទូទៅកុំប្រញាប់ធ្វើការសន្និដ្ឋាន ដោយទាញភ្ជាប់សំណុំរឿងហិង្សាលើសកម្មជនអតីតគណបក្សសង្គ្រោះជាតិ ជារឿងនយោបាយមុនការរកឃើញរបស់ប៉ូលីស។
សូមជម្រាបជូនថា មុនករណីនេះជិតមួយសប្ដាហ៍ លោក ពូក ចន្ដា ដែលគេស្គាល់ថា ជាអតីតប្រធានក្រុមអង្គរក្សលោក សម រង្ស៊ី ត្រូវបានជន មិនស្គាល់អត្តសញ្ញាណពីរនាក់លួចវាយពីក្រោយ បណ្តាលឲ្យបែកក្បាលហូរឈាម កាលពីព្រឹក ថ្ងៃទី ២២ ខែកញ្ញា នៅម្តុំសង្កាត់ចាក់អង្រែលើរាជធានីភ្នំពេញ។
ការកត់សម្គាល់ដោយឡែក នៅមួយរយៈពេលចុងក្រោយនេះ មានករណីជនមិនស្គាល់មុខបានលួចវាយប្រហារទៅលើសកម្មជនអតីតគណបក្សសង្គ្រោះជាតិនៅរាជធានីភ្នំពេញ ប្រមាណជាង១០ករណីមកហើយ។ រូបភាពនេះត្រូវបាន សង្គមស៊ីវិលនិងអ្នកនយោបាយ ចាត់ទុកថា ជាការរៀបចំទុកមុនដោយមានជាប់ពាក់ព័ន្ធនឹងស្ថានការណ៍នយោបាយបច្ចុប្បន្ន។ តែទោះជាបែបនេះក្ដីអ្នកនាំពាក្យអគ្គស្នងការនគរបាលជាតិថ្លែងថា គ្មានហេតុផលណាមួយដែលគេត្រូវមកទាញភ្ជាប់ករណីហិង្សាលើអតីតសកម្មជនគណបក្សសង្គ្រោះជាតិជាមួយនឹងរឿងនយោបាយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ