មន្រ្តីរដ្ឋាភិបាលកម្ពុជាបដិសេធការលួចដូរសំបុត្រយន្តហោះរបស់ លោក សម រង្ស៊ី
មន្ត្រីរដ្ឋាភិបាលកម្ពុជាទទួលបន្ទុកអាកាសចរណ៍ស៊ីវិលបានទាត់ចោលការចោទប្រកាន់របស់ លោក សម រង្ស៊ី ដែលថារដ្ឋាភិបាលកម្ពុជាជាអ្នកលួចចូលទៅដូរពេលវេលាហោះហើរនៅក្នុងសំបុត្រយន្តហោះដែលលោកបានទិញពីក្រុមហ៊ុន Thai Airways ដើម្បីឆ្ពោះទៅទីក្រុងបាងកក ម្សិលមិញ។ អ្នកនាំពាក្យអាកាសចរណ៍ស៊ីវិលបានចាត់ទុកការចោទប្រកាន់របស់ លោក សម រង្ស៊ី ថាជាការ«ភូតភរ បោកប្រាស់»។
ចុះផ្សាយនៅថ្ងៃ៖
ស្តាប់ - ០១:៥៥
លោក ជា អូន អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលបានឆ្លើយតបនឹងវិទ្យុបារាំងអន្តរជាតិRFIយ៉ាងខ្លីថាលោក សម រង្ស៊ី«ដើរតែ ចោទប្រកាន់ ភូតភរ បោកប្រាស់គេ តែប៉ុណ្ណោះ នេះជារបររកស៊ីរបស់គាត់»។
លោក សម រង្ស៊ី ដែលមិនអាចឡើងជិះយន្តហោះ Thai Airways ដើម្បីចេញពីទីក្រុងប៉ារីសប្រទេសបារាំងទៅកាន់ទីក្រុងបាងកកប្រទេសថៃ កាលពីម្សិលមិញ គឺដោយសារតែសំបុត្រយន្តហោះរបស់លោកខុសថ្ងៃហោះហើរ ដែល លោក សម រង្ស៊ី ចោទថា មកពីខាងរដ្ឋាភិបាលកម្ពុជាជា«អ្នកលួចចូលទៅដូរថ្ងៃហោះហើររបស់លោក» ព្រោះតែលោកបានបង្ហោះសំបុត្រយន្តហោះនៅតាមហ្វេសប៊ុកដែលគេយកលេខសំងាត់ទៅដូរជើងហោះហើរបាន។
មន្ត្រីក្រុមហ៊ុនអាកាសចរណ៍ Thai Airways បានបញ្ជាក់ថា «ការដូរថ្ងៃហោះហើរ ឬជើងហោះហើរ គឺមានតែអតិថិជនផ្ទាល់ខ្លួនឯងប៉ុណ្ណោះ មានសិទ្ធិប្តូរសំបុត្រយន្តហោះ ប្រសិនបើជើងហោះហើរផ្សេងណាមួយនៅទំនេរគឺអតិថិនជនអាចដូរដោយខ្លួនឯងតាមរយៈ (Online Ticketing) ប៉ុន្តែសម្រាប់ មន្រ្តីក្រុមហ៊ុនគ្មានសិទ្ធិលួចដូរជាដាច់ខាត នេះគឺជាបំរាមយ៉ាងច្បាស់លាស់របស់ក្រុមហ៊ុន»។ នេះបើតាមបណ្តាញព័ត៌មាន Fresh News ស្និទនឹងរដ្ឋាភិបាលកម្ពុជា។
បើតាមបុគ្គលិកម្នាក់នៅក្រុមហ៊ុនមួយដែលលក់សំបុត្រយន្តហោះនៅទីក្រុងភ្នំពេញបានបញ្ជាក់ប្រាប់វិទ្យុបារាំងអន្តរជាតិRFIថា សំបុត្រយន្តហោះគេអាចចូលទៅដូរពេលវាហោះហើរបានតាមប្រព័ន្ធ Online តែវាអាស្រ័យលើជើងហោះហើរផ្សេងមានកៅអីទំនេរឬអត់។ ហើយថាការដូរបានឬមិនបាន គឺអាស្រ័យលើក្រុមហ៊ុនជាអ្នកសម្រេចគឺមិនអាចឲ្យអតិថិជនប្តូរបានដោយខ្លួនឯងឡើយ។
យ៉ាងណាក៏ដោយ ក្រៅតែពីបញ្ហាសំបុត្រយន្តហោះនេះ លោក សម រង្ស៊ី ក៏បានអះអាងថា បញ្ហានយោបាយគឺជារឿងមួយទៀតដែលបុគ្គលិកក្រុមហ៊ុនល្បីឈ្មោះ Thai Airways មួយនេះ បានប្រាប់លោកថា មានថ្នាក់ដឹកនាំកំពូលថៃបានហាមប្រាមមិនឲ្យដឹកមេដឹកនាំបក្សប្រឆាំងកម្ពុជារូបនេះចូលប្រទេសថៃឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ