គម្រោងអប់រំ និងផ្លូវថ្នល់ មានទឹកប្រាក់ ២០០លានដុល្លារ ត្រូវបានចុះហត្ថលេខា ដោយ ធនាគារពិភពលោក និងរដ្ឋាភិបាលខ្មែរ
ធនាគារពិភពលោក និងរដ្ឋាភិបាលកម្ពុជា នៅថ្ងៃព្រហស្បតិ៍នេះ បានចុះហត្ថលេខាលើកិច្ចព្រមព្រៀងជាមួយគ្នា ផ្តោតទៅលើគម្រោងវិនិយោគធំៗចំនួនពីរ គឺទីមួយ មានគោលដៅបង្កើនគុណភាពប្រព័ន្ធអប់រំសម្រាប់ការអភិវឌ្ឍឧស្សាហកម្ម និងទី២ ផ្តោតទៅលើការពង្រីកបណ្តាញផ្លូវគមនាគមន៍ពីមជ្ឈមណ្ឌលសេដ្ឋកិច្ចក្នុងរាជធានីភ្នំពេញ ទៅកាន់កំពង់ផែទឹកជ្រៅសមុទ្រ ស្ថិតនៅក្នុងខេត្តព្រះសីហនុ។ គម្រោងទាំងពីរនេះ មានទឹកប្រាក់ហិរញ្ញប្បទានសរុបចំនួន ២០០លានដុល្លារ។
ចុះផ្សាយនៅថ្ងៃ៖
ស្តាប់ - ០២:៣៣
គម្រោងកែលម្អការអប់រំថ្នាក់ឧត្តមសិក្សា (HEICP) និង គម្រោងគ្រប់គ្រងសម្បត្តិផ្លូវថ្នល់ ជំហាន២ (RAMP II) បានទទួលការអនុម័តដោយក្រុមប្រឹក្សានាយកប្រតិបត្តិរបស់ធនាគារពិភពលោក តាមលំដាប់លំដោយ កាលពីថ្ងៃទី២៨ ខែមេសា ឆ្នាំ២០១៨ និងថ្ងៃទី២១ ខែមិថុនា ឆ្នាំ២០១៨។ នេះបើតាមសេចក្តីប្រកាសរបស់ធនាគារពិភពលោក នៅថ្ងៃនេះ។
តាមរយៈគម្រោងកែលម្អការអប់រំថ្នាក់ឧត្តមសិក្សា HEICP ដែលមានតម្លៃទឹកប្រាក់ ៩០លានដុល្លារ ធនាគារពិភពលោក នឹងជួយដល់ការខិតខំ របស់ប្រទេសកម្ពុជា ក្នុងការបង្កើនគុណភាពប្រព័ន្ធអប់រំឧត្តមសិក្សា និងការស្រាវជ្រាវ ដើម្បីពង្រីកឱ្យកាន់តែទូលាយថែមទៀតនូវលទ្ធភាពទទួលបានការអប់រំឧត្តមសិក្សាសម្រាប់សិស្សក្រីក្រ។ គម្រោងនេះមានរយៈពេល៦ឆ្នាំ ដែលនឹងផ្តោតទៅលើការកែលម្អមុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម គណិតសាស្ត្រ ព្រមទាំងកម្មវិធីសិក្សាផ្នែកកសិកម្មផងដែរ។
សកម្មភាពធំៗទាំងប្រាំរបស់គម្រោងនេះរួមមាន៖ ការផ្តល់មូលនិធិសម្រាប់ការស្រាវជ្រាវនៅតាមផ្នែកមុខវិជ្ជាអាទិភាព ការបង្កើនចំនួនថ្នាក់រៀន និងមន្ទីរពិសោធន៍ ការសង់និវេសនដ្ឋានសម្រាប់និស្សិតក្រីក្រស្នាក់នៅ និស្សិតមកពីតំបន់ដាច់ស្រយាល រួមទាំងនិស្សិតស្ត្រីផងដែរ ការពង្រឹងប្រព័ន្ធធានាគុណភាព ប្រព័ន្ធព័ត៌មាន ការសហការជាមួយដៃគូអន្តរជាតិ ដើម្បីកែលម្អកម្មវិធី និងវិធីសាស្ត្របង្រៀនលើមុខវិជ្ជាអាទិភាព។
ដោយឡែក ទឹកប្រាក់ចំនួន ១១០លានដុល្លារ ដែលជាហិរញ្ញប្បទានបន្ថែម សម្រាប់គម្រោង គ្រប់គ្រងសម្បត្តិផ្លូវថ្នល់ ជំហាន២ RAMP II មានគោលដៅកែលម្អលក្ខខណ្ឌ សុវត្ថិភាព និងភាពធន់អាកាសធាតុរបស់ផ្លូវជាតិលេខ៤ ដែលកំពុងរងសម្ពាធចរាចរណ៍យ៉ាងមមាញឹក ឆ្លងកាត់តំបន់សេដ្ឋកិច្ច និងតំបន់កសិកម្មសម្បូរបែបជាច្រើនកន្លែង។ ជំនួយហិរញ្ញប្បទានបន្ថែមនេះ នឹងត្រូវបានប្រើប្រាស់ សម្រាប់បង្កើនគុណភាពបណ្តោយផ្លូវចម្ងាយជាង២០០គីឡូម៉ែត្រ ឱ្យល្អជាងមុន និងការរៀបចំកែលម្អចិញ្ចើមសងខាងផ្លូវ ដាក់លូបង្ហូរទឹក និងធ្វើស្ពាន តាមរចនាបទបែបនវានុវត្តន៍ និងមានភាពធន់ទៅនឹងអាកាសធាតុ។
គម្រោងនេះ ក៏នឹងផ្តោតផងដែរទៅលើការបង្កើនគុណភាពស្ថានីយថ្លឹងទម្ងន់រថយន្តធំដែលមានស្រាប់ កាត់បន្ថយហានិភ័យនៃការដឹកលើសទម្ងន់ ដំឡើងសញ្ញាតំបន់ល្បឿនមានកម្រិត សញ្ញានាំផ្លូវ ប្រព័ន្ធភ្លើងបំភ្លឺប្រើថាមពលពន្លឺព្រះអាទិត្យ និងកាម៉េរ៉ាចាប់ល្បឿនបើកបរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ