រដ្ឋាភិបាលកម្ពុជា៖ ករណីស្លាប់ដោយសារជំងឺគ្រុនចាញ់ ត្រូវបានកាត់បន្ថយបាន៩៩%ដល់ពេលបច្ចុប្បន្ន
ទិវាជាតិប្រយុទ្ធនឹងជំងឺគ្រុនចាញ់ និងទិវាគ្រុនចាញ់ពិភពលោកនឹងប្រារព្ធធ្វើឡើងនៅថ្ងៃទី២៥ ខែមេសា ឆ្នាំ២០១៩ ខាងមុខនេះក្រោមប្រធានបទ«គ្មានជំងឺគ្រុនចាញ់ ផ្ដើមចេញពីខ្ញុំ»។ ឆ្លៀតឱកាសនេះ រដ្ឋាភិបាលកម្ពុជា បានបង្ហាញឱ្យដឹងថា មកដល់ពេលនេះ ករណីស្លាប់ដោយសារតែជំងឺគ្រុនចាញ់ត្រូវបានកាត់បន្ថយបាន៩៩%ហើយ។ ទោះជាបែបនេះក្តី លោកនាយករដ្ឋមន្រ្តីហ៊ុន សែន បានក្រើនរំឮកដល់ភាគីពាក់ព័ន្ធកុំឱ្យភ្លេចខ្លួន គឺត្រូវយកចិត្តទុកដាក់លុបបំបាត់ជំងឺនេះនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:១២
របាយការណ៍ប្រចាំឆ្នាំក្នុងសេវាសុខាភិបាលសាធារណៈរបស់កម្មវិធីជាតិប្រយុទ្ធនឹងជំងឺគ្រុនចាញ់បានបង្ហាញថា អត្រាជំងឺគ្រុនចាញ់នៅកម្ពុជាមកទល់ឆ្នាំ២០១៨ បានថយចុះ៨៥% ហើយករណីស្លាប់បានកាត់បន្ថយ៩៩% បន្ទាប់ពីដំណើរការអនុវត្តផែនការយុទ្ធសាស្រ្តជាតិលុបបំបាត់ជំងឺគ្រុនចាញ់ឆ្នាំ២០១១-២០២៥។ តាមរបាយការណ៍ដដែល នេះមានន័យថា ករណីគ្រុនចាញ់ជាង១៧ម៉ឺនករណី និងស្លាប់ចំនួនពី៤៤៦នាក់ទៅ៨៩១នាក់ក្នុងមួយឆ្នាំៗកាលពីមុនឆ្នាំ២០១១ ត្រូវបានកាត់បន្ថយមកត្រឹមជាង៦ម៉ឺនករណី និង មិនមានស្លាប់សោះនៅក្នុងឆ្នាំ២០១៨កន្លងទៅនេះ។ សម្រាប់រដ្ឋាភិបាលកម្ពុជា នេះជាលទ្ធផលនៃការអនុវត្តការងារប្រយុទ្ធនឹងជំងឺគ្រុនចាញ់មានប្រសិទ្ធភាពខ្ពស់របស់អាជ្ញាធរ។
បើទោះជាបែបនេះក្តី នៅក្នុងលិខិតថ្លែងក្នុងឱកាសទិវាជាតិប្រយុទ្ធនឹងជំងឺគ្រុនចាញ់ដែលទើបចេញផ្សាយជាសាធារណៈនៅថ្ងៃព្រហស្បត្តិ៍នេះ លោកនាយករដ្ឋមន្រ្តីហ៊ុន សែន បានប្រាប់ទៅភាគីពាក់ព័ន្ធកុំឱ្យមានការភ្លេចខ្លួននឹងលទ្ធផលនេះ។ បើតាមលោកនាយករដ្ឋមន្រ្តី រដ្ឋាភិបាលកម្ពុជាតែងតែផ្តល់លទ្ធភាព និង លើកទឹកចិត្តឱ្យមានចលនាគៀរគរប្រមូលប្រភពធនធាន ដើម្បីជំរុញការងារប្រយុទ្ធនឹងជំងឺគ្រុនចាញ់ឱ្យកាន់តែមានសកម្មភាពខ្លាំងក្លាបន្ថែមទៀតឆ្ពោះទៅលុបបំបាត់ជំងឺនេះឱ្យបានតាមផែនការកំណត់។
សូមបញ្ជាក់ថា ទិវាជាតិប្រយុទ្ធនឹងជំងឺគ្រុនចាញ់ និងទិវាគ្រុនចាញ់ពិភពលោកនៅឆ្នាំនេះនឹងប្រារព្ធធ្វើឡើងនៅថ្ងៃទី២៥ ខែមេសា ខាងមុខនេះ ក្រោមប្រធានបទ«គ្មានជំងឺគ្រុនចាញ់ ផ្ដើមចេញពីខ្ញុំ»។ ចំណែក រដ្ឋាភិបាលកម្ពុជានឹងរៀបចំទិវានេះនៅថ្ងៃទី២២ ខែមេសា ឆ្នាំ២០១៩ នៅក្នុងស្រុកកោះញែក ខេត្តមណ្ឌលគិរី ដោយមានការចូលរួមពីលោក ម៉ម ប៊ុនហេង រដ្ឋមន្រ្តីក្រសួងសុខាភិបាល។ លោកនាយករដ្ឋមន្រ្តីហ៊ុន សែន បានគូសបញ្ជាក់ថា ទិវានេះប្រារព្ធឡើងក្នុងគោលបំណងជំរុញ និងបំផុសការយល់ដឹង និងយកចិត្តទុកដាក់កាន់តែខ្ពស់បន្ថែមទៀត ក្នុងការលើកកម្ពស់សុខុមាលភាពសង្គម និងសំដៅរួមចំណែកដល់ការថែរក្សាសុខាភាពរបស់ប្រជាពលរដ្ឋកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ