ក្រោយដោះលែងលោក សួន សេរីរដ្ឋា ទំនាស់ដណ្តើមគ្រប់គ្រងបក្សបានកើតឡើង
អនុប្រធានគណបក្សអំណាចខ្មែរ លោក ប៉ែន ស៊ាប នៅថ្ងៃទី២៧សីហាម្សិលមិញបានប្រកាសគាំទ្របេក្ខភាព លោក សួន សេរីរដ្ឋា មកដឹកនាំគណបក្សអំណាចខ្មែរវិញ។ អ្វីជាការកត់សម្គាល់ ការប្រកាសនេះធ្វើឡើងផ្ទុយពីការអះអាងរបស់ លោក សួង សុភ័ណ្ឌ ដែលបច្ចុប្បន្នជាប្រធានគណបក្សអំណាចខ្មែរថា គណបក្សគ្មានផែនការធ្វើសមាជដើម្បីផ្លាស់ប្ដូរមេដឹកនាំកំពូល ឬនិយាយឲ្យសាមញ្ញថា គ្មានផែនការធ្វើសមាជទទួលយកលោក សួន សេរីរដ្ឋា មកដឹកនាំបក្សវិញឡើយ។
ចុះផ្សាយនៅថ្ងៃ៖
ស្តាប់ - ០២:០៣
«ការបង្ហាញជំហរមិនទទួលយក លោក សួន សេរីរដ្ឋា មកដឹកនាំគណបក្សវិញពីសំណាក់លោក សួង សុភ័ណ្ឌ គឺមិនមែនជាតំណាងឲ្យឆន្ទៈរបស់គណបក្ស ឬឆន្ទៈរបស់សមាជិកគណបក្សនោះទេ»។ នេះគឺជាការអះអាងរបស់ លោក ប៉ែន ស៊ាប អនុប្រធានគណបក្សអំណាចខ្មែរ តាមរយៈសេចក្ដីជូនដំណឹងចុះថ្ងៃទី២៧សីហាម្សិលមិញ។
បើតាមលោកអនុប្រធានបក្សរូបនេះ សម្ដីលោក សួង សុភ័ណ្ឌ ធ្វើឡើងតែម្នាក់ឯងគត់ដោយមិនមានការប្រជុំពិភាក្សាពីតំណាង សមាជិកសមាជិកា ក្រុមប្រឹក្សានយោបាយនិងអនុប្រធានណាមួយរបស់បក្សឡើយ។ ហើយសមាជិកនៃសមាសភាពទាំងនេះ នឹងស្នើទៅក្រសួងមហាផ្ទៃ ដើម្បីពិនិត្យមើលភាពស្របច្បាប់នៃសមាជរបស់គណបក្សក្រោយការចាប់ខ្លួនលោក សួន សេរីរដ្ឋា តើស្របតាមលក្ខន្តិកៈបក្ស និងស្របច្បាប់ឬអត់។
នៅក្នុងបទសម្ភាសជាមួយវិទ្យុបារាំងអន្តរជាតិ នៅថ្ងៃទី២៦សីហា លោក សួង សុភ័ណ្ឌ កំពុងកាន់តំណែងជាប្រធានគណបក្សអំណាចខ្មែរបានគូសបញ្ជាក់ថា ការណ៍ដែលគណបក្សមិនធ្វើសមាជទទួលយក លោក សួន សេរីរដ្ឋា មកដឹកនាំបក្សវិញ ព្រោះ លោក សួន សេរីរដ្ឋា សរសេរលិខិតសុំទោស លោកនាយករដ្ឋមន្ត្រី ហ៊ុន សែន ដោយពុំបានឆ្លងយោបល់បក្ស។ ចំណុចនេះធ្វើឲ្យប៉ះពាល់កិត្តយសបក្សអំណាចខ្មែរ ដែលជាបក្សប្រឆាំងដាច់ខាតជាមួយគណបក្សដឹកនាំរដ្ឋាភិបាល។ នេះបើតាម លោក សួង សុភ័ណ្ឌ។
ប៉ុន្តែយ៉ាងណាមិញសម្រាប់ លោក សួន សេរីរដ្ឋា ថា ការសរសេរលិខិតសុំទោសរបស់លោក ជូនចំពោះលោកនាយករដ្ឋមន្ត្រី ហ៊ុន សែន ក៏ដូចជាមន្ត្រីក្នុងជួរកងទ័ព ព្រោះលោកដឹងពីកំហុសនៃការបញ្ចេញមតិថា បានប៉ះពាល់ដល់កិត្តយសកងទ័ពមួយចំនួន។
ចំពោះលោក សួន សុភ័ណ្ឌ ទង្វើលោក សួន សេរីរដ្ឋា សរសេរលិខិតសុំទោស លោក ហ៊ុន សែន បែបនេះ នាំឲ្យពលរដ្ឋយល់ថា បក្សអំណាចខ្មែរមិនខុសពីបក្សផ្សេង ដែលរណបរដ្ឋាភិបាលឡើយ។
សូមបញ្ជាក់ថា លោកសួន សេរីរដ្ឋា គឺជាស្ថាបនិកគណបក្សអំណាចខ្មែរ។ ក្រោយត្រូវបានអាជ្ញាធរចាប់ឃុំខ្លួនក្នុងសំណុំប្រមាថកងទ័ព លោកក៏សម្រេចផ្ទេរតំណែងគ្រប់គ្រងបក្សទៅឲ្យ លោក សួង សុភ័ណ្ឌ ដឹកនាំជំនួស។ ក្រោមការដឹកនាំរបស់លោក សួង សុភ័ណ្ឌ គណបក្សអំណាចខ្មែរ មិនបានចូលរួមការបោះឆ្នោតកាលពីថ្ងៃទី២៩ ខែកក្កដាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ