ADB នឹងផ្តល់កម្ចីជាង៣០លានដុល្លារ ដល់រោងម៉ាស៊ីនកិនស្រូវនៅកម្ពុជា
ធនាគារអភិវឌ្ឍន៍អាស៊ីហៅកាត់ថា ADB គ្រោងផ្តល់កម្ចីរហូតដល់ជាង៣០លានដុល្លារទៅកាន់រោងម៉ាស៊ីនកិនស្រូវចំនួន១០ នៅកម្ពុជា ។ បើតាម ADB ការផ្តល់កម្ចីនេះជាការរួមចំណែកជួយវិស័យស្រូវ-អង្ករកម្ពុជា។ លោក ហ៊ុន ឡាក់ អនុប្រធានសហព័ន្ធស្រូវអង្ករនៅកម្ពុជា រំពឹងថា តាមរយៈប្រាក់កម្ចីពី ADB កម្ពុជានឹងអាចនាំចេញអង្ករទៅក្រៅប្រទេសកាន់តែច្រើន ទៅតាមផែនការដែលបានកំណត់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ADB គ្រោងនឹងផ្តល់កម្ចីរហូតដល់ជាង៣លានដុល្លារទៅកាន់រោងម៉ាស៊ីននីមួយៗ ក្នុងចំណោមរោងម៉ាស៊ីនទាំង១០ ដែលបានសិក្សាកន្លងមក។ បើតាមមន្រ្តីជំនាញនៃស្ថាប័នស្រាវជ្រាវនិងអភិវឌ្ឍន៍ SBK កន្លងមកគម្រោងអភិវឌ្ឍន៍វិស័យស្រូវអង្ករ របស់ ADB បានសិក្សានៅលើខេត្តចំនួន៣ គឺ ខេត្តព្រៃវែង កំពង់ធំ និងបាត់ដំបង និងមានប្រព័ន្ធស្រោចស្រពដែលអាចគ្របដណ្តប់លើផ្ទៃដីបានរហូតដល់ជាង ១ម៉ឺន ហិចតា។
ការលើកឡើងយ៉ាងដូច្នេះ ធ្វើឡើងនៅក្នុងជួបពិភាក្សា ស្តីពី គម្រោងអភិវឌ្ឍន៍វិស័យស្រូវអង្ករ កាលពីថ្ងៃទី៩ សីហា រវាង មន្រ្តីជំនាញនៃស្ថាប័នស្រាវជ្រាវនិងអភិវឌ្ឍន៍ SBK និងអគ្គលេខាធិការសហព័ន្ធស្រូវអង្ករកម្ពុជា។
លោក មូល សារិទ្ធី អគ្គលេខាធិការសហព័ន្ធស្រូវអង្ករកម្ពុជា ក៏បានទាមទារឲ្យគ្រប់ភាគីពាក់ព័ន្ធ បន្តចូលរួមកាន់តែច្រើន ដើម្បីជួយពិនិត្យលទ្ធភាព ក្នុងការផ្តល់កម្ចីដែលមានអត្រាការប្រាក់ទាប ដល់រោងម៉ាស៊ីន និងដល់សហគមន៍កសិកម្ម។ កន្លងមក សហគមន៍កសិកម្មនៅមានការខ្វះខាតដើមទុនច្រើន ពិសេសដើមទុនសម្រាប់ធ្វើទំនើបកម្មកសិកម្មបានដោយខ្លួនឯង។
គួរជម្រាបជូនថា ក្រៅពីធនាគារ ADB រដ្ឋាភិបាលកម្ពុជាទើបបានបង្កើនឥណទានជាទុនបង្វិល ដល់៥០លានដុល្លារ ដែលជាកញ្ចប់ថវិកា ពិសេសរបស់រដ្ឋចំនួន ៤៣លានដុល្លារ និងមូលនិធិផ្ទាល់របស់ធនាគារអភិវឌ្ឍន៍ជនបទចំនួន៧លានដុល្លារ ដើម្បីទ្រទ្រង់វិស័យស្រូវ-អង្ករនៅកម្ពុជា។
ការនាំចេញអង្គរនៅឆ្នាំ២០១៨នេះ ត្រូវបានសហព័ន្ធស្រូវអង្ករកម្ពុជា ព្យាករណ៍ថា អាចនឹងមានការថយចុះតិចជាងឆ្នាំមុន។ ថយចុះដោយសារតែ កម្ពុជា មិនទាន់មានរោងឃ្លាំងស្តុកស្រូវគ្រប់គ្រាន់ រោងម៉ាស៊ីនកិនស្រូវភាគច្រើនមិនមានស្រូវនៅក្នុងស្ដុក ខណៈសមត្ថភាពឃ្លាំងស្ដុកនៅមានកម្រិត គួបផ្សំនឹងការប្រកួតប្រជែងទីផ្សារនៃប្រទេសក្បែរខាងផង។
យ៉ាងណាក៏ដោយ លោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា រំពឹងទុកថា តាមរយៈការផ្តល់ប្រាក់កម្ចីនេះ នឹងអាចជួយជម្រុញឱ្យកម្ពុជា អាចនាំចេញអង្ករ ទៅក្រៅប្រទេសកាន់តែច្រើន។ ខណៈសហព័ន្ធស្រូវអង្ករកម្ពុជា មានគម្រោងជម្រុញការនាំអង្ករចេញឱ្យបាន១លាន៥សែនតោនក្នុង១ឆ្នាំ នៅឆ្នាំ ២០២១ ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ