អ្នកសង្កេតការណ៍ស្ម័គ្រ ជាង៤ពាន់នាក់នឹងចូលរួម សង្កេតការណ៍លើការប្រឡងបាក់ឌុបឆ្នាំ២០១៧
ការប្រឡងមធ្យមសិក្សាទុតិយភូមិដែលប្រព្រឹត្តទៅនៅថ្ងៃទី២១ សីហាខាងមុខ អង្គភាពប្រឆាំងអំពើពុករលួយនឹងដាក់អ្នកសង្កេតការណ៍ចំនួន ៤៥១០ នាក់ លើបន្ទប់ប្រឡងចំនួន៤១៥៤ បន្ទប់ ទូទាំងប្រទេស។អ្វីដែលជាការកត់សម្គាល់នោះគឺ អ្នកសង្កេតការណ៍មានសិទ្ធិពិសេស អាចកាន់ទូរសព្ទ និងអាចថតភាពមិនប្រក្រតីក្នុងមណ្ឌលបាន។
ចុះផ្សាយនៅថ្ងៃ៖
ស្តាប់ - ០១:៥៨
អត្ថបទដោយ៖ ជក់ សុភា
ចំនួនអ្នកសង្កេតការណ៍ស្ម័គ្រចិត្តនៅក្នុងឆ្នាំនេះ ថយចុះបើធៀបនឹងឆ្នាំ២០១៦ ដែលមានប្រមាណជាង ៦ ពាន់នាក់។ នេះបើតាមការបញ្ជាក់ របស់ លោកស្រី ម៉ា សូយ៉ិនដា ឧបការីនៃអង្គភាពប្រឆាំងអំពើពុករលួយ។ លោកស្រីបន្តថា ការថយចុះនេះដោយសារ អង្គភាពប្រឆាំងអំពើពុករលួយបានកំណត់ចំនួនអ្នកសង្កេតការណ៍ស្របទៅតាមបន្ទប់ប្រឡង។ ជាបទពិសោធន៍កាលពីពេលកន្លងទៅ ចំនួនអ្នកសង្កេតការណ៍ច្រើនរហូតដល់មួយបន្ទប់មានអ្នកស្ម័គ្រចិត្ត ៤ទៅ៥នាក់ ហើយគាត់ ជជែកគ្នាលេង ដែលរំខានដល់បេក្ខជន។
គួរបញ្ចាក់ផងដែរថា អ្នកសង្កេតការណ៍ដែលចូលរួមក្នុងការប្រឡងឆ្នាំនេះ មកពីសាកលវិទ្យាល័យនានា បុគ្គល អង្គការ ក្រុមហ៊ុនឯកជន ព្រះសង្ឃ សហភាពសហព័ន្ធយុវជនកម្ពុជា និង អ្នកសង្កេតការណ៍បរទេសចំនួន ២នាក់។
ទន្ទឹមនឹងនេះ មុននឹងចេញទៅសង្កេតការណ៍ អង្គភាពប្រឆាំងអំពើពុករលួយបាន បណ្តុះបណ្តាលអំពី តួនាទីរបស់អ្នកសង្កេតការណ៍ សារាចរណែនាំរបស់រាជរដ្ឋាភិបាល ច្បាប់អប់រំ ច្បាប់សហលក្ខន្តិកៈមន្ត្រីរាជការ ច្បាប់ប្រឆាំងអំពើពុករលួយ និងបទបញ្ញាត្តិផ្សេងៗរបស់ក្រសួងអប់រំដែលដាក់កម្រិតវិន័យទៅលើបេក្ខជនប្រឡង និងបុគ្គលិកអប់រំ ។
លោកស្រី ម៉ា សូយ៉ិនដា បានប្រាប់វិទ្យុបារាំងថា អ្នកសង្កេតការណ៍មានសិទ្ធិអាចយកទូរសព្ទចូលក្នុងមណ្ឌលប្រឡងបាន ហើយពួកគេអាចថតសកម្មភាពល្អ និងភាពមិនប្រក្រតី ផុសជាសាធារណៈ ព្រោះពួកគាត់ជាភ្នែក ជាច្រមុះរបស់ប្រជាពលរដ្ឋទូទៅ។
យ៉ាងណាមិញ អ្នកសង្កេតការណ៍ស្ម័គ្រចិត្ត នឹងទទួលបានចំណេះដឹង ពោលគឺការយល់ដឹងពីច្បាប់ និងបទពិសោធន៍ក្នុងការងារសង្គម។មួយវិញទៀត អ្នកសង្កេតការណ៍នឹងទទួលបាននូវវិញាបនបត្រថ្លែងអំណរគុណក្រោយពេលបំពេញការងារ រីឯ ការឧបត្ថម្ភថវិកាគឺពុំមាននោះទេ។
គួររំលឹកផងដែរថា ក្រសួងអប់រំ បានសហការជាមួយ អង្គភាពប្រឆាំងអំពើពុករលួយចំនួន៣លើកមកហើយ គឺ លើកទី១ ក្នុងសម័យប្រឡងបាក់ឌុបឆ្នាំ២០១៤ មានចំនួនជាង៣ពាន់នាក់ លើកទី២ សម័យប្រឡងឆ្នាំ២០១៥ មានចំនួនជាង៥ពាន់នាក់ និងលើកទី៣សម័យប្រឡងឆ្នាំ២០១៦មានចំនួនជាង៦ពាន់នាក់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ