លោក សម រង្ស៊ី៖ មិនចាំបាច់ទាល់តែសោះដែលលោកហ៊ុន សែន ទិញអាវុធពីចិន
ពីប្រទេសបារាំង លោក សម រង្ស៊ី បានចេញមុខរិះគន់ថា មិនមានភាពចាំបាច់ទាល់តែ សោះដែល លោកនាយករដ្ឋមន្ត្រី ហ៊ុន សែន ប្រកាសទិញអាវុធរាប់ម៉ឺនដើមពីប្រទេសចិន ខណៈកម្ពុជា ជាប្រទេសក្រីក្រមួយក្នុងពិភពលោក។ តែផ្ទុយមកវិញអ្នកវិភាគមើលឃើញថា ការទិញអាវុធដើម្បីការពារជាតិ ក្នុងកាលៈទេសៈបច្ចុប្បន្នគឺជាពេលវេលាមួយសមស្រប។
ចុះផ្សាយនៅថ្ងៃ៖ កែប្រែថ្ងៃទី៖
លោក សម រង្ស៊ី ប្រធានស្ដីទីនៃអតីតគណបក្សប្រឆាំងបានគូសបញ្ជាក់ថា កម្ពុជាមិនប្រឈមនឹងការគំរាមកំហែងពីខាងក្រៅឡើយ ដូច្នេះការទិញអាវុធពីចិនយកមកប្រើប្រាស់ក្នុងកាលៈទេសៈបច្ចុប្បន្នដូចមិនចាំបាច់ទាល់តែសោះ។ មិនចាំបាច់ព្រោះថា កម្ពុជាស្ថិតក្នុងចំណោមប្រទេសក្រីក្រជាងគេបំផុតក្នុងពិភពលោកដោយសារប្រព័ន្ធអប់រំ និងសុខាភិបាល នៅកម្ពុជា មានភាពរយីករយាក មិនអាចបម្រើសេចក្តីត្រូវការរបស់ប្រជាពលរដ្ឋបាន។ បើតាមលោក សម រង្ស៊ី ការប្រកាសពីការទិញអាវុធពីសំណាក់លោក ហ៊ុន សែនគឺដើម្បីបង្ក្រាបមកលើពលរដ្ឋខ្លួនឯងទៅវិញទេ។
ការរិះគន់របស់លោក សម រង្ស៊ី ដែលជាប្រធានស្ដីទីនៃអតីតគណបក្សប្រឆាំងធ្វើឡើងមួយថ្ងៃបន្ទាប់ពីលោកនាយករដ្ឋមន្រ្តី ហ៊ុន សែន កាលពីថ្ងៃ២៩ខែកក្កដា ប្រកាសបញ្ចេញកញ្ចប់ថវិកាជាតិ ជិត៤០លានដុល្លារ បន្ថែមទៀត លើទឹកប្រាក់ដែលមានស្រាប់២៩០លានដុល្លារទិញអាវុធពីប្រទេសចិនដើម្បីពង្រឹងសមត្ថភាពកងទ័ពសម្រាប់ការពារជាតិ។
លោក ឯម សុវណ្ណរ៉ា អ្នកជំនាញខាងវិទ្យាសាស្រ្តនយោបាយ មើលឃើញថា កាលៈទេសៈបច្ចុប្បន្នការទិញអាវុធដើម្បីការពារជាតិគឺជាពេលវេលាមួយសមស្រប។ ប៉ុន្តែការប្រកាសទិញអាវុធពីចិនរបស់លោក ហ៊ុន សែន បានផ្ដល់ចំណុចអវិជ្ជមាន និងវិជ្ជមាន។ វិជ្ជមានបង្ហាញពីតម្លាភាពរបស់រដ្ឋាភិបាល តែចំណុចអវិជ្ជមានបង្ហាញពីជំហរលម្អៀងរបស់កម្ពុជាទៅរកចិន។ បន្ថែមលើនេះ អ្នកវិភាគដដែល បង្ហាញក្ដីព្រួយបារម្ភចំពោះគុណភាពសព្វាវុធដែលទិញពីចិន។
ចំណែក លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាបានគូសបញ្ជាក់ថា រដ្ឋាភិបាលជាស្ថានប័នមួយទទួលខុសត្រូវចំពោះជោគវាសនាប្រទេសជាតិ ដូច្នេះបុគ្គលផ្សេងគ្មានសិទ្ធិបញ្ចេញមតិលើការទិញអាវុធឡើយ។ ការទិញអាវុធនេះទៀតសោត ក៏ដើម្បីយកមកការពារសុវត្ថិភាពក្រុមគ្រួសារបុគ្គលដែលរិះគន់ការទិញអាវុធរបស់រដ្ឋាភិបាលដែរ។
រីឯការរិះគន់របស់លោក សម រង្ស៊ី អំពីភាពទន់ខ្សោយនៃប្រព័ន្ធអប់រំនិងសុខាភិបាល លោកស៊ីផានអះអាងថា រៀងរាល់ឆ្នាំរដ្ឋាភិបាលបានបន្ថែមកញ្ចប់ថវិកាពង្រឹងដល់វិស័យទាំងពីររួចរាល់ហើយ ខណៈការចំណាយលុយទិញលើការអាវុធជាថវិកាសល់ពីការចំណាយលើវិស័យយោធាផ្សេងទៀតប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ