លោក ហ៊ុន សែន៖ ការបញ្ចូលល្ខោនខោលទៅក្នុងបញ្ជីអរូបីរបស់យូណេស្កូជាមោទកភាពថ្មីមួយទៀតសម្រាប់កម្ពុជា
នៅថ្ងៃទី២៨ ខែវិច្ឆិកា ម្សិលមិញ គណៈកម្មការអន្តររដ្ឋាភិបាលសម្រាប់ការការពារបេតិកភណ្ឌវប្បធម៌អរូបីរបស់អង្គការយូណេស្កូនៅក្រុងព័រល្វី សាធារណរដ្ឋម៉ូរីស បានអនុម័តយល់ព្រមចុះ ល្ខោនខោល (ល្ខោនខោលវត្តស្វាយអណ្តែត) ចូលក្នុងបញ្ជីបេតិកភណ្ឌវប្បធម៌អរូបី។ ប្រមុខរដ្ឋាភិបាលកម្ពុជាចាត់ទុកការបញ្ចូលល្ខោនខោលទៅក្នុងបញ្ជីអរូបី គឺជាការរួមចំណែកធ្វើឲ្យកេរ្តិ៍ឈ្មោះកម្ពុជាកាន់តែល្បីសុះសាយទូទាំងពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីជូនដំណឹងរបស់ក្រសួងវប្បធម៌កាលពីថ្ងៃម្សិលមិញ បញ្ជាក់ថា ក្រោមការយកចិត្តទុកដាក់របស់រដ្ឋាភិបាល និងក្រសួងវប្បធម៌ ដោយមានកិច្ចសហការគាំទ្រពីសិល្បករ អង្គការសមាគម សង្គមស៊ីវិល ក្នុងវិស័យសិល្បៈវប្បធម៌ និងការជួយគាំទ្រលើកទឹកចិត្តពីមហាជន ប្រជាជន និងយុវជន ទើបកម្ពុជាទទួលបាននូវលទ្ធផលជោគជ័យនៃការដាក់បញ្ចូល លោ្ខនខោល(ល្ខោនខោលវត្តស្វាយអណ្តែត)នៅក្នុងបញ្ជីបេតិកភណ្ឌវប្បធម៌អរូបី។
ចំណែកលោកនាយករដ្ឋមន្ត្រី ហ៊ុន សែន បានចាត់ទុកថានេះគឺជាមោទកភាពថ្មីមួយទៀតសម្រាប់ប្រជាពលរដ្ឋ និងប្រទេសកម្ពុជា ដែលល្ខោនខោល របស់កម្ពុជា ត្រូវបានទទួលស្គាល់ថាជាស្នាដៃសិល្បៈបុរាណវិសេសវិសាលអស្ចារ្យ និងមានតម្លៃជាសកល។
លោកនាយករដ្ឋមន្ត្រីបន្ថែមថា ការបញ្ចូល ល្ខោនខោល ទៅក្នុងបញ្ជីអរូបីនាពេលនេះ គឺជាការរួមចំណែកធ្វើឲ្យកេរ្តិ៍ឈ្មោះរបស់ប្រទេសកម្ពុជាកាន់តែល្បីសុះសាយទូទាំងពិភពលោក ហើយធ្វើឲ្យកម្ពុជាក្លាយជាតួអង្គកាន់តែលេចធ្លោរថែមទៀត នៅលើវេទិកាបេតិកភណ្ឌពិភពលោក។ ភា្លមៗបន្ទាប់ពីទទួលដំណឹងដ៏រីករាយនេះ លោក ហ៊ុន សែន ក៏បានអំពាវនាវដល់ស្ថាប័នរដ្ឋ ថ្នាក់ជាតិ និងថ្នាក់ក្រោមជាតិ រួមទាំងប្រជាពលរដ្ឋកម្ពុជា ចូលរួមវាយគង ទូងស្គ ទះប៉ោត គោះត្រដោក និងប្រើមធ្យោបាយផ្សេងៗ ដើម្បីអបអរសាទរព្រឹត្តិការណ៍ជាប្រវត្តិសាស្ត្រនេះដែលកំណត់ធ្វើនៅម៉ោង១០យប់នាថ្ងៃទី៣០ ខែវិច្ឆិកា ស្អែកនេះ។
យោងតាមគេហទំព័ររបស់អង្គការយូណេស្កូ “ល្ខោនខោលវត្តស្វាយអណ្តែត” របស់កម្ពុជាត្រូវបានដាក់បញ្ចូលទៅក្នុងបញ្ជីបេតិកភ័ណ្ឌវប្បធម៌អរូបី ដែលត្រូវការកិច្ចការពារជាបន្ទាន់ (Need of Urgent Safeguarding)។
សូមជម្រាបជូនថា កម្ពុជាបានបញ្ជូនឯកសារទាក់ទងទៅនឹងល្ខោនខោលទៅអង្គការយូណេស្កូ កាលពីថ្ងៃទី២៩ ខែមីនា ឆ្នាំ២០១៧ ហើយល្ខោនខោលរបស់កម្ពុជាទើបត្រូវបានសម្រេចចុះក្នុងបញ្ជីបេតិកភណ្ឌវប្បធម៌អរូបីកាលពីថ្ងៃទី២៨ ខែវិច្ឆិកា។ រហូតមកដល់ពេលនេះសម្បត្តិវប្បធម៌របស់កម្ពុជា ដែលមានរួមមាន របាំព្រះរាជទ្រព្យ ល្ខោនស្រមោលស្បែកធំ ល្បែងទាញព្រ័ត្រ ចាប៉ីដងវែង និងចុងក្រោយបំផុតគឺល្ខោនខោល ដែលត្រូវបានចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ។
គួរជម្រាបជូនថា ល្ខោនខោលជាទម្រង់សិល្បៈល្ខោនរាំមួយ ដែលមានលក្ខណៈខុសប្លែកពីទម្រង់ល្ខោនដទៃ ព្រោះទម្រង់នេះមានចំណុចជាច្រើន ដែលមិនដូចទម្រង់ឯទៀតដូចជា៖ ល្ខោនខោលជាប្រភេទល្ខោនប្រុសគឺសិល្បករទាំងអស់សូម្បីតែតួស្រីក៏ដោយក៏ត្រូវយកសិល្បករប្រុសមកសំដែងដែរ, ល្ខោនខោល ជាល្ខោនពាក់មុខគ្រប់តួអង្គទាំងអស់, ល្ខោនខោល ជាល្ខោនពោល គឺតួទាំងអស់មិនមាននិយាយ ឬច្រៀងដូចទម្រង់ដទៃទៀតឡើយ។ នេះបើតាមសៀវភៅ ល្ខោនខោល ពេជ្រ ទុំក្រវ៉ិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ