កម្ពុជាអាចទទួលបានជំនួយជាង១០០លានដុល្លារ បើព្រមទទួលយកលក្ខខណ្ឌរបស់អាមេរិក
ប្រទេសកម្ពុជា អាចនឹងទទួលបានជំនួយពីសហរដ្ឋអាមេរិកជាថវិកាប្រមាណ ១១៣លានដុល្លារក្នុងឆ្នាំ២០២០ ប្រសិនបើរដ្ឋាភិបាលកម្ពុជា គោរពរដ្ឋធម្មនុញ្ញឆ្នាំ១៩៩៣ និងមិនឲ្យយោធាចិនឈរជើងលើទឹកដីកម្ពុជា។ ការប្រកាសនេះ គឺស្របពេលដែលសមាជិកសភារបស់សហរដ្ឋអាមេរិកនឹងបើកការពិភាក្សាមួយនៅថ្ងៃទី២១ខែតុលាខាងមុខនេះ ដើម្បីពិនិត្យមើលពីវិធានការមួយចំនួនលើដំណើរការប្រជាធិបតេយ្យ និងការធ្វើពាណិជ្ជកម្មរបស់កម្ពុជា។
ចុះផ្សាយនៅថ្ងៃ៖
តាមសេចក្តីប្រកាសព័ត៌មានមួយកាលពីថ្ងៃសុក្រ សមាជិកសភាអាមេរិក លោក Alan Lowenthal បាននិយាយថា ការពិភាក្សានៅថ្ងៃទី២១ខែតុលា គឺផ្តោតលើការអនុវត្តសន្ធិសញ្ញាសន្តិភាពទីក្រុងប៉ារីស២៣ តុលា ឆ្នាំ១៩៩១។ ដោយផ្តោតពីដំណើរការប្រជាធិបតេយ្យ និងការគោរពសិទ្ធិមនុស្ស រួមទាំងការធ្វើពាណិជ្ជកម្មផងដែរ។
បើតាមសមាជិកសភាអាមេរិករូបនេះ សភាអាមេរិក អាចមានឥទ្ធិពលក្នុងការរុញឱ្យរដ្ឋាភិបាលលោក ហ៊ុន សែន ដែលបានប្រព្រឹត្តិខុសកន្លងមកកែតម្រូវវិញ។
សមាជិកសភាអាមេរិកដែលទទួលបន្ទុកខាងកម្ពុជារូបនេះ ក៏បានបញ្ជាក់ថា រដ្ឋាភិបាលកម្ពុជាបច្ចុប្បន្នបានដើរប្រាស់ចាកពីខ្លឹមសារនៃសន្ធិសញ្ញាទីក្រុងប៉ារីស ដែលតម្រូវឱ្យកម្ពុជាធ្វើដំណើរតាមបែបលទ្ធិប្រជាធិបតេយ្យសេរី ពហុបក្ស។
ការកោះប្រជុំរបស់សមាជិកសភាអាមេរិកនេះ គឺស្របពេលដែលគណៈកម្មាធិការកំណត់ថវិកាចំណាយនៃព្រឹទ្ធសភាអាមេរិកបានអនុម័តថវិការបស់ក្រសួងការបរទេសអាមេរិកសម្រាប់ចាយវាយក្នុងឆ្នាំ២០២០ ក្នុងនោះក៏មានគ្រោងខ្ទង់ចំណាយសម្រាប់ជួយដល់ប្រទេសកម្ពុជាផងដែរ។ ប៉ុន្តែមុននឹងទទួលបានជំនួយ១១៣លានដុល្លារនោះ គឺសហរដ្ឋអាមេរិកមានលក្ខណ្ឌមួយចំនួនជាមួយរដ្ឋាភិបាលកម្ពុជា ដោយតម្រូវឲ្យកម្ពុជាពង្រឹងសន្តិសុខក្នុងតំបន់ទាក់ទងបញ្ហាសមុទ្រចិនខាងត្បូង ហើយអនុវត្តការដាក់ទណ្ឌកូរ៉េខាងជើង និងមិនឲ្យចិនយកទឹកដីកម្ពុជាធ្វើទីតាំងសម្រាប់យោធាចិនឈរជើង ហើយកម្ពុជាត្រូវលើកស្ទួយលទ្ធិប្រជាធិបតេយ្យជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ