អាជ្ញាធរបញ្ជាឲ្យមនុស្សចាកចេញជាបន្ទាន់ក្រោយរកឃើញស្នាមប្រេះក្នុងអគារកម្ពស់៩ជាន់
ពីខេត្តព្រះសីហនុ អគារកម្ពស់៩ជាន់ ទល់មុខរង្វង់មូលតោ២ ស្ថិតក្នុងសង្កាត់លេខ៤ ត្រូវបានមន្ទីររៀបចំដែនដីខេត្តនេះ កាលពីថ្ងៃទី៩ខែសីហា បញ្ជាឲ្យរុះរើជាបន្ទាន់ព្រោះសំណង់ប្រភេទនេះ មិនមានសុវត្ថិភាព ខណៈគុណភាពសំណង់មិនសមស្របតាមលក្ខណៈបច្ចេកទេសសំណង់។ ក្នុងនោះ អាជ្ញាធរបញ្ជាឲ្យមនុស្សរស់ក្នុងអគារឬនៅជិតអគារត្រូវចាកចេញជាបន្ទាន់ក្រោយរកឃើញស្នាមប្រេះ ក្នុងអគារកម្ពស់៩ជាន់នេះ។
ចុះផ្សាយនៅថ្ងៃ៖
បន្ទាប់ពីពិនិត្យឃើញហានិភ័យបែបនេះ គណៈកម្មការត្រួតពិនិត្យគុណភាពសំណង់បានស្នើឲ្យរដ្ឋបាលខេត្តព្រះសីហនុ ចុះទៅផ្អាកការដ្ឋានសាងសង់ជាបន្ទាន់ ហាមស្នាក់នៅ ផ្អាកការប្រកបអាជីវកម្មគ្រប់ប្រភេទក្នុងអគារនិងតម្រូវឲ្យមនុស្សចេញពីអគារទាំងអស់។ ចំណែកប្រជាពលរដ្ឋ ដែលរស់នៅជិតខាងជុំវិញអគារនេះ ត្រូវមានការប្រុងប្រយ័ត្នខ្ពស់ និងត្រូវចាកចេញពីលំនៅដ្ឋានជាបន្ទាន់ រហូតដល់មានការចាត់ចែងរួចរាល់។ នេះជាការគូសបញ្ជាក់នៅក្នុងសេចក្តីជូនដំណឹងរបស់ក្រសួងដែនដីម្សិលមិញ។
សូមជម្រាបជូនថា វិធានការរបស់អាជ្ញាធរនិងភាគីពាក់ព័ន្ធធ្វើឡើងភ្លាមៗ ក្រោយមន្ទីររៀបចំដែនដីនៃខេត្តព្រះសីហនុរកឃើញថា ក្រុមហ៊ុនឈួនរិន ខនស្ត្រាក់សិន អេនជីនារីង សាងសង់អគារកម្ពស់៩ជាន់នេះ គ្មានលិខិតអនុញ្ញាតសាងសង់ និងគ្មានលិខិតអនុញ្ញាតបើកការដ្ឋាន។
ក្រៅពីគ្មានលិខិតបទដ្ឋានគតិយុត្តិ អាជ្ញាធរបានពិនិត្យឃើញផ្ទាល់ភ្នែក គឺជញ្ជាំងជាន់ផ្ទាល់ដីនៃអគារ មានសភាពប្រេះជាច្រើនកន្លែង និងបន្តប្រេះតទៅទៀត ហើយអគារសាងសង់នេះគឺខុសលក្ខណៈបច្ចេកទេសសំណង់ និងខុសនគររូបនីយកម្ម។ រីឯផ្នែកខាងកើត និងខាងលិចនៃអគារមានការស្រុត និងបន្តស្រុតតទៀត។
បើតាមអាជ្ញាធរ ការបញ្ចៀសមនុស្សចេញពីអគារកម្ពស់៩ជាន់ដែលមានស្នាមប្រេះ ក្នុងបំណងទប់ស្កាត់ទុកមុនកុំឲ្យដូចស្ថានការណ៍រលំអគារបាក់អគារកម្ពស់៧ជាន់ដែលសម្លាប់មនុស្ស២៨នាក់កាលពីពេលថ្មីៗនេះ។ កាលណោះអាជ្ញាធរខេត្តក្រោមការដឹកនាំរបស់អភិបាលខេត្តចាស់ លោកយន្ត មីន រងការរិះគន់យ៉ាងចាស់ដៃ ដែលបណ្ដែតបណ្ដោយឲ្យមានការសាងសង់។
គេជឿថា អគារសាងសង់គ្មានគុណភាពនិងគ្មានការអនុញ្ញាតនៅមានច្រើនទៀតក្នុងខេត្តព្រះសីហនុ។ ទោះជាបែបនេះក្ដី អ្នកនាំពាក្យសាលាខេត្តព្រះសីហនុលោក ឃាង ភារម្យ បានអះអាងបន្ថែមពីលើសេចក្ដីបង្គាប់របស់មន្ទីររៀបចំដែនដីខេត្តថា អាជ្ញាធរតម្រូវឲ្យក្រុមហ៊ុន រុះរើសំណង់របស់ខ្លួនជាបន្ទាន់ ខណៈអាជ្ញាធរកំពុងរង់ចាំម្ចាស់សំណង់ចូលខ្លួនមកដោះស្រាយ។ ដរាបណាការសាងសង់នៅតែដំណើរការ អាជ្ញាធរក៏នៅតែបន្តសកម្មភាពចុះទៅពិនិត្យការដ្ឋានសាងសងដែលខុសច្បាប់។ នេះបើតាមអ្នកនាំពាក្យដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ