លោកស្រី មូរ សុខហួរ ថាក្រុមគាំទ្រ លោក សម រង្ស៊ី ចាប់ផ្តើមធ្វើដំណើរមកកាន់តំបន់អាស៊ីជាបណ្តើៗហើយ
ប្រធានគណៈកម្មការរៀបចំដំណើរមាតុភូមិនិវត្តន៍របស់អ្នកនយោបាយបក្សប្រឆាំង បានអះអាងថា មកដល់ពេលនេះ គឺក្រុមអ្នកគាំទ្រ លោក សម រង្ស៊ី នៅក្រៅប្រទេសចំនួនពីរយន្តហោះហើយ បានចេញពីប្រទេសនានាធ្វើដំណើរមកកាន់តំបន់អាស៊ី។ ការរំកិលខ្លួនរបស់ក្រុមនេះមកកាន់តំបន់អាស៊ីនេះ គឺស្របពេលដែលក្រុមពលករខ្មែរនៅកូរ៉េខាងត្បូងប្រកាសធ្វើបាតុកម្មនៅថ្ងៃទី២០តុលាចុងសប្តាហ៍នេះ និងដើម្បីត្រៀមខ្លួនអមដំណើរលោក សម រង្ស៊ី ដែលប្រកាសមកដល់កម្ពុជានៅថ្ងៃទី៩វិច្ឆិកាខាងមុខ។ ប៉ុន្តែពលរដ្ឋខ្មែរដែលមិនគាំទ្រ លោក សម រង្ស៊ី មិនជឿលើការឃោសនាបែបនេះឡើយ។
ចុះផ្សាយនៅថ្ងៃ៖
តាមរយៈបទសម្ភាសជាមួយវិទ្យុអាស៊ីសេរីយប់ថ្ងៃទី១៤តុលា លោកស្រី មូរ សុខហួរ ប្រធានគណៈកម្មការរៀបចំដំណើរមាតុភូមិនិវត្តន៍របស់អ្នកនយោបាយបក្សប្រឆាំងបានថ្លែងថា លោកស្រីផ្ទាល់បានលាកូនៗរបស់លោកស្រីរួចហើយ មុននឹងលោកស្រីជួបមន្រ្តីជាន់ខ្ពស់ក្រសួងការបរទេសអាមេរិក នៅព្រឹកថ្ងៃទី១៥តុលា។ បន្ទាប់មកពីជំនួបនោះលោកស្រីអះអាងថា លោកស្រីនឹងចេញដំណើរពីអាមេរិកមកកាន់តំបន់អាស៊ី តែលោកស្រីមិនបញ្ចេញឈ្មោះប្រទេស។
បើតាមលោកស្រី មូរ សុហួរ ចាប់តាំងពីសប្តាហ៍មុនមកដល់ពេលនេះ គឺមានអ្នកគាំទ្រ លោក សម រង្ស៊ី ចំនួនពីរយន្តហោះហើយ បានចាកចេញពីប្រទេសនានាមកកាន់តំបន់អាស៊ី។ នៅតំបន់អាស៊ីដែលក្រុមពលករខ្មែរនៅកូរ៉េខាងត្បូងនឹងធ្វើបាតុកម្មជាថ្មីទៀត នៅថ្ងៃទី២០តុលាចុងសប្តាហ៍នេះ ដើម្បីជំរុញឲ្យរដ្ឋាភិបាលកម្ពុជាគោរពកិច្ចព្រមព្រៀងក្រុងប៉ារីស២៣តុលា និងដើម្បីត្រៀមខ្លួនអមដំណើរលោក សម រង្ស៊ី ដែលប្រកាសមកដល់កម្ពុជានៅថ្ងៃទី៩វិច្ឆិកា។ នេះបើតាម លោក ស សុខេម ជាអ្នករៀបចំបាតុកម្មរបស់ពលករខ្មែរនៅកូរ៉េខាងត្បូង។
ក៏ប៉ុន្តែ លោក លឹម សំអាត ជាតំណាងពលរដ្ឋខ្មែរនៅអូស្ត្រាលីបានប្រាប់វិទ្យុបារាំងអន្តរជាតិRFIថា នៅមិនទាន់មានពលរដ្ឋខ្មែរគាំទ្រ លោក សម រង្ស៊ី ធ្វើដំណើរមកកាន់ប្រទេសនៅតំបន់អាស៊ី ដែលគៀកនឹងកម្ពុជានៅឡើយ។ នេះបើយោងតាមការកក់សំបុត្រយន្តហោះ។ ជាមួយគ្នានោះដែរ លោក សាត វិច្ឆិការ ជាតំណាងពលរដ្ឋខ្មែរនៅប្រទេសបារាំង បាននិយាយថា ពលរដ្ឋខ្មែរភាគច្រើននៅតំបន់អឺរ៉ុបនឹងមិនមកអមដំណើរ លោក សម រង្ស៊ី តាមការអំពាវនាវនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ