នៅខេត្តរតនគិរី៖ គ្រុនឈាមសម្លាប់កុមារីម្នាក់ ក្នុងចំណោមអ្នកជំងឺជាង១០០នាក់
ជំងឺគ្រុនឈាមដែលបានផ្ទុះឡើងនៅខេត្តរតនគិរី តាំងពីចុងខែឧសភា បានសម្លាប់មនុស្សអស់ម្នាក់ហើយ គិតត្រឹមថ្ងៃអង្គារទី០៤មិថុនាម្សិលមិញ។ នេះបើតាមការឲ្យដឹងពីប្រធានមន្ទីរសុខាភិបាលខេត្តរតនគិរី។ សូមជម្រាបថា គិតត្រឹមពេលនេះ ករណីឆ្លងជំងឺគ្រុនឈាមនៅរតនគិរី មានចំនួនជាង១០០ករណី កើនឡើងជិត៣ដងបើធៀបនឹងឆ្នាំមុន។ កំណើននេះត្រូវបានអ្នកជំនាញពន្យល់ថា គឺដោយសារតែឆ្នាំ២០១៩ គឺជាវដ្តរបស់ជំងឺគ្រុនឈាម ដែលតែងតែផ្ទុះឡើងរៀងរាល់៤ទៅ៥ឆ្នាំម្ដង។
ចុះផ្សាយនៅថ្ងៃ៖
ស្តាប់ - ០២:២៤
អ្នកស្លាប់ដោយសារជំងឺគ្រុនឈាមដំបូងគេនៅខេត្តរតនគិរី នាដើមរដូវវស្សាឆ្នាំ២០១៩នេះ គឺកុមារី អាយុ១២ឆ្នាំ រស់នៅភូមិក្រឡាញ់ញ៉ៃ ឃុំវើនសៃ ស្រុកវើនសៃ។ លោក អ៊ុង រតនា ប្រធានមន្ទីរសុខាភិបាលខេត្តរតនគិរី បានគូសបញ្ជាក់ថា កុមារីនេះ បានស្លាប់បាត់បង់ជីវិត ដោយសារតែឪពុកម្ដាយមិនបានបញ្ជូននាងទៅមណ្ឌលសុខភាពឲ្យបានទាន់ពេលវេលា ដោយគិតថា ជាជំងឺក្ដៅខ្លួនធម្មតា។
សូមជម្រាបជូនថា ជំងឺគ្រុនឈាមបានផ្ទុះឡើងកាលពីចុងខែឧសភា នៅក្នុងស្រុកប្រតិបត្តិចំនួន៣ នៃខេត្តរតនគិរី ជាអាថិ៍ ស្រុកវើនសៃ ស្រុកបកែវ និងក្រុងបានលុង ដោយមានអ្នកកើតជំងឺនេះចំនួន១១១នាក់។ ចំនួននេះ កើនឡើងប្រមាណជិត៣ដង បើធៀបនឹងឆ្នាំ២០១៨ ដែលមានអ្នកកើតជំងឺគ្រុនឈាមចំនួន៣៨នាក់ប៉ុណ្ណោះ។
ប្រឈមនឹងកំណើននៃករណីជំងឺគ្រុនឈាមដូច្នេះ មន្ទីរសុខាភិបាលខេត្តរតនគិរី បានចាត់មន្ដ្រីជំនាញឲ្យចុះទៅបាញ់ថ្នាំសម្លាប់ប្រភពមូសខ្លា ចាប់តាំងពីថ្ងៃទី០២មិថុនា។ ចំពោះការពិនិត្យនិងព្យាបាលជំងឺវិញ មន្ទីរសុខាភិបាលបានបញ្ជូនគ្រូពេទ្យជាច្រើននាក់ទៅប្រចាំការនៅទីតាំងដែលផ្ទុះជំងឺគ្រុនឈាម ដើម្បីអន្តរាគមន៍ព្យាបាលបានទាន់ពេលវេលា។
ជាការកត់សម្គាល់ នៅក្នុងឆមាសទី១ ឆ្នាំ២០១៩នេះ អ្នកកើតជំងឺគ្រុនឈាមនៅទូទាំងប្រទេសកម្ពុជា មានចំនួនជិត៨,០០០នាក់ហើយ។ ចំនួននេះ កើនឡើងច្រើន បើធៀបនឹងរយៈពេលដូចគ្នាក្នុងឆ្នាំ២០១៨កន្លងទៅ។ ក្រសួងសុខាភិបាល បានអះអាងថា កត្តាដែលបណ្ដាលឲ្យមានករណីគ្រុនឈាមច្រើនដូច្នេះ គឺដោយសារតែបម្រែបម្រួលអាកាសធាតុ និងវត្តមានជម្រកមូសខ្លានៅតាមផ្ទះសម្បែង ឬទីធ្លាសាធារណៈ។ មួយវិញទៀត គឺដោយសារតែឆ្នាំ២០១៩ គឺជាវដ្តរបស់ជំងឺគ្រុនឈាម ដែលតែងតែផ្ទុះឡើងរៀងរាល់៤ទៅ៥ឆ្នាំម្ដង។ យ៉ាងណាក៏ដោយ លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រនៃក្រសួងសុខាភិបាល បានអះអាងថា ស្ថានភាពនៃជំងឺគ្រុនឈាមនេះ ស្ថិតនៅក្នុងកម្រិតដែលអាចគ្រប់គ្រងបាន មិនទាន់ឈានចូលដល់កម្រិតប្រកាសអាសន្ននៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ