ក្រុមហ៊ុនសុំពន្យារពេលបញ្ជួនសំរាម៦៩កុងតឺន័រទៅកាន់ប្រទេសដើមវិញ
នៅថ្ងៃសៅរ៍ទី២៤ខែសីហានេះ គឺដល់ពេលកំណត់ដែលប្រទេសកម្ពុជាត្រូវបញ្ជួនសំរាមថង់ប្លាស្ទិកចំនួន៨៣កុងតឺន័រទៅកាន់ប្រទេសដើមវិញ។ ប៉ុន្តែអគ្គនាយកដ្ឋានគយ និងរដ្ឋាករកម្ពុជា បានប្រកាសថាដោយមូលហេតុអាកាសធាតុ និងការកកស្ទះទំនិញច្រើនពេក សំរាមកាកសំណល់ប្លាស្ទិកដែលនៅសល់៦៩កុងតឺន័រទៀត ត្រូវពន្យារពេលបញ្ជួនទៅប្រទេសដើមវិញរហូតដល់ថ្ងៃទី២៥ខែតុលាខាងមុខ។
ចុះផ្សាយនៅថ្ងៃ៖
សេចក្តីប្រកាសព័ត៌មានកាលពីម្សិលមិញ អគ្គនាយកដ្ឋានគយ និងរដ្ឋាករកម្ពុជា បញ្ជាក់ថា ក្រុមហ៊ុនឈ្មោះ Chungyuen Plastic Manufactureបានដឹកសំរាមថង់ប្លាស្ទិករបស់ខ្លួនត្រឡប់ទៅប្រទេសដើមវិញអស់ចំនួន១៤កុងតឺន័រហើយ ប៉ុន្តែមិនបានបញ្ជាក់ថា ដឹកទៅប្រទេសណាមួយនោះទេ។
ចំណែកសំរាមដែលនៅសល់ចំនួន៦៩កុងតឺន័រទៀត ក្រុមហ៊ុននេះសុំពន្យារពេលដឹកទៅវិញរហូតដល់ថ្ងៃទី២៥ខែតុលាខាងមុខ ដោយសំអាងលើអាកាសធាតុមិនល្អ និងការកកស្ទះទំនិញច្រើនពេក។ នេះបើតាមអគ្គនាយកដ្ឋានគយ និងរដ្ឋាករកម្ពុជា។
យ៉ាងណាក៏ដោយអគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា ក្រុមហ៊ុនដែលនាំចូលសំរាមខុសច្បាប់ចំនួន៨៣កុងតឺន័រនោះ បានបង់ប្រាក់ផាកពិន័យចូលរដ្ឋគ្រប់ចំនួនអសហើយ រាប់ទាំងថ្លៃកំពង់ផែរផងដែរ។
បើតាមក្រសួងបរិស្ថាន កាកសំណល់សំរាមថង់ប្លាស្ទិកទាំងនេះ គឺនាំចូលពីសហរដ្ឋអាមេរិក និង កាណាដា។
លោក សាយ សំអាល់ រដ្ឋមន្រ្តីក្រសួងបរិស្ថាន បានថ្លែងបន្ថែមថា កាកសំណល់ប្លាស្ទិកគឺជាមុខទំនិញហាមចូលកម្ពុជា ប៉ុន្តែកម្ពុជាលើកទឹកចិត្តឲ្យមានការកែច្នៃកាកសំណល់ផ្លាស្ទិកដែលប្រើប្រាស់នៅក្នុងស្រុក។
កាលពីខែឧសភា ប្រទេសជាង ១៨០ បានព្រមព្រៀងគ្នាធ្វើវិសោធនកម្ម យន្តការច្បាប់ដើម្បីចាត់ចែងសំរាមប្លាស្ទិក។ ចិនដែលគេ ធ្លាប់ស្គាល់ថា ជាទិសដៅនាំចូលសំរាមបា្លស្ទិកសម្រាប់កែច្នៃឡើងវិញ លំដាប់លេខមួយ បានបញ្ឈប់ការនាំចូលសំរាមប្លាស្ទិក តាំងពីដើមឆ្នាំ២០១៨ ហើយពេលនេះ សំរាមប្លាស្ទិករបស់ប្រទេសជឿនលឿន (អាមេរិក និងកាណាដា ជាដើម) បានតម្រង់ទិសមកអាស៊ីអាគ្នេយ៍ ជាពិសេសម៉ាឡេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ