មេធាវីការពារស្នាដៃរបស់កវី គង្គ ប៊ុនឈឿន ព្រមានចាត់វិធានការតាមច្បាប់ចំពោះអ្នកលួចចម្លងស្នាដៃ
លោក ពេជ អង្គ ជាមេធាវីរបស់លោកស្រី គាត គឹមលន ភរិយា កវី គង្គ ប៊ុនឈឿន បានចេញសេចក្តីប្រកាសមួយកាលពីម្សិលមិញ ដោយព្រមានចាត់វិធានការតាមផ្លូវចំពោះអ្នកលួចចម្លងបទចម្រៀងដែលជាស្នាដៃនិពន្ធរបស់ លោក គង្គ ប៊ុនឈឿន។ ការព្រមានរបស់ក្រុមគ្រួសារកវីនិពន្ធស្ទឺងសង្កែ ក្នុងទសវត្សរ៍៥០នេះ បានធ្វើឡើងបន្ទាប់ពីក្រសួងវប្បធម៌បានសម្រេចប្រគល់សិទ្ធិគ្រប់គ្រងមរតកសាសន៍នូវបទចម្រៀងរបស់លោក គង្គ ប៊ុនឈឿន ចំនួន៥៥បទ។
ចុះផ្សាយនៅថ្ងៃ៖
តាមរយៈសេចក្តីប្រកាសព័ត៌មាននៅថ្ងៃទី៣០វិច្ឆិកាឆ្នាំ២០១៩ លោក ពេជ អង្គ ជាមេធាវីរបស់លោកស្រី គាត គឹមលន ភរិយា កវី គង្គ ប៊ុនឈឿន បានកត់សំគាល់ថា កន្លងមក និងពិសេសនៅពេលថ្មីៗនេះ មានការរំលោភសិទ្ធិលើបទចម្រៀងដែលស្ថិតក្រោមការគ្រប់គ្រងរបស់ភរិយា លោក គង្គ ប៊ុនឈឿន ។ ជាការធ្វើអាជីវកម្មខុសច្បាប់ យកទៅចម្លងឡើងវិញ កែឃ្លាឃ្លោង កែភ្លេង ដោយធ្វើអាជីវកម្មតាម Youtube ឬប្រព័ន្ធផ្សពផ្សាយសាធារណៈនានាដោយគ្មានការយល់ព្រមពីម្ចាស់សិទ្ធិគ្រប់គ្រង។ ទង្វើនេះ ត្រូវបានលោកមេធាវីគូសបញ្ជាក់ថា បានរំលោភលើច្បាប់ស្តីពីសិទ្ធិអ្នកនិពន្ធឬសិទ្ធិប្រហាក់ប្រហែលឆ្នាំ២០០៣ និងសិទ្ធិបេតិកភណ្ឌឬសិទ្ធិសីលធម៌របស់លោកស្រី គាត គឹមលន ដែលធ្វើលោកស្រី មានការឈឺចាប់ និងជាការប្រមាថដល់ការខិតខំប្រឹងប្រែងស្ទើរពេញមួយជីវិតរបស់កវី គង្គ ប៊ុនឈឿន។
លោក ពេជ អង្គ បានគូសបញ្ជាក់បន្ថែមនៅលើហ្វេសប៊ុកថា «ការនិពន្ធជាការខំប្រឹងដោយបញ្ញាស្មារតី ប្រកបដោយការច្នៃប្រឌិតខ្ពស់ ដែលគួរឲ្យគោរព។ ដូច្នេះមិនគួររំលោភសិទ្ធិរបស់អ្នកនិពន្ធ ទោះដោយហេតុផលណាមួយឡើយ»។
យ៉ាងណាក៏ដោយ លោក ពេជ អង្គ បានផ្តល់ឱកាសដល់អ្នកដែលមានបំណងទទួលសិទ្ធិធ្វើអាជីវកម្ម ការផលិតឡើងវិញក្នុងទម្រង់ណាមួយលើស្នាដៃ លោក គង្គ ប៊ុនឈឿន គឺអាចពិភាក្សាជាមួយ លោកស្រី គាត គឹមលន ឬមេធាវីតំណាង។ ប៉ុន្តែលោកមេធាវីដដែលបានស្នើឲ្យមានការបញ្ឈប់ជាបន្ទាន់ចំពោះការលួចចម្លងស្នាដៃបទចម្រៀងរបស់លោក គង្គ ប៊ុនឈឿន ទៅធ្វើអាជីវកម្មឬចែកចាយ បើពុំនោះទេលោកនឹងចាត់វិធានការតាមផ្លូវច្បាប់។
សូមរំឭកថា លោក គង្គ ប៊ុនឈឿន គឺជាកវីនិពន្ធល្បីឈ្មោះមួយរូបតាំងពីទសវត្សរ៍ទី៥០ រហូតមក។ លោកមានជំនាញទាំងផ្នែកបទចម្រៀង ភាពយន្ត និងសិល្បៈមួយចំនួនទៀត។ លោក គង្គ ប៊ុនឈឿន បានទទួលមរណភាពក្នុងវ័យ ៧៧ឆ្នាំនៅប្រទេសន័រវេសន៍ (Norway) ដោយជំងឺមហារីកកាលពីឆ្នាំ២០១៦។ លោកបានបន្សល់ទុកស្នាដៃនិពន្ធជាច្រើនសម្រាប់ឲ្យកូនខ្មែរសិក្សាស្វែងយល់ ដែលច្រើនសរសេរបង្ហាញអំពីតថភាពពិតនៅក្នុងសង្គមជាតិ រហូតដល់លោកបានរត់គេចពីការតាមចាប់ខ្លួនពីរដ្ឋាភិបាលទៅនៅក្រៅប្រទេសរហូតដល់ថ្ងៃទទួលមរណភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ