លោក សម រង្ស៊ី ងឿងឆ្ងល់ដែលជប៉ុនបន្តផ្តល់ជំនួយដល់គ.ជ.ប
លោក សម រង្ស៊ី នៅថ្ងៃអាទិត្យនេះ បានសំដែងការងឿងឆ្ងល់ចំពោះប្រទេសជប៉ុន ថាហេតុអ្វីបានជាប្រទេសមួយនេះ នៅតែបន្តផ្តល់ជំនួយបច្ចេកទេសដល់គណៈកម្មាធិការជាតិរៀបចំការបោះឆ្នោតនៅកម្ពុជា។ ចម្ងល់របស់អតីតប្រធានគណបក្សប្រឆាំងរូបនេះ គឺក្រោយពីទីប្រឹក្សានាយករដ្ឋមន្រ្ដីជប៉ុន បានចោទសួរត្រង់ៗនៅចំពោះមុខប្រមុខរដ្ឋាភិបាលកម្ពុជា អំពីលទ្ធភាពនៃការចរចា ឬកិច្ចសន្ទនាផ្នែកនយោបាយជាមួយអតីតគណបក្សសង្រ្គោះជាតិ។
ចុះផ្សាយនៅថ្ងៃ៖
ស្តាប់ - ០២:០៤
ចម្ងល់របស់លោក សម រង្ស៊ី ពីរឿងដែលជប៉ុននៅតែបន្តផ្តល់ជំនួយបច្ចេកទេសដល់គ.ជ.បនេះ ត្រូវបានអតីតប្រធានគណបក្សសង្រ្គោះជាតិរូបនេះ លើកឡើងនៅលើទំព័រហ្វេសប៊ុករបស់លោក ដោយភ្ជាប់នឹងការចុះផ្សាររបស់កាសែតជប៉ុនមួយឈ្មោះ ASAHI SHIMBUN ថ្ងៃ ២៤ មីនា ២០១៨ នេះ។ គឺជាការចុះផ្សាយលិខិតរបស់ លោក សម រង្ស៊ី មួយច្បាប់ ដែលមានចំណងជើងថា "ប្រទេសជប៉ុនអាចជួយស្តារ លទ្ធិប្រជាធិបតេយ្យ នៅកម្ពុជា"។
លោក សម រង្ស៊ី បានកត់សម្គាល់ចំណុចសំខាន់ជាងគេនៅក្នុងអត្ថបទនោះថា "បន្ទាប់ពី រដ្ឋាភិបាលលោក ហ៊ុន សែន បានរំលាយគណបក្សសង្គ្រោះជាតិរួចមក អ្នកប្រជាធិបតេយ្យទូទាំងពិភពលោក យល់ឃើញថា ការបោះឆ្នោតមួយ ដែលមិនមានការចូលរួមពីគណបក្សប្រឆាំងតែមួយគត់ ដែលអាចមានប្រៀប លើគណបក្សកាន់អំណាចសព្វថ្ងៃ គឺជាការបោះឆ្នោតមួយ ដែលគ្មានន័យអ្វីក្រៅពីផ្តល់ភាពស្របច្បាប់ឲ្យទៅរបបផ្តាច់ការសព្វថ្ងៃ"។
លើសពីនេះទៀត លោក សម រង្ស៊ី ដែលកំពុងរុំព័ទ្ធដោយបណ្តឹងរបស់រដ្ឋាភិបាលជុំវិញខ្លួននោះ បានលើកជាចម្ងល់ ពីដំណឹងដែលថា ប្រទេសជប៉ុន នឹងផ្តល់ជំនួយបច្ចេកទេស និងហិរញ្ញវត្ថុ ដើម្បីទ្រទ្រង់ការបោះឆ្នោត ថ្ងៃ ២៩ កក្កដា ឆ្នាំ ២០១៨នេះ។ គឺជាការបោះឆ្នោតដែល លោក សម រង្ស៊ី ថាមានគេទិតៀនគ្រប់ទិសទី ហើយនាំឲ្យលោកមានការងឿងឆ្ងល់ពីមូលហេតុ "ដែលនាំឲ្យផ្តល់ជំនួយបច្ចេកទេស និងហិរញ្ញវត្ថុ ដើម្បីគ្រាន់តែលម្អពីខាងក្រៅ ការបោះឆ្នោតមួយ ដែលស្អុយរលួយពីខាងក្នុង"។
សូមជម្រាបដែរថា ទីប្រឹក្សានាយករដ្ឋមន្រ្ដីជប៉ុន កាលពីថ្ងៃសុក្រ បានចោទសួរត្រង់ៗនៅចំពោះមុខប្រមុខរដ្ឋាភិបាលកម្ពុជា អំពីលទ្ធភាពនៃការចរចា ឬកិច្ចសន្ទនាផ្នែកនយោបាយជាមួយអតីតគណបក្សសង្រ្គោះជាតិ។ ប៉ុន្តែជាការឆ្លើយតបលោកនាយករដ្ឋមន្រ្តី ហ៊ុន សែន បានលើកឡើងថា លោកបរាជ័យម្តងហើយម្ដងទៀត ក្នុងការប្រើប្រាស់វប្បធម៌សន្ទនាជាមួយលោក សម រង្ស៊ី។ យ៉ាងណាក៏ដោយ អ្នកវិភាគនៅតែមានសុទិដ្ឋិនិយមថា ប្រទេសជប៉ុន អាចមានតួនាទីសំខាន់ក្នុងការរកដំណោះស្រាយបញ្ហានយោបាយនៅកម្ពុជា ខណៈជប៉ុនមិនបានដកជំនួយពី គ.ជ.ប ដូចបណ្ដាប្រទេសនានានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ