រដ្ឋមន្ត្រីក្រសួងមហាផ្ទៃ បង្ហើបពីគម្រោងវិសោធនកម្មច្បាប់ស្ដីពីព្រៃឈើ
ដើម្បីទប់ស្កាត់ការកាប់បំផ្លាញព្រៃឈើដែលនៅតែបន្តកើតមាននៅកម្ពុជា រដ្ឋមន្ត្រីក្រសួងមហាផ្ទៃ លោក ស ខេង បានបង្ហើបពីគម្រោងធ្វើវិសោនកម្មច្បាប់ស្តីពីព្រៃឈើ។ មុនឈានដល់ការធ្វើវិសោធកម្មច្បាប់ស្ដីពីព្រៃឈើនេះ លោក ស ខេង គ្រោងនឹងជួបជាមួយរដ្ឋមន្ត្រីក្រសួងបរិស្ថាននិងរដ្ឋមន្ដ្រីក្រសួងកសិកម្ម នៅក្រោយពិធីបុណ្យអុំទូក ដើម្បីធ្វើការសិក្សាលើច្បាប់ស្ដីពីព្រៃឈើនេះសិន។ សង្គមស៊ីវិលធ្វើការផ្នែកព្រៃឈើ បានសម្ដែងការស្វាគមន៍ចំពោះគម្រោងនៃការធ្វើវិសោធនកម្មនេះ តែពួកគេគ្មានទំនុកចិត្តថា ការធ្វើវិសោធនកម្មច្បាប់នេះមានប្រសិទ្ធភាពឡើយ ប្រសិនបើគ្មានការអនុវត្តតឹងរ៉ឹង។
ចុះផ្សាយនៅថ្ងៃ៖ កែប្រែថ្ងៃទី៖
លោក សេង សុខហេង អ្នកសម្របសម្រួលលេខាធិការដ្ឋានបណ្ដាញសហគមន៍ព្រៃឡង់កត់សម្គាល់ថា ច្បាប់ព្រៃឈើដែលមានស្រាប់ ភាគីពាក់ព័ន្ធអនុវត្តមិនទាន់មានប្រសិទ្ធភាពនៅឡើយទេ។ ចុះទម្រាំគម្រោងធ្វើវិសោធនកម្មទៅលើចំណុចមួយចំនួននៅក្នុងច្បាប់ស្ដីពីព្រៃឈើ ជាពិសេសគឺការផ្ដល់សិទ្ធិអំណាចទៅឲ្យអាជ្ញាធរទៀតប្រសិទ្ធភាពក្នុងការបង្ក្រាបអ្នកកាប់ឈើរឹតតែស្មុគស្មាញ។ មែនទែនទៅ សហគមន៍ទៅវិញទេ ដែលជាអ្នកមានស្នាដៃក្នុងការទប់ស្កាត់ការកាប់ឈើឲ្យមានប្រសិទ្ធភាពខ្ពស់នោះ។ តែផ្ទុយទៅវិញ សកម្មភាពរបស់សហគមន៍បែរជារងការគំរាមកំហែង។ នេះបើតាម លោក សេង សុខហេង។
អ្នកសម្របសម្រួលលេខាធិការដ្ឋានបណ្ដាញសហគមន៍ព្រៃឡង់រូបនេះ បានជំរុញឲ្យក្រសួងពាក់ព័ន្ធគ្រោងធ្វើវិសោធនកម្មច្បាប់ព្រៃឈើ គួរតែបន្ថែមសិទ្ធិអំណាចរបស់ពលរដ្ឋរស់នៅក្នុងសហគមន៍នៅមូលដ្ឋានវិញជារឿងល្អ។ នេះក៏ដោយសារតែសហគមន៍បានចំណាយទាំងកម្លាំងកាយ ពេលវេលា និងលុយកាក់ផ្ទាល់ខ្លួន។ នេះបើតាមការបញ្ជាក់របស់ លោក សេង សុខហេង។
លោកសន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានស្វាគមន៍ចំពោះគម្រោងធ្វើវិសោធកម្មច្បាប់ស្ដីពីព្រៃឈើនេះ។ ស្វាគមន៍ព្រោះលោកមើលឃើញថា ចាប់តាំងពីមានច្បាប់ស្ដីពីព្រៃឈើនិងរដ្ឋបាលព្រៃឈើមកគឺការកាប់ឈើមិនបានថយចុះឡើយពោលគឺបន្តកើតមានមកដល់បច្ចុប្បន្ន។ ប៉ុន្តែយ៉ាងណាក៏ដោយ សម្រាប់លោក សន ជ័យ ច្រកដើម្បីដោះស្រាយបញ្ហាគឺមានតែផ្ដល់សិទ្ធិស្របច្បាប់ដល់សហគមន៍រស់នៅមូលដ្ឋានរួមចំណែកទប់ស្កាត់ការកាប់ឈើ។
សូមបញ្ជាក់ថា ច្បាប់ស្ដីពីព្រៃឈើត្រូវបានអនុម័តនៅឆ្នាំ២០០៣។ ច្បាប់នេះគឺធានានូវការគ្រប់គ្រងព្រៃឈើ រួមទាំងការអភិរក្សជីវៈចម្រុះនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ