កម្ពុជាត្រៀមតវ៉ាទៅកាន់សហភាពអឺរ៉ុប ចំពោះវិធានការយកពន្ធលើការនាំចូលអង្ករពីកម្ពុជា
កម្ពុជានឹងតវ៉ាទៅកាន់សហភាពអឺរ៉ុប ចំពោះវិធានការយកពន្ធលើការនាំចូលអង្ករពីកម្ពុជា។ ការប្រកាសនេះ បានធ្វើឡើងតាមរយៈសន្និសីទកាសែតមួយ នៅរសៀលថ្ងៃទី ១៨ មករា និងនៅមួយថ្ងៃក្រោយពីសហភាពអឺរ៉ុបបានសម្រេចជាផ្លូវការ ក្នុងការយកពន្ធលើការនាំចូលអង្ករ (Indica Rice) កម្ពុជា រយៈពេល៣ឆ្នាំជាប់ៗគ្នា ដោយចាប់ផ្តើមអនុវត្តពីថ្ងៃទី១៨ មករា ឆ្នាំ២០១៩ នេះតទៅ។
ចុះផ្សាយនៅថ្ងៃ៖
ស្តាប់ - ០២:៥២
នៅក្នុងសន្និសីទកាសែតនៅរសៀលថ្ងៃទី ១៨ មករា បន្ថែមលើសេចក្តីថ្លែងការណ៍កាលពីយប់ ថ្ងៃទី ១៧ មករា លោក សុខ សុភ័ក្រ រដ្ឋលេខាធិការក្រសួងពាណិជ្ជកម្មកម្ពុជា បានអះអាងថា ផ្អែកលើទិដ្ឋភាពច្បាប់ និង វិធានពាណិជ្ជកម្មអន្តរជាតិ កម្ពុជានឹងតវ៉ាទៅកាន់គណៈកម្មការអឺរ៉ុប ចំពោះសេចក្តីសម្រេចកាលពីថ្ងៃទី ១៦ មករា។ បន្ថែមលើនេះ ការតវ៉ានឹងធ្វើឡើង ដោយផ្អែកលើលក្ខណៈពិសេសនៃអង្ករកម្ពុជា និងតថភាពសង្គម ដែលកម្ពុជាទទួលបានការគាំទ្រពីអង្គការសហប្រជាជាតិ។ បើតាម លោក សុខ សុភ័ក្រ កម្ពុជានៅតែមានសង្ឃឹមខ្ពស់ថា កម្ពុជានឹងអាចផ្លាស់ប្តូរសេចក្តីសម្រេចចិត្តរបស់សហភាពអឺរ៉ុបនេះបាន ប្រសិនបើសេចក្តីសម្រេចចិត្តនេះ មិនពាក់ព័ន្ធនឹងរឿងនយោបាយ។
ប្រតិកម្មរបស់មន្ត្រីក្រសួងពាណិជ្ជកម្មកម្ពុជានៅពេលនេះ បានធ្វើឡើងក្រោយពី គណៈកម្មការអឺរ៉ុប កាលពីថ្ងៃទី ១៦ មករា បានចេញសេចក្តីសម្រេចមួយ ដោយតម្រូវឲ្យអង្ករនាំចូលពីកម្ពុជា និងភូមា ត្រូវបង់ពន្ធរយៈពេល៣ឆ្នាំ ក្នុងអត្រា១៧៥អឺរ៉ូ (ប្រហែល២០០ដុល្លារ) ក្នុង១តោន នៅឆ្នាំ២០១៩ និងត្រូវបង់១៥០អឺរ៉ូ និង១២៥អឺរ៉ូ នៅឆ្នាំទី២ និងទី៣។ បើតាមមន្ត្រីជាន់ខ្ពស់ក្រសួងពាណិជ្ជកម្មកម្ពុជារូបនេះ កម្ពុជានឹងត្រូវខាតបង់ថវិការប្រមាណជា៥០លានដុល្លារអាមេរិកនៅក្នុង១ឆ្នាំៗ។ សេចក្តីសម្រេចនេះ ចាប់ផ្តើមអនុវត្តពីថ្ងៃទី ១៨ ខែមករា នេះតទៅ។
បើទោះជាយ៉ាងនេះក្តី មន្ត្រីជាន់ខ្ពស់ក្រសួងពាណិជ្ជកម្មរូបនេះ បានចាត់ទុកសេចក្តីសម្រេចនេះថា មិនមែនជារឿងដែលភ្ញាក់ផ្អើលនោះទេ។ ដ្បិតរដ្ឋាភិបាលកម្ពុជាបានដឹងជាមុនរួចជាស្រេចហើយថា នឹងមានថ្ងៃនេះ។ ដូច្នេះហើយ តាំងពីឆ្នាំ ២០១៧មក រដ្ឋាភិបាលបានដាក់ចេញនូវវិធានការមួយចំនួនដូចជា ទី១.ក្រសួងពាណិជ្ជកម្មបានទម្លាក់ចោលការយកកំរៃគ្រប់គ្រងលើការនាំចេញ ទី២.នៅខែធ្នូឆ្នាំ២០១៨កន្លងទៅ ក្រសួងបានលុបចោលថែមទៀតនូវការសុំលិខិតស្នាមលើការបញ្ជាក់ពីប្រភពដើមនៃមុខទំនិញដែលត្រូវនាំចេញពីក្រសួងពាណិជ្ជកម្មជាដើម និងចុងក្រោយនេះ តាមរយៈ យុទ្ធនាការពង្រឹងឯករាជ្យភាពរបស់កម្ពុជា ប្រមុខរដ្ឋាភិបាលកម្ពុជាលោក ហ៊ុន សែន ទើបតែបានបញ្ជាឲ្យមានការដកកងកម្លាំង និងស្ថាប័នទាំងអស់ចេញពីព្រំដែន ដោយទុកឲ្យមានតែស្ថាប័នគយ និងប៉ូលីសអន្តោប្រវេសប៉ុណ្ណោះ។ បន្ថែមលើនេះ រដ្ឋាភិបាលកម្ពុជាបានទម្លាក់ថ្លៃអគ្គិសនីថែមទៀត ដែលវិធានការទាំងនេះ បានធ្វើឲ្យរដ្ឋាភិបាលកម្ពុជាខាតបង់ថវិការប្រមាណពី៥០ទៅ៦០លានដុល្លារអាមេរិក។ យ៉ាងណាក៏ដោយ មន្ត្រីជាន់ខ្ពស់ក្រសួងពាណិជ្ជកម្មកម្ពុជារូបនេះ បានទទួលស្គាល់ថា សេចក្តីសម្រេចរបស់សហភាពអឺរ៉ុបនេះ នឹងធ្វើឲ្យប៉ះពាល់ដល់កសិករកម្ពុជា។ បន្ថែមលើនេះ នៅក្នុងសេចក្តីថ្លែងការណ៍ កាលពីយប់ថ្ងៃទី ១៧ មករា ក្រសួងពាណិជ្ជកម្មកម្ពុជាបានចាត់ទុកថា សេចក្តីសម្រេចនេះ ថាជាការដកហូតចំណូលរបស់ប្រជាកសិករក្រីក្រកម្ពុជា និងប្រៀបដូចជាអាវុធសម្រាប់ធ្វើឃាតកសិករខ្មែរ និងក្រុមគ្រួសាររបស់ពួកគេ ដែលកំពុងជាប់បំណុលជាមួយនឹងស្ថាប័នឥណទាននានា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ