អ្នកនាំពាក្យនគរបាលជាតិ អំពាវនាវឲ្យពលរដ្ឋកុំចូលរួមយុទ្ធនាការ«ម្រាមដៃស្អាត»
អ្នកនាំពាក្យអគ្គស្នងការនគរបាលជាតិនៅថ្ងៃទី១៤មិថុនានេះ បានអំពាវនាវឲ្យពលរដ្ឋក្នុងស្រុកកុំចូលរួមយុទ្ធនាការ«ម្រាមដៃស្អាត»។ ម្រាមដៃស្អាត ជាយុទ្ធនាការមួយធ្វើឡើងដើម្បីបង្ហាញពីការមិនទៅចូលរួមបោះឆ្នោតនៅថ្ងៃទី២៩កក្កដាខាងមុខ តាមរយៈសកមម្មភាព របស់ពលរដ្ឋខ្មែរ និងអ្នកគាំទ្រអតីតគណបក្សសង្គ្រោះជាតិ ភាគច្រើនរស់នៅក្រៅប្រទេស។
ចុះផ្សាយនៅថ្ងៃ៖
លោក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិបានគូសបញ្ជាក់ថា ការណ៍ដែលអាជ្ញាធរ អំពាវនាវកុំឲ្យពលរដ្ឋចូលរួមយុទ្ធនាការម្រាមដៃស្អាតព្រោះយុទ្ធនាការនេះ ខុសច្បាប់។ ខុសច្បាប់ដោយសារ យុទ្ធនាការនេះមានបំណងប្រឆាំងដំណើរការបោះឆ្នោតជ្រើសតាំងតំណាងរាស្ត្រនៅថ្ងៃទី២៩កក្កដាខាងមុខ។ ក្នុងករណីរកឃើញថា មានពលរដ្ឋណាកំពុងតែធ្វើយុទ្ធនាការម្រាមដៃស្អាត ឬសកម្មភាពណាមួយដែលបង្ហាញពីការរារាំងពលរដ្ឋមិនឲ្យទៅបោះឆ្នោត ជំហ៊ានដំបូងសមត្ថកិច្ច នឹងធ្វើការអប់រំ។ អប់រំហើយ នៅតែមានសកម្មភាពទៀត អាជ្ញាធរនឹងប្រើប្រាស់វិធានការណ៍តាមផ្លូវច្បាប់។ នេះបើតាមលោក គៀត ច័ន្ទ ថារិទ្ធ។
ទាំងអ្នកនាំពាក្យអគ្គស្នងការនគរបាលជាតិ និងអ្នកនាំពាក្យបក្សកាន់អំណាចចាត់ទុក យុទ្ធនាការម្រាមដៃស្អាតនេះថា កំពុងតែដើរផ្ទុយពីសកម្មភាពស្របច្បាប់របស់រដ្ឋាភិបាល ដែលបានខិតខំ ពន្យល់ពលរដ្ឋពីដំណើរការបោះឆ្នោត រួមនឹងសិទ្ធិ និងភារៈកិច្ចរបស់ពលរដ្ឋចូលរួមបោះឆ្នោត។ ចំពោះ លោក សុខ ឥសាន អ្នកនាំពាក្យគណបក្សកាន់អំណាចជឿជាក់ថា ពលរដ្ឋមិនដើរតាម យុទ្ធនាការម្រាមដៃស្អាតឡើយ ហើយថា ពួកគេនឹងស្ដាប់ទៅតាមព្រះរាជសាររបស់ព្រះមហាក្សត្រ ដែលជំរុញឲ្យពលរដ្ឋអញ្ជើញទៅបោះឆ្នោត។
សូមបញ្ជាក់ថា យុទ្ធនាការម្រាមដៃស្អាតធ្វើឡើង តាមរយៈការប្ដូរ profile ហ្វេសបុកដោយបង្ហាញចង្អុលដៃថា គ្មានទឹកថ្នាំជ្រលក់ដៃ។ ក្នុងនោះអ្នកស្រី ប៊ូ រចនា ភរិយាសពលោក កែម ឡី ដែលកំពុងរស់នៅប្រទេសអូស្ត្រាលី តាមរយៈបណ្ដាញសង្គមហ្វេសបុក បានអះអាងថា ការបោះឆ្នោតខាងមុខជាការបោះឆ្នោត បាយឡុកបាយឡ ។ ដូច្នេះអ្នកស្រី នឹងមិនទៅចូលរួមនោះទេ។
រីឯ លោកប៉ា ងួនទៀង ប្រធានមជ្ឈមណ្ឌលដើម្បីប្រព័ន្ធផ្សព្វផ្សាយឯករាជ្យហៅកាត់ថា CCIM បានជំរុញឲ្យមានការដូរ profile ហ្វេបបុក ដើម្បីបង្ហាញម្រាមដៃគ្មានពណ៌ ។ ក្រៅពីអ្នកទាំងពីរ គេក៏សង្កេតឃើញមានពលរដ្ឋផ្សេងទៀតក៏បង្ហាញសារ នឹងរូបភាពស្រដៀងគ្នានេះដែរ។
ដោយឡែក ក្រុមសមាជិកសភាអាស៊ានដើម្បីសិទ្ធិមនុស្ស កាលពីថ្ងៃទី១២មិថុនាថ្មីៗនេះ ក៏បានចេញមុខរិះគន់ចំពោះការបំភិតបំភ័យដល់ពលរដ្ឋខ្មែរដែលពួកគេអះអាងថា ធ្វើឡើងដោយអាជ្ញាធរកម្ពុជា ដើម្បីជំរុញឲ្យពលរដ្ឋទៅបោះឆ្នោតនាពេលខាងមុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ