បីថ្ងៃនៃបុណ្យចូលឆ្នាំ៖ទេសចរជាង៤លាននាក់បានធ្វើដំណើរកំសាន្ត
ក្រសួងទេសចរណ៍បានអះអាងនៅថ្ងៃពុធនេះថា មនុស្សជាង៤លាននាក់(៤.៧២៦.៦០២) ទាំងជាតិនិងអន្តរជាតិ បានចូលរួមព្រឹត្តិការណ៍សង្ក្រាន និងធ្វើដំណើរកំសាន្តតាមរមណីយដ្ឋានទេសចរនានា ក្នុងរយៈពេលបីថ្ងៃនៃពិធីបុណ្យចូលឆ្នាំខ្មែរ។ អ្វីជាការកត់សម្គាល់ បាត់ដំបង សៀមរាប ស្វាយរៀង រាជធានីភ្នំពេញ ព្រៃវែង ជាដើម ជាគោលដៅពេញនិយមនៃដំណើរកំសាន្ត និងការជួបជុំ ក្នុងរយៈពេលបីថ្ងៃនៃពិធីបុណ្យចូលឆ្នាំខ្មែរ។
ចុះផ្សាយនៅថ្ងៃ៖ កែប្រែថ្ងៃទី៖
លោក ជុក ជំនោរ អ្នកនាំពាក្យក្រសួងទេសចរណ៍បានគូសបញ្ជាក់ថា កំណើនភ្ញៀវទេសចរជាង៤លាននាក់នេះ គេនៅមិនទាន់រាប់បញ្ចូលចំនួនពលរដ្ឋ ដែលកំសាន្តនៅតាមវត្តអារាម សាលារៀន តាមភូមិ ប្រមាណជាង៣លាននាក់ទៀតផង។ ដូច្នេះកំណើនពលរដ្ឋក្នុងស្រុកនាំមុខភ្ញៀវទេសចរអន្តរជាតិ។ តាមរយៈកំណើនចំនួនភ្ញៀវទេសចរទាំងជាតិ និងអន្តរជាតិដែលចូលរួមលេងកំសាន្ត ក្នុងរយៈពេលបីថ្ងៃនៃពិធីបុណ្យចូលឆ្នាំខ្មែរនេះ ក្រសួងទេសចរណ៍អះអាងថា មានការកើនខ្ពស់រហូតដល់ទៅជាង៦០ភាគរយ បើធៀបនឹងរយៈពេលដូចគ្នាក្នុងឆ្នាំ២០១៨។
អ្នកនាំពាក្យក្រសួងទេសចរណ៍បន្ថែមថា ដោយសារគ្មានអង្គរសង្ក្រាន្តនៅសៀមរាប តែមានសង្ក្រាន្តនៅតាមខេត្តនិងក្រុង ទើបធ្វើឲ្យកំណើនភ្ញៀវទេសចរមានការកើនឡើងបែបនេះ។សម្រាប់វិស័យឯកជនមើលឃើញថា កត្តាជីវភាពធូធាក៏បានជម្រុញឲ្យប្រជាពលរដ្ឋខ្មែរដើរលេងកំសាន្តច្រើន នៅក្នុងឱកាសបុណ្យចូលឆ្នាំថ្មីនេះ។
ជាក់ស្ដែងគោលដៅទេសចរពេញនិយមក្នុងឱកាសនៃពិធីបុណ្យចូលឆ្នាំខ្មែរគឺ ខេត្តបាត់ដំបងនាំមុខក្នុងការទទួលបានភ្ញៀវទេសចរជាង៨៧ម៉ឺននាក់ ខណៈស្វាយរៀងជិត៤៧ម៉ឺននាក់ តាមពីក្រោយដោយខេត្តសៀមរាបទទួលបានភ្ញៀវទេសចរជិត៣៩ម៉ឺននាក់។ សម្រាប់រាជធានីទាំងមូលជាពិសេសសង្ក្រាន្តវត្តភ្នំទទួលបានភ្ញៀវទេចរប្រមាណ២០ម៉ឺននាក់។
ក្នុងឱកាសឈប់សម្រាកបីថ្ងៃនៃពិធីបុណ្យចូលឆ្នាំខ្មែរនេះដែរ និន្នាការចេញទៅលេងនៅក្រៅប្រទេសពីសំណាក់ពលរដ្ឋខ្មែរក៏មានការកើនឡើងដែរ។ ក្នុងនោះប្រទេសវៀតណាមគឺជាគោលដៅទាក់ទាញ ដែលពលរដ្ឋខ្មែរនាំគ្នាទៅលេងកំសាន្តនៅទីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ