សហព័ន្ធស្រូវអង្ករកម្ពុជា នឹងស្នើក្រសួងកសិកម្ម អន្តរាគមន៍សង្គ្រោះស្រូវ អង្ករ បើសិនអឺរ៉ុបដក EBA
អនុប្រធានសហព័ន្ធស្រូវអង្ករកម្ពុជា បានឲ្យដឹងនៅថ្ងៃសុក្រនេះថា ប្រសិនបើការដកប្រព័ន្ធអនុគ្រោះពន្ធរបស់អឺរ៉ុបចេញពីកម្ពុជា ប៉ះពាល់ដល់ការនាំចូលអង្ករកម្ពុជា ទៅកាន់ទីផ្សារអឺរ៉ុបដែរនោះ វិស័យឯកជនមួយនេះ នឹងស្នើក្រសួងកសិកម្មអន្តរាគមន៍លើបញ្ហានេះ។ ការគិតទុកមុនរបស់សហព័ន្ធស្រូវអង្ករកម្ពុជា ធ្វើឡើងបន្ទាប់ពីប្រទេសអ៊ីតាលី និយាយដោយឡែក ស្នើអឺរ៉ុបពិចារណាក្នុងការយកពន្ធលើការនាំអង្ករកម្ពុជាទៅអឺរ៉ុប ខណៈដែលបញ្ហាជារួម អឺរ៉ុបក៏កំពុងដំណើរការនិតីវិធីដកប្រព័ន្ធអនុគ្រោះពន្ធគ្រប់មុខទំនិញលើកលែងតែសព្វាវុធពីកម្ពុជាដែរ។
ចុះផ្សាយនៅថ្ងៃ៖
ស្តាប់ - ០២:១៨
ស្របពេលដែលបញ្ហាកើតឡើងទន្ទឹមគ្នាបែបនេះ សហព័ន្ធស្រូវអង្ករកម្ពុជា គិតទុកជាមុនរួចហើយថា ខ្លួននឹងស្វែងរកអន្តរាគមន៍ពីក្រសួងកសិកម្ម។ ថ្លែងប្រាប់វិទ្យុបារាំងអន្តរជាតិនៅថ្ងៃសុក្រនេះ លោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជាឲ្យដឹងថា ក្រៅពីវិស័យឧស្សាហកម្ម វិស័យកសិកម្មក៏ត្រូវគិតគូរផងដែរ ប្រសិនបើអឺរ៉ុបដកប្រព័ន្ធអនុគ្រោះពន្ធគ្រប់មុខទំនិញមែននោះ។ នេះក៏ដោយសារតែអឺរ៉ុបគឺជាទីផ្សារធំមួយសម្រាប់អង្ករកម្ពុជា ដែលបានជួយកាត់បន្ថយភាពក្រីក្ររបស់ពលរដ្ឋខ្មែរ។
ក្រៅពីបញ្ហា EBA លោក ហ៊ុន ឡាក់ បញ្ជាក់ថា អ៊ីតាលី ដែលជាសមាជិកសហភាពអឺរ៉ុប បានស្នើឲ្យអឺរ៉ុបពិចារណាយកពន្ធលើការនាំចូលអង្ករកម្ពុជាទៅកាន់អឺរ៉ុប។ បំណងរបស់អ៊ីតាលីនេះ មិនមែនទើបតែកើតមានទេ ប៉ុន្តែវាជាបញ្ហាចាស់ កើតឡើងជាច្រើនឆ្នាំមកហើយ និងបានបន្តរហូតមកទល់ពេលនេះទៀត។ អ៊ីតាលី លើកឡើងថា ការនាំចូលអង្ករពីកម្ពុជាដែលមានតម្លៃទាប បានផ្ដល់ផលប៉ះពាល់ដល់កសិករនិងស្រូវអង្ករអ៊ីតាលីយ៉ាងខ្លាំង ព្រោះអង្ករអ៊ីតាលីមានតម្លៃខ្ពស់ជាង ពិបាកប្រកួតប្រជែងតម្លៃជាមួយអង្ករកម្ពុជា។
ចំពោះបញ្ហានេះ សហព័ន្ធស្រូវអង្ករកម្ពុជាបានពន្យល់ទៅកាន់តំណាងសហភាពអឺរ៉ុបថា ប្រភេទពូជស្រូវដែលផលិតចេញជាអង្កររបស់ប្រទេសទាំងពីរគឺខុសគ្នា។ ខុសគ្នាត្រង់ថា អង្ករកម្ពុជាក្រអូប និងជាអង្ករសធម្មតា។ រីឯអង្ករអ៊ីតាលី ជាអង្កររឹងនិងមានគ្រាប់ធំ។ ម្យ៉ាងអង្ករកម្ពុជានាំទៅអឺរ៉ុប គឺតម្រូវចិត្តអ្នកប្រើប្រាស់ដែលជាជនជាតិអាស៊ី ព្រោះចំណង់ចំណូលចិត្តជនជាតិអាស៊ីចូលចិត្តប្រភេទអង្ករក្រអូប និងសធម្មតា។ ដូច្នោះហើយ នៅពេលណាតម្រូវការអ្នកហូបត្រូវការអង្ករកម្ពុជាច្រើន ច្បាស់ណាស់វាអាចបង្កផលរមាស់ដល់អង្ករដែលផលិតនៅអឺរ៉ុប។ នេះបើតាមលោក ហ៊ុន ឡាក់។ តាមរយៈការពន្យល់របស់សហព័ន្ធស្រូវអង្ករបែបនេះ លោក ហ៊ុន ឡាក់ ថាតំណាងអឺរ៉ុបនឹងពិចារណាទៅលើការអនុគ្រោះពន្ធនាំចូលអង្ករកម្ពុជាទៅកាន់ទីផ្សារអឺរ៉ុប។
សូមបញ្ជាក់ថា ក្នុងមួយឆ្នាំៗ អង្ករកម្ពុជានាំទៅកាន់អឺរ៉ុបមានចំនួនជាង២សែនតោន។ តែយ៉ាងណាមិញក្នុងចំណោមប្រទេសអឺរ៉ុបទាំង២៧ ការនាំចេញទៅអ៊ីតាលីមិនច្រើនទេ។ ប្រទេសដែលកម្ពុជានាំចេញអង្ករទៅច្រើនជាងគេ គឺបារាំងនិងប៉ូឡូញឯណោះទេ។ តែសួរថា ហេតុអ្វីបានជាអ៊ីតាលីផ្ដើមតវ៉ាខ្លាំងជាងគេ ព្រោះប្រទេសនេះជាអ្នកផលិតស្រូវធំជាងគេនៅប៉ែកអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ