សកម្មជនអតីតបក្សប្រឆាំង២០នាក់ត្រូវបានកោះហៅដោយនគរបាល ខណៈជាង៣០នាក់ត្រូវកោះហៅដោយតុលាការ
យ៉ាងហោចណាស់សកម្មជនអតីតគណបក្សសង្រ្គោះជាតិចំនួន២០នាក់នៅខេត្តកំពង់ធំ ត្រូវបាននគរបាលប៉ុស្តិ៍កោះហៅទៅសួរនាំ បន្ទាប់ពីពួកគេហូបអាហារជុំគ្នា ជជែករឿងនយោបាយ និងប្រកាសគាំទ្រលោក សម រង្ស៊ី ជាប្រធានស្ដីទីគណបក្សសង្គ្រោះជាតិ ក្នុងការវិលចូលកម្ពុជា នៅឆ្នាំ២០១៩នេះ។ ចំណាត់ការរបស់នគរបាលបែបនេះគឺធ្វើឡើងស្រដៀងគ្នានឹងចំណាត់របស់តុលាការខេត្តបាត់ដំបងដែលកោះហៅសកម្មជនជាង៣០នាក់ទៅបំភ្លឺ បន្ទាប់ពីពួកគេជួបជុំគ្នាហូបនំបញ្ចុក។
ចុះផ្សាយនៅថ្ងៃ៖
ការកោះហៅសកម្មជនរបស់អតីតគណបក្សសង្រ្គោះជាតិទៅសួរនាំនេះ គឺសមត្ថកិច្ចបានអានកំណត់ហេតុឲ្យស្ដាប់ និងឲ្យផ្ដិតមេដៃទទួលស្គាល់នូវសកម្មភាពរបស់សកម្មជនទាំងនោះ តែសមត្ថកិច្ចមិនបានហាមការជួបជុំពិសាអាហារ ឬជជែករឿងនយោបាយឡើយ។ នេះបើតាមសកម្មជនដែលបានចូលបំភ្លឺ។
ប៉ុន្តែចំណាត់ការរបស់សមត្ថកិច្ចគឺធ្វើឡើងបន្ទាប់ពីមានការជួបជុំគ្នា ពិសាអាហារមួយពេលរបស់ក្រុមមន្ត្រីអតីតបក្សសង្គ្រោះជាតិ នៅខេត្តកំពង់ធំ និងក្រោយមកពួកគាត់នាំគ្នាប្រកាសគាំទ្រលោក សម រង្ស៊ី ជាប្រធានស្ដីទីគណបក្ស សង្គ្រោះជាតិ ក្នុងការវិលត្រឡប់ចូលមកកម្ពុជាវិញ។
គិតត្រឹមថ្ងៃទី១៣ ឧសភា គឺមានចំនួន ២០នាក់ នៅខេត្តកំពង់ធំបានចូលឆ្លើយបំភ្លឺនៅតាមប៉ុស្តិ៍នគរបាលរដ្ឋបាលនៅក្នុងឃុំដែលសកម្មជនទាំងនោះរស់នៅ។
ដោយឡែកតំណាងអយ្យការនៃសាលាដំបូងខេត្តបាត់ដំបង បានកោះហៅសកម្មជនអតីតគណបក្សប្រឆាំងដែលជាអតីតមេឃុំ ចៅសង្កាត់ សមាជិកក្រុមប្រឹក្សាឃុំសង្កាត់ ស្រុក ក្រុង និងក្រុមប្រឹក្សាខេត្តកើនឡើងដល់៣៥នាក់ឱ្យចូលបំភ្លឺចាប់តាំងពីថ្ងៃទី៨ រហូតដល់ចុងខែឧសភានេះ។
មានសកម្មជនអតីតគណបក្សសង្រ្គោះជាតិជាង១០នាក់ក្នុងចំណោមមនុស្សដែលបានកោះហៅ គឺបានចូលឆ្លើយបំភ្លឺនៅតុលាការខេត្តបាត់ដំបងរួចរាល់ហើយ ជុំវិញការចោទថា ពួកគេបានធ្វើសកម្មភាពប្រឆាំងសាលដីការបស់តុលាការកំពូល។ ប៉ុន្តែតំណាងអយ្យការនៅមិនទាន់សម្រេចយ៉ាងណាចំពោះជោគវាសនារបស់សកម្មជនអតីតបក្សប្រឆាំងទាំងនោះនៅឡើយ តែមានជាសំណួរចោទថាតើនឹងមានសកម្មជនប៉ុន្មាននាក់ទៀត នៅខេត្តណាខ្លះនឹងត្រូវកោះហៅបន្ថែមទៀតឲ្យទៅបំភ្លឺបន្ទាប់ពីពួកគេប្រកាសគាំទ្រ លោក សម រង្ស៊ី?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ