បង់ក្លាដេសនឹងទិញអង្ករពីកម្ពុជាចំនួន១លានតោន រយៈពេល ៥ឆ្នាំ
រដ្ឋមន្ត្រីក្រសួងពាណិជ្ជកម្មកម្ពុជា និង រដ្ឋមន្ត្រីក្រសួងស្បៀងអាហារនៃប្រទេសបង់ក្លាដេសនៅរសៀលថ្ងៃពុធនេះ បានចុះអនុស្សរណៈយោគយល់ ដើម្បីនាំចេញអង្ករឲ្យបាន១លានតោនក្នុងរយៈពេល ៥ឆ្នាំពីឆ្នាំ២០១៧ រហូតដល់ឆ្នាំ២០២២។ បើតាមក្រសួងពាណិជ្ជកម្ពុជា អនុស្សរណៈនាពេលនេះ គឺជាការជំរុញទំហំពាណិជ្ជកម្ម និងជំរុញកំណើនសេដ្ឋកិច្ច ជាពិសេសធានានូវស្ថិរភាពវិស័យស្រូវ-អង្ករនៅក្នុងប្រទេសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
អនុស្សរណៈនៃយោគយល់គ្នាក្នុងការនាំចេញអង្ករពីកម្ពុជានេះ មានវិសាលភាពគ្របដណ្តប់រាល់ប្រតិបត្តិការទិញនិងលក់អង្ករទាំងអស់រវាងកម្ពុជា និងបង់ក្លាដេស ហើយនឹងត្រូវអនុវត្តន៍ដោយក្រុមហ៊ុនហ្គ្រីនត្រេដ (GTC) ដែលជាក្រុមហ៊ុនសហគ្រាសសាធារណៈចំណុះឲ្យក្រសួងពាណិជ្ជកម្មកម្ពុជា ជាមួយនឹងអគ្គនាយកដ្ឋានស្បៀងអាហារ(DGF) ដែលជាក្រុមហ៊ុនសហគ្រាសសាធារណៈចំណុះឲ្យក្រសួងស្បៀងអាហារបង់ក្លាដេស។
លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា បានចាត់ទុកការចុះអនុស្សរណៈនៅពេលនេះ ថាជាការបើកទំព័រថ្មីមួយទៀតសម្រាប់កិច្ចសហប្រតិបត្តិការសេដ្ឋកិច្ច និងទំនាក់ទំនងពាណិជ្ជកម្មរវាងកម្ពុជា និងបង់ក្លាដេសក្នុងការចូលរួមជំរុញ និងលើកកម្ពស់សន្តិសុខ ស្ថិរភាព និងការអភិវឌ្ឍសង្គមសេដ្ឋកិច្ចនៅក្នុងតំបន់។ ជាមួយគ្នានេះ លោករដ្ឋមន្ត្រីប៉ាន សូរស័ក្តិ រំពឹងថា តាមរយៈកិច្ចព្រមព្រៀងនេះ កម្ពុជានឹងអាចនាំចេញអង្ករក្រអូប និងអង្ករចំហុយចំនួន២៥ម៉ឺនតោន ទៅកាន់ប្រទេសបង់ក្លាដេសនៅក្នុងខែតុលាខាងមុខនេះ។
ចំណែក រដ្ឋមន្ត្រីក្រសួងស្បៀងអាហារនៃប្រទេសបង់ក្លាដេសវិញ បានលើកសរសើរពីគុណភាពអង្ករកម្ពុជា ដោយសារតែអង្ករកម្ពុជាទទួលបានវិញ្ញាបនប័ត្រអន្តរជាតិជាច្រើន ហើយថែមទាំងអាចនាំចូលទៅកាន់ទីផ្សារសហភាពអឺរ៉ុប សហរដ្ឋអាមេរិក និងចិនដោយជោគជ័យ។ លោករដ្ឋមន្ត្រីបង់ក្លាដេស ក៏បានកត់សម្គាល់ថា តម្លៃធាតុផ្សំផ្សេងៗដូចជាពានរង្វាន់លេខ១លើពិភពលោកចំពោះអង្ករក្រអូបកម្ពុជា គឺមានន័យថា គុណភាព និងអត្តសញ្ញាណផលិតផលអង្ករកម្ពុជា ពិតជាមានភាពប្រាកដអាចទុកជឿចិត្តបានសម្រាប់បង់ក្លាដេស។
សូមបញ្ជាក់ថា នៅក្នុងរយៈពេល៦ខែក្នុងឆ្នាំ២០១៧នេះ កម្ពុជាបាននាំចេញអង្ករចំនួនជាងបីម៉ឺន(៣០,៩២៥)តោន។ នេះបើតាមទិន្នន័យរបស់នាយកដ្ឋានផែនការ ស្ថិតិ និងព័ត៌មានពាណិជ្ជកម្មនៃក្រសួងពាណិជ្ជកម្ម។ ដោយឡែកកាលពីឆ្នាំ២០១៦កន្លងទៅវិញ ការនាំចេញអង្កររបស់កម្ពុជាទៅកាន់ទីផ្សារអន្តរជាតិមានចំនួន ជាង៥៤ម៉ឺន(៥៤២,១៤៤)តោន គឺបានកើនឡើង ០,៧០% បើធៀបនឹងឆ្នាំ ២០១៥ ដែលមានចំនួនជាង៥៣ម៉ឺន(៥៣៨,៣៩៦)តោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ