ស្នងការនគរបាលខេត្តកណ្ដាលរងការព្រមាន ខណៈកូនប្រុសត្រូវបានផ្លាស់ចេញពីអធិការរង
រដ្ឋមន្ត្រីក្រសួងមហាផ្ទៃលោក ស ខេង បានចេញមុខព្រមាន លោក អ៊ាវ ចំរើន ស្នងការនគរបាលខេត្តកណ្ដាល បន្ទាប់ពីនគរបាលក្រោមឱវាទ ប្តឹងទៅក្រសួងមហាផ្ទៃថា ស្នងការរូបនេះមានបក្សពួកនិងគ្រួសារនិយម។ ខណៈឪពុករងការព្រមាន កូនប្រុស លោក អ៊ាវ ចំរើន ដែលជាអធិការរងក្រុងតាខ្មៅក៏ត្រូវផ្លាស់ចេញផងដែរ ក្រោមហេតុផលបញ្ចៀសគ្រួសារនិយម។ នេះបើតាមអ្នកនាំពាក្យក្រសួងមហាផ្ទៃ។
ចុះផ្សាយនៅថ្ងៃ៖
ការព្រមានជាលើកទី១ របស់រដ្ឋមន្ត្រីក្រសួងមហាផ្ទៃ លោក ស ខេង ទៅកាន់ស្នងការនគរបាលខេត្តកណ្ដាល បន្ទាប់ពីមានពាក្យបណ្ដឹងពីមន្ត្រីថ្នាក់ក្រោម ជុំវិញភាពមិនប្រក្រតីនៃសកម្មការងាររបស់លោក អ៊ាវ ចំរើន ដែលខ្វះការយកចិត្តទុកដាក់លើការដឹកនាំ និងការគ្រប់គ្រង់របស់ខ្លួន។ តាមរយៈប្រកាសចុះថ្ងៃទី៩ខែសីហា លោក ស ខេង បានសង្កត់ធ្ងន់ថា លោក អ៊ាវ ចំរើន ត្រូវកែប្រែនូវកំហុសឆ្គង និងឥរិយាបថដឹកនាំរបស់ខ្លួនឲ្យបានត្រឹមត្រូវ។ ក្នុងករណីដែល លោក អ៊ាវ ចំរើន នៅតែប្រព្រឹត្តផ្ទុយពីការណែនាំ លោកនឹងរងវិន័យរបស់កងកម្លាំងនគរបាលជាតិ។
លោក ខៀវ សុភ័គ អ្នកនាំពាក្យក្រសួងមហាផ្ទៃបានអះអាងបន្ថែមពីលើសេចក្ដីប្រកាសថា ពាក្យបណ្ដឹងខ្លះឆ្លុះបញ្ចាំងពីការពិតនូវសកម្មភាពការងាររបស់លោក អ៊ាវ ចំរើន ខណៈពាក្យបណ្ដឹងខ្លះក៏មិនបានឆ្លុះបញ្ចាំងពីការពិតនោះដែរ។ ប៉ុន្តែយ៉ាងណាមិញ លោក អ៊ាវ ចំរើន ត្រូវបានកត់ត្រានៅក្នុងប្រវត្តិរូបកត់ចំណាំមួយរួចហើយ ដែលនេះមានន័យថា បើលោក អ៊ាវ ចំរើន ត្រូវបានតម្លើងស័ក្ដិក៏ស្ថិតក្នុងការពិចារណាដែរ។
ចំណែក កូនប្រុសលោក អ៊ាវ ចំរើន ដែលកំពុងកាន់តួនាទីជាអធិការរងក្រុងតាខ្មៅត្រូវផ្លាស់ចេញមកកាន់ការងារនៅក្រសួងមហាផ្ទៃវិញ។ ការផ្លាស់ប្ដូរតួនាទីនេះ គឺជាអ្វីដែលអ្នកនាំពាក្យក្រសួងមហាផ្ទៃអះអាងថា ដើម្បីបញ្ចៀសបញ្ហាគ្រួសារនិយម។
មួយផ្នែកនៃការព្រមានលោកស្នងការ អ៊ាវ ចំរើន ស្ថិតក្នុងអភិក្រមទាំង៥ នៃយុទ្ធសាស្ត្រចតុកោណ ដំណាក់កាលទី៤ របស់រដ្ឋាភិបាល នីតិកាលទី ៦ ដែលរួមាន ឆ្លុះកញ្ចក់ ងូតទឹក ដុះក្អែល ព្យាបាល វះកាត់។ តែទោះជាបែបនេះក្ដី អ្នកនាំពាក្យក្រសួងមហាផ្ទៃបញ្ជាក់ថា ករណីលោក អ៊ាវ ចំរើន នៅមិនទាន់រាប់បញ្ចូលក្នុងអភិក្រមទាំង៥នេះនៅឡើយទេ ប្រសិនបើលោកកែប្រែឥរិយាបថបំពេញការងារ។
គេនៅចាំបានថា លោកនាយករដ្ឋមន្ត្រី ហ៊ុន សែន បានរំឭកថា គ្មានឡើយការលើកលែង ឬអនុគ្រោះ សម្រាប់មន្ត្រីដែលធ្វើខុសអភិក្រមទាំង៥។ បើពួកគេធ្វើខុសធ្ងន់នោះ នឹងប្រឈមការដកចេញពីតំណែង ដោយគ្មានការយោគយល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ