Freedom House៖ កម្ពុជាគ្មានសេរីភាព និងគួរតែពិនិត្យជាពិសេស
នៅដើមសប្តាហ៍នេះ អង្គការឃ្លាំមើលសេរីភាពពិភពលោក Freedom House បានចេញផ្សាយរបាយការណ៍ស្តីពីសេរីភាពលើពិភពលោកឆ្នាំ ២០១៩។ នៅក្នុងរបាយការណ៍នោះ ក៏មានការដាក់ចំណាត់ថ្នាក់ថា កម្ពុជា ជាប្រទេសគ្មានសេរីភាព (Not Free) ទទួលបានត្រឹម ២៦ពិន្ទុ លើ ១០០ពិន្ទុ។ មិនត្រឹមតែពិន្ទុតិចទេ តែកម្ពុជា ក៏ថែមទាំងក្លាយជាប្រទេសមួយ ក្នុងចំណោមប្រទេសចំនួន ១០ ដែលគេដាក់ជាការកត់សម្គាល់ថា មានការប៉ះពាល់ដល់គន្លងប្រជាធិបតេយ្យ និងទាមទារឲ្យមានការពិនិត្យជាពិសេស ក្នុងឆ្នាំ ២០១៩នេះ។ ប៉ុន្តែមិនខុសពីរាល់ដង អ្នកនាំពាក្យរដ្ឋាភិបាល បានអះអាងថា កម្ពុជា មិនដែលផ្តល់តម្លៃពីរឿងចំណាត់ថ្នាក់លើឆាកអន្តរជាតិនោះឡើយ ហើយកម្ពុជាក៏មានសេរីភាពតាមបែបរបស់កម្ពុជាហើយដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ប្រទេសចំនួន ១០ ដែល Freedom House ទាមទារឲ្យមានការពិនិត្យពីគន្លងប្រជាធិបតេយ្យ និងបញ្ជាក់ថាប្រទេសទាំងនេះសមនឹងទទួលបានការតាមដានជាពិសេស តាមរយៈផលប៉ះពាល់ពីឆ្នាំ ២០១៨នោះ រួមមាន កម្ពុជា ចិន អាមេនៀ ប្រេស៊ីល កាម៉េរ៉ូន អេត្យូពី អ៊ីរ៉ាក់ ប៉ូឡូញ ស្រីលង្កា និងតាន់ហ្សានៀ។
ការឲ្យត្រឹម ២៦ លើ ១០០ពិន្ទុ របស់ Freedom House ចំពោះសេរីភាពនៅកម្ពុជានេះ គឺយោងលើហេតុផលនៃការវិវត្តន៍នយោបាយ ក្នុងរយៈពេលជិត ២ឆ្នាំកន្លងមក។ រយៈពេលជិត ២ឆ្នាំ ដែលគណបក្សប្រឆាំងដ៏ធំជាងគេ ត្រូវបានរំលាយចោល បូករួមទាំងការចាប់ និងឃុំខ្លួន អតីតប្រធានបក្សប្រឆាំង និងជាពិសេសគឺការក្តោបក្តាប់អំណាចទាំងស្រុងក្នុងរដ្ឋសភា និងរដ្ឋាភិបាលរបស់លោកនាយករដ្ឋមន្ត្រីហ៊ុន សែន។
របាយការណ៍នោះ បានសរសេរបន្តថា៖ «លោកហ៊ុន សែន នាយករដ្ឋមន្ត្រីនៃកម្ពុជា បានពង្រឹងការក្តោបអំណាចស្ទើរតែទាំងស្រុង ក្រោមការបោះឆ្នោតជាតិ ដែលលោកមានកម្លាំងខ្លាំងតែម្នាក់ឯង ដោយធ្វើឡើងក្រោយពីអាជ្ញាធរបានរំលាយគណបក្សប្រឆាំងដ៏ធំ និងបំបិទបណ្តាញសារព័ត៌មានឯករាជ្យ»។
យ៉ាងណាក៏ដោយ ចំពោះរបាយការណ៍របស់ Freedom House នេះ អ្នកនាំពាក្យរដ្ឋាភិបាលកម្ពុជា លោកផៃ ស៊ីផាន បានបញ្ជាក់ប្រាប់វិទ្យុបារាំងថា រដ្ឋាភិបាល មិនដែលផ្តល់តម្លៃទៅលើការចាត់ចំណាត់ថ្នាក់ណាមួយរបស់អង្គការនេះទេ ដោយសារអង្គការនេះ ធ្វើការវាយតម្លៃគ្មានភាពយុត្តិធម៌ចំពោះកម្ពុជា។ តាមលោកផៃ ស៊ីផាន រដ្ឋាភិបាល មិនបានខ្វល់ពីការចាត់ចំណាត់ថ្នាក់កម្ពុជា លើឆាកអន្តរជាតិនោះឡើយ ព្រោះកម្ពុជាមានស្តង់ដារសេរីភាព តាមបែបវប្បធម៌ និងសេដ្ឋកិច្ចរបស់ខ្មែរ ហើយពលរដ្ឋក៏ដឹងពីសេរីភាពរបស់ខ្លួនរួចហើយដែរ។
គួរជម្រាបជូនថា បើគិតពីចំណាត់ថ្នាក់សេរីភាពក្នុងតំបន់នៅឆ្នាំ ២០១៩ របស់ Freedom House កម្ពុជាមានពិន្ទុខ្ពស់ជាងប្រទេសជិតខាង គឺឡាវ វៀតណាម និងថៃ ប៉ុន្តែទាបជាងប្រទេសចំនួន ៦ផ្សេងទៀត។ ចំណែកនៅលើពិភពលោកវិញ ប្រទេស ដែលគ្មានសេរីភាពសោះតែម្តង គឺស៊ីរី ដែលមាន ០ពិន្ទុ បន្ទាប់មក ទីបេ មាន ១ពិន្ទុ តួមេនីស្តង់ និងសូដង់ខាងត្បូង មាន ២ពិន្ទុ ខណៈកូរ៉េខាងជើងមាន ៣ពិន្ទុ។ ហើយប្រទេសដែលមានសេរីភាពបំផុត ទទួលបាន ១០០ពិន្ទុពេញ គឺហ្វាំងឡង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ