ផលិតករភាពយន្តជនជាតិអូស្ត្រាលីទទួលបានការលើកលែងទោស
លោក សាយ ឈុំ ដែលជាប្រមុខរដ្ឋស្ដីទី នៅថ្ងៃសុក្រទី២១កញ្ញានេះ បានសម្រេចលើកលែងទោសឲ្យផលិតករភាពយន្តជនជាតិអូស្ត្រាលី លោក James Ricketson។ លោក James Ricketson ត្រូវបានសាលាដំបូងរាជធានីភ្នំពេញ ផ្ដន្ទាទោសឲ្យជាប់ពន្ធាគារ៦ឆ្នាំ ពីបទចារកម្មនិងប្រមូលផ្ដុំព័ត៌មានជាអាថិ៍ ដែលអាចធ្វើឲ្យអន្តរាយការការពារជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
២២ថ្ងៃក្រោយការប្រកាសសាលក្រមរបស់សាលាដំបូងក្រុងភ្នំពេញ ពោលគឺនៅថ្ងៃទី២១កញ្ញានេះ លោក James Ricketson ត្រូវបានលើកលែងទោសដោយលោក សាយ ឈុំ ដែលជាប្រមុខរដ្ឋស្ដីទី។ ព្រះរាជក្រឹត្យចុះថ្ងៃទី២១កញ្ញាបញ្ជាក់ថា ត្រូវលើកលែងទោសឲ្យទណ្ឌិតឈ្មោះ James Staniforth Ricketson។ លោក James Ricketson អាយុ៦៨ឆ្នាំ សញ្ជាតិអូស្ត្រាលី ដែលត្រូវតុលាការផ្ដន្ទាទោសពីបទចារកម្មនិងប្រមូលផ្ដុំព័ត៌មានជាអាថិ៍ ដែលអាចធ្វើឲ្យអន្តរាយការការពារជាតិ តាមមាត្រា៣៣៩ និង៤៤៦ នៃក្រមព្រហ្មទណ្ឌ។
ក្រៅពីទទួលបានការលើកលែងទោស លោក James Ricketson ក៏ត្រូវបានអយ្យការអមសាលាដំបូងរាជធានីភ្នំពេញ សម្រេចឲ្យដោះលែងពីពន្ធនាគារផងដែរ។ នេះបើតាមដីការបង្គាប់ឲ្យដោះលែង ចុះថ្ងៃទី២១កញ្ញានេះ។
សូមរំឭកជូនថា លោក James Ricketson អ្នកផលិតភាពយន្តជនជាតិអូស្ត្រាលី ត្រូវបានចាប់ខ្លួននិងចោទប្រកាន់ពីបទចារកម្ម បន្ទាប់ពីលោកបានបង្ហោះដ្រូន ថតរូបភាពនិងវីដេអូពីលើអាកាស នៃយុទ្ធនាការឃោសនាបោះឆ្នោតឃុំសង្កាត់របស់អតីតគណបក្សសង្គ្រោះជាតិ នៅក្បែរស្ពានជ្រោយចង្វារ កាលពីខែមិថុនា ឆ្នាំ២០១៧។
ការចោទប្រកាន់និងផ្ដន្ទាទោសផលិតករភាពយន្តជនជាតិអូស្ត្រាលីពីសំណាក់តុលាការកម្ពុជានេះ បានទទួលការរិះគន់យ៉ាងចាស់ដៃពីសំណាក់អង្គការជាតិនិងអន្ដរជាតិ ដូចជា ក្លិបអ្នកកាសែតបរទេសនៅកម្ពុជា, អង្គការអ្នកកាសែតគ្មានព្រំដែន, អង្គការឃ្លាំមើលសិទ្ធិមនុស្ស, និងសមាគមអប់រំនិងស្រាវជ្រាវវិជ្ជាជីវៈសារព័ត៌មាននៃប្រទេសអូស្ត្រាលីជាដើម។ ស្ថាប័នទាំងនេះ ចាត់ទុកការសម្រេចរបស់តុលាការកម្ពុជា ថាមិនអាចទទួលយកបាន និងថា ជាការសម្រេចដោយគ្មានភស្តុតាងគ្រប់គ្រាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ