បោះឆ្នោតជាតិអាណត្តិទី៦៖ ជប៉ុននឹងមិនបញ្ជូនអ្នកសង្កេតការណ៍មកចូលរួមទេ
ជប៉ុននឹងមិនបញ្ជូនអ្នកសង្កេតការណ៍ មកឃ្លាំមើលការបោះឆ្នោតជាតិនៅកម្ពុជា នាចុងសប្ដាហ៍នេះទេ បើទោះបីជាជប៉ុនគឺជាម្ចាស់ជំនួយដ៏សំខាន់មួយនៅក្នុងការបោះឆ្នោតនេះក៏ដោយ។ នេះបើតាមការគូសបញ្ជាក់ពីអ្នកនាំពាក្យរដ្ឋាភិបាលជប៉ុន នៅក្នុងសន្និសីទកាសែតមួយនាថ្ងៃពុធ ទី២៥ កក្កដានេះ។
ចុះផ្សាយនៅថ្ងៃ៖
ស្តាប់ - ០១:៣៥
ជប៉ុនតែងតែបញ្ជូនអ្នកសង្កេតការណ៍របស់ខ្លួនមកតាមដានការបោះឆ្នោតនៅកម្ពុជា រាប់ចាប់តាំងពីការបោះឆ្នោតជាសកលលើកដំបូងនៅឆ្នាំ១៩៩៣, និងក្រោយៗមកទៀត នៅឆ្នាំ១៩៩៨, ឆ្នាំ២០០៣ និងឆ្នាំ២០០៨។ ប៉ុន្តែឆ្នាំនេះ គ្មានការបញ្ជូនអ្នកសង្កេតការណ៍បោះឆ្នោតមកកម្ពុជាទៀតទេ។
មិនបញ្ជូនអ្នកសង្កេតការណ៍មកឃ្លាំមើលដំណើរការបោះឆ្នោតក៏ពិតមែន ប៉ុន្តែអ្នកនាំពាក្យរដ្ឋាភិបាលជប៉ុន លោក Yoshihide Suga បានអះអាងថា ជប៉ុនបានបញ្ជូនអ្នកជំនាញជាច្រើនមកកម្ពុជា ក៏ដូចជាផ្ដល់ជំនួយបច្ចេកទេសដល់ការបោះឆ្នោតលើកនេះ។ លោកថា នេះបង្ហាញពីការគាំទ្ររបស់ជប៉ុន ចំពោះកំណែទម្រង់ការបោះឆ្នោតនៅកម្ពុជា។
គួរជម្រាបជូនថា ជប៉ុនគឺជាប្រទេសម្ចាស់ជំនួយដ៏ចម្បងមួយសម្រាប់ការបោះឆ្នោតនៅកម្ពុជា។ ថ្មីៗនេះ ប្រទេសជប៉ុនបានផ្ដល់ជំនួយជាហិបឆ្នោតចំនួន ១១,០០០ ហិប ក៏ដូចជារថយន្តប្រភេទ Pick Up ចំនួន៤០គ្រឿង សម្រាប់បម្រើឲ្យការបោះឆ្នោតជាតិឆ្នាំ២០១៨។ គិតទាំងលើកនេះទៀត ជំនួយរបស់ជប៉ុនសម្រាប់កម្ពុជា មានទំហំទឹកប្រាក់ជាង៧លានដុល្លារហើយ។
ការបោះឆ្នោតជាតិនៅកម្ពុជាក្នុងឆ្នាំ២០១៨នេះ បានទទួលរងការរិះគន់ជាបន្តបន្ទាប់ពីសហគមន៍អន្ដរជាតិ ជាពិសេសពីមន្ដ្រីអង្គការសហប្រជាជាតិ និងប្រទេសលោកខាងលិច ក្រោយពីមានការរំលាយគណបក្សសង្គ្រោះជាតិដែលជាបក្សប្រឆាំងធំជាងគេនៅកម្ពុជា និងការចាប់ខ្លួនថ្នាក់ដឹកនាំបក្សប្រឆាំងពីបទក្បត់ជាតិជាដើម។ បើទោះបីជាយ៉ាងដូច្នេះក៏ដោយ រដ្ឋាភិបាលខ្មែរតែងតែគូសបញ្ជាក់ថា ការរិះគន់ទាំងនេះ គ្មានជះឥទ្ធិពលលើដំណើរការបោះឆ្នោតនៅកម្ពុជាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ