រដ្ឋាភិបាលលោកហ៊ុន សែន ត្រៀមថវិកាឧបត្ថម្ភស្ដ្រីក្រីក្រពេលមានផ្ទៃពោះ ចាប់ពីពាក់កណ្ដាលឆ្នាំ២០១៩តទៅ
ចាប់ពីពាក់កណ្ដាលឆ្នាំ២០១៩តទៅ រដ្ឋាភិបាលលោកនាយករដ្ឋមន្ដ្រី ហ៊ុន សែន នឹងឧបត្ថម្ភថវិកាចំនួន៧៦ម៉ឺនរៀល ដល់ស្ដ្រីក្រីក្រ ចាប់តាំងពីពេលមានផ្ទៃពោះ រហូតដល់ពេលសម្រាលកូនរួច។ គោលនយោបាយថ្មីលើវិស័យសង្គមដូច្នេះ ត្រូវបានលោកនាយករដ្ឋមន្ដ្រី ហ៊ុន សែន ប្រកាសនៅព្រឹកថ្ងៃចន្ទនេះ ក្នុងឱកាសលោកអញ្ជើញជាអធិបតីនៅក្នុងខួបលើកទី១១ នៃទិវាអតីតយុទ្ធជនកម្ពុជា នាសាលមហោស្រពកោះពេជ្រ។ បើតាមប្រមុខរដ្ឋាភិបាលកម្ពុជា ការឧបត្ថម្ភថវិកានេះ នឹងបែងចែកជា៣ដំណាក់កាល៖ ទី១ ពេលមានផ្ទៃពោះ ឧបត្ថម្ភ៤ម៉ឺនរៀលម្ដង ចំនួន៤ដង។ ទី២ ពេលសម្រាលកូន ឧបត្ថម្ភ២០ម៉ឺនរៀល។ និងទី៣ ពេលសម្រាលកូនរួចរហូតដល់កូនមានអាយុ២ឆ្នាំ ឧបត្ថម្ភ៤ម៉ឺនរៀលម្ដង ចំនួន១០ដង។
ចុះផ្សាយនៅថ្ងៃ៖
ស្តាប់ - ០១:៤៣